ATB Mikrokreditbankning tuman filiali yangi binosi qurilishiga start berildi

Tumanimiz xalqiga bank-moliya xizmati koʻrsatish sifatini yaxshilash, mijozlar va bank xodimlari uchun namunali shart-sharoitlar yaratish maqsadida oʻtgan  2020-yil davomida AT “Xalq bank”ning tuman filiali hamda AT “Agrobank” tuman boʻlimlarining binolari sifatli taʼmirlanib, zamonaviy qiyofaga keltirildi. Bugungi kunda mazkur muassasalarda mijozlar uchun ham, xodimlar uchun ham zarur sharoit va imkoniyatlar yaratilganidan xalqimiz mamnun.
Joriy yilning 25-fevral sanasida esa tumanimizdagi yana bir moliya muassasasi – ATB Mikrokreditbank tuman filialining yangi binosi qurilishi boshlanishi munosabati bilan ATB Mikrokreditbank Qoraqalpogʻiston Respublikasi boʻyicha boshligʻi Ravaj Oʻtambetov, tuman hokimi oʻrinbosari Jasur Narimov hamda soha masʼullari, quruvchi-muhandislar, tuman arxitektura va qurilish boʻyicha masʼullar ishtirokida bino qurilishining poydevori uchun qoziq qoqish marosimi boʻlib oʻtdi.
Mangʻit shahrining Gulzor mahallasi hududida qurilishi moʻljallangan ATB Mikrokredit bankning yangi binosini qurish boʻyicha oʻtkazilgan tender savdosida gʻolib boʻlgan pudratchi tashkilot  - “Chimboy inshoot” MChJ tomonidan bino qurilishi uchun moʻljallangan hududga qurilish texnikalari, zarur ashyolar taxt holda keltirib qoʻyildi.

Bino qurilishi munosabati bilan oʻtkazilgan marosimda tuman hokimi Sultonboy Yoʻldashev, ATB Mikrokreditbankning Qoraqalpogʻiston Respublikasi boʻyicha boshligʻi Ravaj Oʻtambetov, tuman hokimi  oʻrinbosari Jasur Narimovlar soʻzga chiqishib, tumanimiz xalqiga bank va moliya xizmati koʻrsatish yuzasidan amalga oshirilayotgan keng qamrovli ishlar, shu barobarida tadbirkorlik subʼektlari safining tobora oshib borayotgani, bu esa soha xodimlari uchun yetarli zamonaviy ish sharoitlari yaratishni taqozo etayotganini taʼkidlashdi. Xususan, tumanimizdagi ATB Mikrokreditbank filiali uzoq yillardan beri eski, moslashtirilgan binoda faoliyat olib borayotgani, bu esa bank xodimlarining oʻz vazifalarini emin-erkin bajarishlarida muammolar tugʻdirayotgani, mijozlar bilan ishlashishda zamonaviy axborot texnologiyalari xizmatidan toʻlaqonli foydalanishlarida tezkorlik va sifatga erishish imkonini bermayotgani haqida toʻxtaldilar.
Shundan soʻng, tender savdosida gʻolib boʻlgan pudratchi tashkilot – Mahmudjon Jabborov rahbarligidagi “Chimboy inshoot” MChJ quruvchilari uchun qurilish ishlarini boshlashga start beruvchi qoziq qoqildi. Yangi bank binosi poydevori uchun tuman hokimi Sultonboy Yoʻldashev, ATB Mikrokreditbank Qoraqalpogʻiston Respublikasi boshligʻi Ravaj Oʻtambetov, tuman hokimi oʻrinbosari Jasur Narimov va soha maʼsullari navbatma-navbat bino poydevori uchun qoziq qoqdilar.
Shu kunning oʻzida tender savdosi gʻolibi, pudratchi tashkilot - “Chimboy inshoot” MChJ quruvchilari qurilish ishlarini boshlab yubordilar.

Robiya YOʻLDOShEVA.