Amudaryo tumani IIB boshligʻining huquqbuzarlik va jinoyatchilikning oldini olish boʻyicha aholiga murojati

Assalomu alaykum, hurmatli yurtdoshlar!

Amudaryo tumanida huquqbuzarlik va jinoyatchilikning oldini olish boʻyicha huquqni muhofaza qiluvchi idoralar, sektor boshliqlari hamda jamoatchilik bilan birgalikda profilaktik va manzilli chora-tadbirlar amalga oshirilmoqda.

Oʻtgan 5 oy davomida hisobga olingan jinoyatlarni tahlil qilganimizda, badanga har xil darajadagi jarohat yetkazish, firibgarlik, oʻgʻirlik, giyohvandlik va hattoki qotillik jinoyatlari sodir qilingani har birimizni tashvishga solishi shubhasiz.

Bu birinchi navbatda biz – huquqni muhofaza qilish organlari xodimlarining amalga oshirayotgan ishlarimiz yetarli darajada emasligini koʻrsatadi. Shu sababli 5 oy yakuni boʻyicha jinoyatchilik ahvoli muhokama qilinib, huquqni muhofaza qiluvchi idoralar va sektor boshliqlari bilan birgalikda, bugungi kun talabidan kelib chiqib, jinoyatni jilovlashning “mahallabay”, “oilabay” ishlash tizimi ishlab chiqildi. Har bir mahallaga, ushbu hududda sodir boʻlgan jinoyat turlaridan kelib chiqib yoʻl xaritalari ishlab chiqilib, ijroga qaratildi.

Hurmatli amudaryoliklar!

Sodir boʻlayotgan jinoyatlar ahvolidan kelib chiqib, Sizlarga quyidagi “profilaktik ogohlantirish murojaatini” yoʻllamoqchimiz.

Firibgarlik bilan shugʻullanuvchi shaxslarning tasiriga tushib qolmaslik uchun, tanishlari orqali ishga joylashtirish, yer maydonini olib berish, pullaringizni ikki barobar foydasi bilan qaytarish, xalqaro internet savdo kanallari orqali nomingizga mikroqarz yoki kredit olib, pullarni oʻz vaqtida toʻlashni vaʼda qilayotganlarga, arzon narxda, imtiyozli ravishda avtomashina olib berishni vaʼda qiluvchi shaxslarga, chorva mollaringizni qimmat narxda sotib berishni vaʼda qilib qarzga oluvchi shaxslarning tegishli hujjatlari boʻlmasa, ularga ishonmasliklaringizni soʻraymiz.

Har hil kompyuter oʻyinlari, virtual sport musobaqalari boʻyicha qimor oʻyinlariga qatnashmang. Sizlarga pul mukofotlarini oʻtkazib berishni vaʼda qilib, bank plastik kartangizning raqamlari, kod va parollarini soʻrovchi boshqa shaxslarga maʼlumot bermang.

Uy-joy, yer maydoni, koʻchmas mulk sotib olishda ogoh boʻling, ushbu mulklarning egalari va tegishli hujjatlari borligiga davlat idoralari orqali aniqlik kiritgandan soʻngina toʻlovni amalga oshiring.

Psixotrop moddalarning qonunga hilof ravishda sotilishiga, ayniqsa yoshlarimiz orasida bunday yot illatlar keng tarqalishiga qarshi kurashishda faol qatnashishga chaqiramiz. Bunday holatlar boʻyicha har qanday maʼlumotga ega boʻlsangiz, zudlik bilan hududiy ichki ishlar idoralariga xabar bering. Xabar bergan shaxslar toʻgʻrisida maʼlumotlar sir saqlanadi.

Hurmatli yurtdoshlar!

Internet tarmoqlari orqali oʻzga shaxslar bilan tanishishda, ularga oʻzingiz toʻgʻringizda maʼlumotlar, rasmlar berishda, profilingizga rasmlar joylashtirishda ehtiyotkorlik choralariga eʼtibor berishingizni soʻraymiz.

Oʻgʻirlik jinoyatidan jabrlanib qolmaslik uchun yashash joyingizda eshik va derazalarning mustahkamligiga eʼtibor qaratib, videokuzatuv kameralari va qoʻriqlash hizmatining imkoniyatlaridan foydalanishni tavsiya etamiz.

Transport vositalarini qarovsiz yoki salonida pul, qimmatbaho buyumlar bilan qoldirmang. Chorva mollarni dala maydonida qarovsiz qoldirmaslikka chaqiramiz.

Oilalarda, tanishlaringiz orasida yer, suv, uy-joy va boshqa masalalarda nizolar paydo boʻlsa zudlik bilan hududiy ichki ishlar idoralariga xabar bering. Bunday masalalarni huquqni muhofaza qiluvchi idoralar va mahalla vakillari bilan birgalikda hal etishga harakat qiling.

Avtomashina boshqarishda yoʻl harakati qoidalariga qatʼiy amal qiling, yoʻl harakati ishtirokchilariga hurmat bilan munosabatda boʻling. Sababi, yoʻldagi har bir qoidabuzarlik mudhish, ayanchli oqibatlarga olib kelishi mumkinligini hech qachon esingizdan chiqarmang. Farzandlaringizni yoʻlning qatnov qismiga yaqin joylarda qarovsiz qoldirmang.

Hurmatli vatandoshlar!

Huquqbuzarliklar va jinoyatchilikning oldini olishda biz – huquqni muhofaza qiluvchi idoralar vakillari Siz azizlarning yordamingizga ishonamiz va suyanamiz. Davlat organlari, sektorlar, jamoatchilik vakillari va fidoiy fuqarolar bilan birgalikda tegishli chora-tadbirlarni amalga oshirish orqali tumanimizni, har bir ovul va mahallani, har bir oilani jinoyatdan holi hududga aylantirishimizga ishonaman.

Sizlarni mazkur profilaktik chora-tadbirlarda faol ishtirok etishga chaqirib qolamiz.

Ulugʻbek Xudoyberganov, Amudaryo tumani IIB boshligʻi