VOYaGA YeTMAGANLAR IShLARI BOʻYIChA IDORALARARO KOMISSIYa YIGʻILIShI OʻTKAZILDI

Tuman hokimligi majlislar zalida voyaga yetmaganlar ishlari boʻyicha tuman idoralararo komissiyasining navbatdagi yigʻilishi boʻlib oʻtdi.
15-fevral kuni oʻtkazilgan ushbu yigʻilishda maktablardagi davomat va voyaga yetmaganlarning xorijiy davlatlarga ruxsatsiz chiqib ketishining oldini olishga doir masala koʻrib chiqildi. Unda tuman hokimi oʻrinbosari, Voyaga   yetmaganlar ishlari  boʻyicha Amudaryo tumani idoralararo komissiya raisining oʻrinbosari M.Shermetov, komissiya masʼul kotibi J.Xolmurodov hamda komissiyaning boshqa aʼzolari, taʼlim muassasasi, fuqarolar yigʻini masʼullari, oʻqituvchilar ishtirok etdilar.
Yigʻilishda Voyaga   yetmaganlar ishlari  boʻyicha Amudaryo tumani idoralararo komissiya raisining oʻrinbosari M.Shermetov mamlakatimizda voyaga yetmaganlarning manfaatlari va huquqlarini himoya qilish, ular tarbiyasiga, komil insonlar boʻlib voyaga yetishlariga alohida eʼtibor qaratish muhim vazifalardan biri hisoblanishni taʼkidlab, Prezidentimiz rahnamoligida yoshlar, ayniqsa, voyaga yetmaganlarni har tomonlama qoʻllab-quvvatlash, ularning huquq va erkinliklarini taʼminlashga qaratilgan izchil ishlar amalga oshirilayotgani xususida alohida toʻxtaldi.
Shuningdek, masʼullar tumandagi umumtaʼlim maktablaridan birida yuqori sinfda taʼlim olayotgan oʻquvchini onasi taʼlim olishiga imkoniyat yaratib berish oʻrniga eʼtiborsizlik qilib, Rossiya federatsiyasiga joʻnatib yuborganligi,  ushbu xatti-harakatlarning qonunga zidligi, oʻtgan davr mobaynida oʻquvchining muntazam ravishda, hech qanday sababsiz darslarga qatnashmay kelayotganligi, buning sabablari muhokama qilindi. Ushbu holat boʻyicha oʻquvchining onasi, oʻqituvchi va maktab masʼullarining izohlari tinglandi. Komissiya masʼullari voyaga yetmaganlarning taʼlim-tarbiyasida ularning ota-onalarining oʻrni va maʼsuliyati toʻgʻrisida tushunchalar berib oʻtdi.
Shundan soʻng, ota-onalarga voyaga yetmaganlarning taʼlim-tarbiyasida yoʻl qoʻygan kamchiliklariga nisbatan maʼmuriy chora qoʻllanilishi maʼlum qilindi.
Yigʻilishda muhokama etilgan masalalar yuzasidan tegishli chora-tadbirlar belgilandi.

J. Xolmurodov, Voyaga   yetmaganlar ishlari  boʻyicha

Amudaryo tumani idoralararo komissiya masʼul kotibi.