“KAMALAK – 20 YoSh” NOMLI ANJUMAN OʻTKAZILDI

“Kamalak” – bolalarning sevimli tashkiloti sifatida koʻp yillardan buyon faoliyat koʻrsatib kelmoqda. Tashkilot tomonidan jismonan sogʻlom, maʼnan yetuk va intellektual rivojlangan, mustaqil fikrlaydigan yosh avlodni shakllantirish, yoshlarni tashqi tahdidlar va “ommaviy madaniyat”ning zararli taʼsiridan muhofaza qilish, yoshlarning huquq va qonuniy manfaatlarini himoya qilish maqsadida tashkil etilayotgan turli tadbirlar oʻsib kelayotgan yoshlarni birlashtirishda muhim ahamiyat kasb etmoqda.

Joriy yilda “Kamalak” bolalar tashkiloti tashkil topganiga 20-yil toʻldi. Har yili sana munosabati bilan tashkilotning “Vatan, doʻstlik va baxtli bolalik uchun” shiori ostidagi anjumanlarini oʻtkazish anʼanaga aylangan.

5-iyun kuni 12-sonli umumtaʼlim maktabida ham “Kamalak – 20 yosh” nomli XX anjuman oʻtkazildi. Anjumanni maktabning maʼnaviy-maʼrifiy ishlari boʻyicha direktor oʻrinbosari Hakim  Saparboyev ochib berdi va tashkilotning tashkil topganiga 20-yil toʻlgani bilan maktab yoshlarini tabrikladi.

 Tadbirda soʻzga chiqqanlar yosh avlodni milliy gʻoyalar asosida Vataniga sodiq, komil farzandlar etib tarbiyalash, ularning huquq-manfaatlarini ifoda etish va himoya qilish, isteʼdodi va qobiliyatini roʻyobga chiqarishi hamda rivojlantirishi uchun sharoitlar yaratib berish tashkilotning asosiy maqsadi ekanligini taʼkidlab oʻtishdi.  Yoshlar yetakchisi Nigora Saidmurodova ham oʻz soʻzida maktabda 10 yoshdan 14 yoshgacha yoshlar aʼzolik roʻyxatidan oʻtkazilgani, 7 yoshdan 10 yoshgacha boʻlgan oʻquvchilar esa tashkilotning faol aʼzosi ekanini aytib oʻtdi. Tashkilot tomonidan tashkil qilingan turli xil tanlovlar, tadbirlar va sport musobaqalarida maktab oʻquvchilari faol ishtirok etib, gʻoliblikni qoʻlga kiritib kelayotganini faxr bilan tilga oldi.  

Taʼkidlash joizki, tashkilot tomonidan isteʼdodli yoshlarni qoʻllab-quvvatlash, ularning  ijodiy va intellektual salohiyatini yuksaltirish hamda  qobiliyatlarini toʻgʻri rivojlantirishga doir koʻplab tadbirlar amalga oshirilmoqda.   Ushbu maktabda  mana shunday imkoniyatlardan unumli foydalanib kelayotgan yoshlar aytishga arzigulik yutuqlarni qoʻlga kiritishmoqda. Joriy yilda  maktab sardori Ruxshona Umirboyeva  “Yil  sardori” koʻrik-tanlovining tuman bosqichida 1-oʻrinni egallab, Respublika bosqichida faol ishtirok etdi. Undan tashqari, 5-sinf oʻquvchisi Xursandbek Umirboyev sportning DZYuDO  turi boʻyicha musobaqalar gʻolibi, 4-sinf oʻquvchisi Dilshodbek Jalgashev esa Urganch shahrida 1-iyun – Xalqaro bolalarni himoya qilish kuniga bagʻishlab oʻtkazilgan DZYuDO festivalida 1-oʻrinni egalladi. Tashkilotning faol aʼzosi, 1-sinf oʻquvchisi Dostonbek Aminboyev ham Nukus shahrida oʻtkazilgan “Yoshlar ovozi” festivalida estrada yoʻnalishi boʻyicha faol ishtirok etib, oʻzining iqtidorini, qobiliyatini namoyish qildi.

 Anjuman davomida fidoyiligi va tashabbuskorligi bilan oʻrnak  boʻlib kelayotgan maktab sardorlari va faol yoshlarga tashakkurnomalar taqdim etildi. Shuningdek, anjumanda ishtirok etgan faollar Yoshlar agentligi tuman  boʻlimi tomonidan taqdirlandilar.  

Shundan soʻng, maktab oʻquvchilari tomonidan tayyorlangan bayramona dasturlar yigʻilganlar eʼtiboriga havola etildi. Bayramona va koʻtarinki ruhda oʻtgan anjuman yoshlarda katta taassurot qoldirdi.

Sevara Ismoilova