XITOY OVULI KOʻRKAM QIYoFA KASB ETIB, OBOD MASKANGA AYLANMOQDA

Davlatimiz rahbari tashabbusi bilan hayotga izchil tatbiq etilayotgan “Obod qishloq” dasturi bugun chekka-chekka hududlardagi aholi punktlarida barpo etilayotgan zamonaviy uy-joylar, taʼlim muassasalari, dam olish maskanlari-yu qator xizmat koʻrsatish shoxobchalarining yangicha qiyofasida oʻzining yorqin ifodasini topmoqda. Koʻrkam qiyofa kasb etib, obod maskanlarga aylanayotgan qishloq va mahallalar aholisi mamnun hayot kechirmoqda.
Amudaryo tumanida ham “Obod qishloq” davlat dasturi doirasida Jumurtov shaharchasi va Xitoy ovullari hududlarida aholi punktlarining meʼmoriy qiyofasini tubdan yangilash, shu asosda aholining turmush madaniyatini yuksaltirishga qaratilgan bunyodkorlik ishlarini amalga oshirish chora-tadbirlar rejasi ishlab chiqilgan edi.
Ayni kunlarda mazkur hududni kompleks rivojlantirish maqsadida yoʻl-transport infratuzilmasini yaxshilash, muhandislik-kommunikatsiya tarmoqlari va ijtimoiy soha obʼektlarini zamonaviy qiyofaga keltirish maqsadida qurilish-taʼmirlash ishlari amalga oshirilmoqda. Masʼul mutasaddilar   hududlarga tashrif buyurib, obodonlashtirish va bunyodkorlik ishlarini amalga oshirishda duch kelinayotgan kamchiliklarni, muammolarni oʻrganishmoqda va ularning bartaraf etilishiga koʻmaklashishmoqda.

22-fevral kuni tuman hokimi Sultonboy Yoʻldashev, hokim oʻrinbosarlari, Prezidentning tumandagi Xalq qabulxonasi mudiri Erkin Rajabov, hudud boʻyicha sektor rahbari, tuman Ichki ishlar boʻlimi boshligʻi Ulugʻbek Xudoyberganov hamda boshqa masʼullar Obod qishloq dasturi doirasida obod maskanga aylanayotgan Xitoy qishlogʻiga tashrif buyurdilar.
Yurtning kelajagi boʻlgan yoshlarni tarbiyalash, avvalo, bogʻcha va maktablardan boshlanadi. Shu bois Xitoy ovul fuqarolar yigʻinidagi ijtimoiy  soha obʼektlaridan 2-sonli umumtaʼlim maktabi, 45-sonli maktabgacha taʼlim tashkiloti binosining toʻliq taʼmirdan chiqarilishi aholining ayni koʻnglidagi ish boʻlmoqda. Shuningdek, fuqarolar yigʻini maʼmuriy binosida ham taʼmirlash ishlari amalga oshirilmoqda. Undan tashqari, ovul hududidagi 5,95 km. uzunlikdagi ichki koʻcha yoʻllari hamda ovulni boshqa hududlar bilan tutashtiruvchi Kuyuk koʻpir – Xitoy avtomobil yoʻllarini taʼmirlashga alohida eʼtibor qaratilmoqda. Hududdagi avtomobil yoʻllari boʻyiga 1,1 km. uzunlikdagi piyodalar yoʻlakchasi ham yangidan qurilmoqda.

Rejaga koʻra, “Obod qishloq” dasturi doirasida hududdagi avtomobil yoʻllari boʻyiga  35 ta tungi koʻcha yoritish chiroqlari oʻrnatiladi. Ovul hududidagi 35 ta tayanch ustunlarni rekonstruktsiya qilish va 19,5 km. uzunlikdagi elektr tarmoqlari va 6 ta transformator punktlarida mukammal va joriy taʼmirlash ishlarini amalga oshirish koʻzda tutilgan.
Ichimlik suv taʼminotini yaʼshilashga qaratilgan chora-tadbirlarga koʻra, hudud aholisiga toza ichimlik suvini yetkazib berish maqsadida Xitoy qishlogʻi hududiga 2 ta tozalangan suv tarqatish shoxobchasi yangidan tashkil etilmoqda. Ushbu shoxobchalar ishga tushirilgach, ovul aholisini toza ichimlik suvi bilan muntazam taʼminlash imkoniyati yaratiladi.

Bundan tashqari, infratuzilma obʼektlarida obodonlashtirish ishlari olib borilmoqda. Ovul hududidagi yakka tartibdagi turar joylar holatini yaxshilash maqsadida uylarning tom qismi, fasad qismi taʼmirlanmoqda. Darvozaxonalar holati yaxshilanib, ihota devorlari taʼmirlanmoqda, ayrimlari esa yangidan qurilmoqda. Hududda koʻkalamzor maydonlarni kengaytirishga ham alohida eʼtibor qaratilmoqda va yangidan daraxtzorlar, gulzorlar tashkil etilmoqda. Aholi  tadbirkorligini rivojlantirish maqsadida 8 ta savdo majmualarini bunyod etilmoqda.
Xitoy ovulining obod goʻshaga aylanib borayotgani, hududdagi bunyodkorlik ishlari aholining kayfiyatini koʻtarib, yanada yangi marralar sari intilishlariga zamin yaratmoqda. Xitoyliklarning barchasida olib borilayotgan ishlarga daxldorlik hissi ortib, ertangi kunga ishonchi mustahkamlanmoqda.

O. Xudoyberganova.