Amudaryo tuman hokimi Sultonboy Yoʻldashevning 8-mart - xalqaro xotin-qizlar kuni kuni munosabati bilan munis va muhtarama ayol-qizlarimizga bayram tabrigi

Assalomu alaykum, muhtarama onaxonlar, qadrli opa-singillar!

Avvalo, Siz azizlarni, Sizlarning timsolingizda butun tumanimiz, yurtimiz ayollarini onaxonlarimizni, qadrli opa-singillarimiz, latofatli qizlarimizni oʻzlaringiz kabi dilbar bahor faslining boshlanishi bilan, bahorning ilk bayrami boʻlmish 8-mart – xalqaro xotin-qizlar kuni bayrami bilan chin qalbimdan muborakbod etaman.

Muhtaram Prezidentimiz Shavkat Miromonovich Mirziyoyevning tashabbuslari bilan mamlakatimizda ayollarga hurmat va ehtirom koʻrsatish masalasi davlat siyosati darajasiga koʻtarilganligiga barchamiz guvohmiz.

Bugun qaysi sohaga nazar solmaylik, barchasida fidoyi va faol ayollarimizning ishtirokini koʻramiz. Mustaqil Vatanimizning qoʻlga kiritilayotgan yutuqlarini xotin-qizlarmizning ishtirokisiz tasavvur qilish qiyin.

Tumanimizda aholisining 98 ming nafardan ortigʻini tashkil qiluvchi xotin-qizlar orasida ham taʼlim, tibbiyot, bank, moliya, soliq, xizmat koʻrsatish, qishloq xoʻjaligi kabi oʻnlab sohalarning fidoyilari, oʻz sohasining yetuk bilimdonlari bor.

8 nafar ayollarimiz deputat boʻlib saylanishgan boʻlsa, 100 nafarga yaqin ayollarimiz turli sohalarda rahbarlik lavozimlarida ishlamoqda. Ham oilani, ham farzand tarbiyasini, ham ishni birdek eplayotgan bunday ayollarimizga har qancha tahsin aytsak arziydi.  

Davlatimiz rahbari bu yilgi Murojaatnomasida bir qator dolzarb masalalar qatori aholi, ayniqsa yoshlar va xotin-qizlarning bandligi taʼminlash, ularni ijtimoiy himoya qilish kabi muhim mavzularga alohida toʻxtalib oʻtdi.

Joriy yilgi Davlat dasturi doirasida xotin-qizlar faolligini oshirish, ularning ogʻirini yengil qilish orqali turmush farovonligini taʼminlash boʻyicha koʻplab chora-tadbirlarni amalga oshirish rejalashtirilgani fikrimizning dalilidir.

Muhtarama opa-singillar!

Prezidentimiz taʼkidlaganidek, barchamizga shu ulugʻ safda turib boshqalarga ibrat va namuna boʻlish, jonajon Vatanimiz, aziz xalqimizga farzandlik mehri va sadoqati bilan xizmat qilish nasib etsin!           

Sizlarni yana bir bora goʻzallik va nafosat ayyomi boʻlgan 8-mart –xalqaro xotin-qizlar kuni bilan tabriklab, oilalaringiz bagʻri butun boʻlishini, turmushingiz yanada obod, farzandalaringiz va yaqinlaringiz sogʻ-omon boʻlishini, oʻzlaringiz har jabhada faol boʻlishlaringizni tilab qolaman.

Baxtimizga doimo omon boʻling. Bayramingiz muborak boʻlsin!