YaNGI BARPO ETILGAN XOTIRA XIYoBONIDA BAYRAM TADBIRI OʻTKAZILDI

Urush faxriylari xotirasini eʼzozlash maqsadida hamda yurt tinchligi uchun jonini fido qilgan insonlarga nisbatan xalqimizning hurmat-ehtiromi ifodasi sifatida tuman markazida Xotira xiyoboni barpo etildi.

Maydonda Motamsaro ona haykali qad rostlagan, zamonaviy meʼmorlik anʼanalarini oʻzida mujassamlashtirgan keng ayvon barpo etilgan va ichki devoriga Ikkinchi jahon urushida halok boʻlgan amudaryolik jangchilarning ism-shariflari zarhal  harflar bilan bitib qoʻyilgan. Keng maydonga oʻtish yoʻlagi boʻyida qurilgan favvoralardan otilib chiqayotgan zilol suv atrofga musaffolik bagʻishlab turganligi kishi ruhini koʻtaradi.

Shuningdek, yoʻlaklar boʻylari turli manzarali gullar bilan bezatilgan.

Shu yilning 8-may kuni  Ikkinchi jahon urushida halok boʻlgan ajdodlarimiz xotirasiga atab bunyod etilgan ushbu Xotira xiyobonining ochilish marosimi  va 9-may sanasiga bagʻishlangan “Xotira – aziz, qadr – muqaddas” deb nomlangan tantanali marosim boʻlib oʻtdi. 

Marosimda tuman hokimi S.Yoʻldashev, tuman hokimi oʻrinbosarlari,  Mudofaa boʻlimi, huquqni muhofaza qiluvchi organlar masʼullari, korxona, tashkilotlar va fuqarolarning oʻzini oʻzi boshqarish organlari raislari, front orti mehnat faxriylari, afgʻon urushi faxriylari va yoshlar ishtirok etdilar.

Bayramona bezatilgan maydon oldida 9-may – Xotira va qadrlash kuni munosabati bilan yugurish boʻyicha  oʻtkazilgan marafon gʻoliblari saf tortdi. Tinchlikni tarannum etuvchi jangovar musiqa sadolari ostida tuman hokimi marafon gʻoliblarini qutlab, qimmatbaho sovgʻalar topshirdi.

Shu kuni ushbu xiyobon bagʻrida boʻy tiklagan yana bir muhtasham bino – ikki qavatli, zamonaviylik va milliylikni oʻzida aks ettirgan tarixiy-oʻlkashunoslik muzeyi ham tantanali ravishda ochildi. Tuman mahalliy byudjeti mablagʻlari hisobidan qurilgan, 300 dan ortiq eksponatlarni oʻzida jamlagan muzey tumanimiz maʼnaviy hayotida ulkan ahamiyat kasb etdi.

Tadbir davomida tuman Madaniyat boʻlimi tomonidan tayyorlangan maxsus bayram kontserti namoyish etildi.

Oygul RAJABOVA.