SIFATLI VA TEZKOR DAVLAT XIZMATLARIDAN AHOLI MAMNUN

Respublikamizning barcha hududlarida Davlat xizmatlari markazlari tomonidan aholiga sifatli, tezkor, shaffof davlat xizmatlari koʻrsatilib, tizim faoliyati yanada takomillashtirilmoqda.  Prezidentimizning 2017-yil 12-dekabrdagi Qarori bilan faoliyati yoʻlga qoʻyilgan ilk kunlarda markaz tomonidan 33 turdagi davlat xizmatlari koʻrsatilgan boʻlsa, bugunga kelib xizmat turlari 160 taga yaqinlashdi.

Tumanimizdagi Davlat xizmatlari markazi ham aholi uchun qulay hududda joylashgan. Zamonaviy va koʻrkam binoda joylashgan markaz axborot kommunikatsiya jihozlari va boshqa zarur vositalar bilan taʼminlangan.  

Markaz tomonidan shu yilning 1-yarim yilligida 49 866 jismoniy va yuridik shaxslarga davlat xizmatlari koʻrsatildi. Shu jumladan, 2035 ta elektron raqamli imzo ochildi. 601 ta tadbirkorlik subʼektlari davlat roʻyxatidan oʻtkazilgan boʻlib, shundan yuridik shaxslar 171 tani, yakka tartibdagi tadbirkorlar 430 tani tashkil qiladi. Tadbirkorlik subʼektlarini qayta roʻyxatdan oʻtkazish 103 tadan iborat boʻlsa, yuridik shaxslar 74, yakka tartibdagi tadbirkorlar 29 nafarni tashkil qiladi. Tadbirkorlik subʼektlarini davlat reyestridan chiqarish 69 tani tashkil etdi. Ularning 25 nafari yuridik shaxslar, 44 nafari yakka tartibdagi tadbirkorlardir.

Oʻtgan davr mobaynida targʻibot tadbirlari davomida koʻrsatilgan sayyor davlat xizmatlari soni 2296 taga yetdi. Shuningdek, 55 marotaba taʼlim muassalarida seminar, tumandagi 49 ta mahallada, 11 ta mehnat jamoalarida sayyor qabullar tashkil kilindi. Amalga oshirilgan targʻibot tadbirlarida 1706 nafarga yaqin fuqarolar qatnashib, elektron davlat xizmatlaridan foydalanish koʻnikmalari haqidagi tushunchalarga ega boʻldilar. Oʻtkazilgan targʻibot tadbirlarida 1448 ga yaqin bukletlar ham tarqatildi.  

Shuningdek, taʼlim muassasalariga borgan holda va ZOOM dasturi orqali bitiruvchi yoshlarda zarur bilim va koʻnikmalarni shakllantirishga qaratilgan «Davlat xizmatlaridan foydalanish madaniyati» mavzusidagi oʻquv-seminarlari, ochiq darslar oʻtkazildi.

Ovul va mahallalarga tashrif buyurgan holda davlat xizmatlaridan elektron foydalanishni ommalashtirish maqsadida aholi oʻrtasida uchrashuvlar tashkil etilib, elektron raqamli imzo kalitini olish, elektron roʻyxatdan oʻtish, subsidiya olish xizmatlaridan foydalanish kabilar keng tushuntirilmoqda.

Markaz tomonidan koʻrsatilayotgan sifatli va tezkor xizmatlardan tumanimiz aholisi juda mamnun. Zero, mamlakatimiz rahbarining “Xalq davlat idoralariga emas, davlat idoralari xalqimizga xizmat qilishi kerak”, degan insonparvar gʻoyasini soʻzsiz amalga oshirish va aholiga qulaylik yaratish markaz xodimlarining asosiy maqsadi hisoblanadi.

Sarvar HayItboyev, tuman Davlat xizmatlari markazi boʻlim boshligʻi.