“Ayollar daftari”ni yangidan shakllantirish masalasiga bagʻishlangan seminar boʻlib oʻtdi

Mamlakatimizda koronavirus pandemiyasining aholi turmush darajasiga salbiy taʼsirini yumshatish, aholini ijtimoiy himoya qilish va koʻmakka muhtoj oilalarni moddiy qoʻllab-quvvatlashga qaratilgan tizimli ishlar amalga oshirilmoqda.

Bu yoʻnalishda manzilli, har bir shaxs bilan individual va tizimli ravishda muntazam ish olib borishni tashkil qilish maqsadida moddiy yordam va koʻmakka muhtoj oilalar boʻyicha — “Temir daftar”, ijtimoiy, iqtisodiy, huquqiy, psixologik qoʻllab-quvvatlashga, bilim va kasb-hunar oʻrganishga ehtiyoji va ishtiyoqi boʻlgan xotin-qizlar va yoshlar boʻyicha tegishlicha “Ayollar daftari” va “Yoshlar daftari” tizimlari hayotga tatbiq etildi.

Amudaryo tumanida ijtimoiy himoyaga, yordamga muhtoj xotin-qizlarni qoʻllab-quvvatlash maqsadida tuzilgan “Ayollar daftari”ga 1832 nafar koʻmakka muhtoj xotin-qizlar kiritilgan edi. Joriy yilning 20-may holatiga ushbu roʻyxatdagi barcha yordamga ehtiyoji bor ayollar ijtimoiy, iqtisodiy, psixologik qoʻllab-quvvatlanib, bandligi taʼminlandi hamda 1832 nafar yordamga muhtoj ayol-qizlar “Ayollar daftari”dan chiqarildi.

Yaqinda tuman hokimligining majlislar zalida ushbu “Ayollar daftari”ni yangidan shakllantirish masalalariga bagʻishlangan seminar boʻlib oʻtdi.

Seminarda tumandagi sektorlar rahbarlari, mahalla fuqarolar yigʻinlari masʼullari, muassasalar, korxona-tashkilotlar mutasaddilari, shuningdek, mahallalarda xonadonma-xonadon yurish orqali xotin-qizlar muammolari, ehtiyojlari va qiziqishlarini oʻrganish boʻyicha tuzilgan ishchi guruh aʼzolari ishtirok etdilar.

Aytish joizki, seminarda Oʻzbekiston Respublikasi Vazirlar Mahkamasining “Moddiy yordam va koʻmakka muhtoj oilalarni, xotin-qizlar va yoshlarni ijtimoiy qoʻllab-quvvatlash boʻyicha qoʻshimcha chora-tadbirlar toʻgʻrisida”gi qarori mazmun-mohiyati haqida tushunchalar berildi.

Taʼkidlanganidek, mamlakatimizda aholi, shu jumladan, xotin-qizlar va yoshlarning ijtimoiy himoyaga muhtoj, turmush sharoiti ogʻir, ishsiz va kasb-hunarga ega boʻlmagan, huquqiy va maʼnaviy-psixologik qoʻllab-quvvatlashga zarurati boʻlgan fuqarolarga davlat tomonidan manzilli koʻmaklashish boʻyicha mutlaqo yangicha tizim joriy qilindi. Bu borada hududlarda tashkil qilingan “Ayollar daftari” asosida har bir ijtimoiy himoyaga muhtoj xotin-qizlar tizimli ravishda qoʻllab-quvvatlandi.

Seminarda tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova xotin-qizlar muammolarini oʻrganish hamda ikkinchi “Ayollar daftari”ga kiritiladigan xotin-qizlar roʻyxatini shakllantirish yuzasidan oldinda turgan vazifalar xususida soʻz yuritdi.

1-10-iyul kunlari oraligʻida mahallalarda tashkil etilgan ishchi guruhlar xonadonma-xonadon yurib, ayol-qizlarning muammolarini oʻrganishlari lozimligi, har bir yordamga muhtoj xotin-qizlar individual tarzda soʻrovnoma toʻldirishlari kerakligi hamda ularni tuman shtabiga taqdim etishlari lozimligi qayd etildi. Qolaversa, ushbu yoʻnalishdagi ishlarni oʻz vaqtida olib borishda barcha mutasaddi rahbarlar amaliy yordam berishlari, masʼul korxona-tashkilotlar hamkorlikda ish yuritishlari kerakligi taʼkidlandi.

Shuningdek, uchrashuvda aholi, ayniqsa, yoshlar va xotin-qizlarning hayot va turmush sharoitidagi muammolarini aniqlash, yakka tartibda ishlash orqali ularning hayot tarzini yaxshilash hamda ijtimoiy faolligini oshirish, shuningdek, aniqlangan muammolarni kompleks va manzilli hal qilish borasidagi chora-tadbirlar tizimli ravishda davom ettirilishi aytib oʻtildi.

Charos Arslonova, tuman hokimligining Axborot xizmati rahbari.