OV QUROLLARINI SAQLASh TARTIBI TUShUNTIRILDI

Mamlakatimiz hududida ov qurollarini saqlash va olib yurish uchun ovchilik, baliqchilik va sport jamiyatiga aʼzo boʻlgandan soʻng, ichki ishlar boʻlimlari tomonidan ruxsatnoma beriladi. Ovchilik, baliqchilik va sport jamiyatiga aʼzo boʻlmasdan hamda ichki ishlardan ruxsatnoma olmasdan turib, har qanday oʻq-dori va qurollarni saqlash noqonuniydir.

Fuqarolarning oʻz xonadonida noqonuniy ravishda ov miltiqlarini saqlashi ham jinoyatdir. Noqonuniy qurol saqlash qonunga zid boʻlishi bilan birga inson hayoti uchun oʻta xavfli vosita sanaladi. Bunday qoidabuzarliklar Oʻzbekiston Respublikasi Jinoyat kodeksining 248-moddasi boʻyicha jinoiy javobgarlikka tortilishiga sabab boʻladi.

Shu sababli joylarda fuqarolarga tegishli boʻlgan qurollarning saqlanishi va ulardan foydalanilishi ustidan nazoratni kuchaytirish, qurol bilan bogʻliq turli noxush holatlarning oldini olish maqsadida Oʻzbekiston Respublikasining 2019-yil 29-iyuldagi “Qurol toʻgʻrisida”gi Qonuni, Prezidentimizning 2020-yil 8-apreldagi tegishli Farmoni hamda Ichki ishlar vazirligining tegishli koʻrsatmalariga asosan muntazam ravishda targʻibot tadbirlari oʻtkazilib boriladi. Vazirlar Mahkamasining “Qurol muomalasi sohasida ruxsat berish tartib-taomillarini takomillashtirishga doir qoʻshimcha chora-tadbirlar toʻgʻrisida”gi qarori, Oʻzbekiston va Qoraqalpogʻiston Respublikasi Ichki ishlar vazirligining tegishli koʻrsatmalari ijrosini taʼminlash maqsadida 5-15-mart kunlari oraligʻida ham “Arsenal” maxsus profilaktik tadbiri oʻtkazildi.

Tuman Ichki ishlar boʻlimi tomonidan tashkil etilgan mazkur profilaktik tadbirlar jarayonida fuqarolarning ov qurollarini saqlash va ulardan foydalanish tartib-qoidalariga rioya qilish holati nazorat tartibida oʻrganib chiqildi. Tadbir davomida tumandagi 377 nafar ov quroliga ega boʻlgan fuqarolarga tegishli boʻlgan 441 ta ov qurollarining saqlash tartibi tekshirildi. Bu borada qoidabuzarlikka yoʻl qoʻygan fuqarolarga nisbatan belgilangan tartibda choralar koʻrilib, aniqlangan kamchiliklarning joyida bartaraf etilishi taʼminlandi.

Maʼlumki, qurol, oʻq-dorilar, portlovchi moddalar yoki portlatish qurilmalariga qonunga xilof ravishda egalik qilganlik uchun Oʻzbekiston Jinoyat kodeksining 248-moddasi birinchi qismiga koʻra, eng kam oylik ish haqining ellik baravarigacha miqdorda jarima yoki olti oygacha qamoq, ikki yildan besh yilgacha ozodlikni cheklash yoxud besh yilgacha ozodlikdan mahrum qilish jazolari nazarda tutilgan. Mazkur moddaning ikkinchi qismiga koʻra, oʻsha harakatlar takroran yoki xavfli retsidivist tomonidan sodir etilgan boʻlsa, besh yildan oʻn yilgacha, oʻqotar qurolni, oʻq-dorilarni, portlovchi moddalarni yoki portlash qurilmalarini oʻtkazish esa, oʻn yildan yigirma yilgacha ozodlikdan mahrum qilish bilan jazolanadi. Ushbu moddada nazarda tutilgan buyumlarni oʻz ixtiyori bilan topshirgan shaxs javobgarlikdan ozod qilinadi.

14-mart kuni “Arsenal” maxsus profilaktik tadbiri doirasida Boʻzyop ovuli hududidagi 12 nafar fuqarolarning xonadonlariga borilib, ularga tegishli ov qurollarining saqlanish holati tekshirildi. Tekshirishlar davomida ov quroli Ichki ishlar boʻlimida roʻyxatda turgan bir nafar fuqaroning ishlash uchun uzoq muddatga chet elga ketganligi aniqlanib, unga tegishli boʻlgan ov quroli vaqtincha saqlash uchun tuman Ichki ishlar boʻlimiga olib ketildi. Shuningdek, yana bir ov quroliga ega boʻlgan fuqaro vafot etganligi sababli unga tegishli boʻlgan ov quroli ham Ichki ishlar boʻlimiga keltirildi. Undan tashqari, shu ovulda yashovchi yana bir fuqaro otasiga tegishli boʻlgan eski hovlini buzayotganida paxsa devor orasidan ov quroliga tegishli boʻlgan bir qismni topib olganinini maʼlum qilib, profilaktika inspektoriga topshirdi.

Fuqarolar qoʻlida noqonuniy saqlanayotgan oʻq-dori va qurollar toʻgʻrisida huquqni muhofaza qiluvchi organlarga axborot berishlari zarur. Bunday holatlarda fuqarolarning ismi-shariflari sir saqlanishi kafolatlanadi. Bu orqali Vatanimiz tinchligiga va turli noxush holatlarning oldini olishga munosib hissa qoʻshilgan boʻladi.

K.Tajiboyev, tuman Ichki ishlar boʻlimi JTSB inspektori.