HOKIM VA YoShLAR UChRAShUVI OʻZARO MULOQOT TARZIDA BOʻLIB OʻTDI

Mamlakat taraqqiyoti, jadal rivojlanishi, muayyan yutuqlarga erishishi, xalqning farovon boʻlishi shu davlat tomonidan yoshlar taʼlim-tarbiyasi va kelajagiga beriladigan eʼtiborga bogʻliq. Shunga koʻra Oʻzbekistonda yoshlar masalasi davlat siyosatining eng ustuvor yoʻnalishlaridan biriga aylantirildi.

Shu kunlarda mamlakatimiz Prezidentining oʻtgan yilgi yoshlar forumida ishtirok etib, yoshlarning komil insonlar boʻlib voyaga yetishlari uchun imkoniyat yaratish, talab va istaklarini oʻrganish, ularga koʻmak berish boʻyicha bergan topshiriqlari ijrosini taʼminlash yuzasidan tegishli choralar koʻrilmoqda. Respublikamizning barcha hududlarida ushbu topshiriqlar ijrosini taʼminlash maqsadida yoshlar bilan uchrashuvlar tashkillashtirilib, muammolari, taklif va istaklari oʻrganilmoqda.

Yoshlar hayoti bilan tanishish, ularni qiynayotgan muammolarni oʻrganish va bartaraf etilishiga koʻmaklashish, Prezidentimiz tomonidan “Yoshlar forumi”da belgilab berilgan vazifalar ijrosini taʼminlash yuzasidan tumandagi 82-sonli maktabda tuman hokimining yoshlar bilan uchrashuvi tashkillashtirildi. Uchrashuvda sektorlar masʼullari, Prezidentning tumandagi Xalq qabulxonasi mudiri Erkin Rajabov, Yoshlar ishlari agentligi tuman boʻlimi boshligʻi Jasur Davletov, tumandagi korxona-tashkilotlar rahbar va masʼul xodimlari hamda tuman yoshlari ishtirok etdilar.

Tuman hokimi Sultonboy Yoʻldashev ushbu uchrashuvda dastlab mamlakatimizda yoshlarning yuksak marralarni egallashlari uchun yaratilayotgan shart-sharoitlar, cheksiz imkoniyatlar haqida toʻxtalib, yoshlarni oʻqib bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga daʼvat qildi. Undan tashqari, “Erishgan yutuqlarimiz oʻzimizniki, biz xato va kamchiliklarni oʻrganib, ularni bartaraf qilishga harakat qilmogʻimiz kerak!” - degan fikrni hayotiy shior qilib olish kerakligini taʼkidladi. Katta yutuqlarni qoʻlga kiritib, tengdoshlariga namuna boʻlib kelayotgan, bilimga chanqoq, izlanuvchan tumanimiz yoshlari haqida ham oʻzining samimiy fikr-mulohazalarini bildirdi.

Uchrashuvda yoshlarning taklif va istaklarini oʻrganish, muammolarini hal etishga koʻmaklashish yuzasidan belgilangan chora-tadbirlar, uyushmagan yoshlarni kasb-hunarga oʻrgatish va ish bilan taʼminlash, yoshlarni madaniyat, sanʼat, kitobxonlik, axborot texnologiyalari toʻgaraklari hamda sport va harbiy-vatanparvarlik yoʻnalishidagi tadbirlarga jalb etish borasida amalga oshirilayotgan tadbirlar toʻgʻrisida batafsil maʼlumot berildi. Shuningdek, yoshlar taʼlim-tarbiyasi uchun qoʻshimcha sharoitlar yaratish,  ishsiz yoshlarning bandligini oshirishga qaratilgan kompleks chora-tadbirlarni amaliyotga joriy etish masalalariga ham toʻxtalib oʻtildi.

Shundan soʻng, tuman hokimi Sultonboy Yoʻldashev yoshlar bilan ochiq muloqotga kirishdi va tuman yoshlari oʻzlarining savollari, takliflar hamda muammolari bilan tuman hokimiga murojaat qilishdi. Yoshlar asosan bandlikni taʼminlash, tadbirkorlik bilan shugʻullanishda koʻmak berish, kasb-hunarga oʻqitish va boshqa masalalar yuzasidan oʻzlarini qiziqtirgan savollarni berdilar. Uchrashuv davomida tuman hokimiga yoshlardan 9 nafari oʻzlarini qiynayotgan muammolarni hal etishda koʻmak soʻrab, murojaat qildi. Ushbu murojaatlarning 4 tasiga tushuntirish va tavsiyalar berilib, joyida qanoatlantirildi. Muddat talab etiluvchi murojaatlarni oʻrganib, hal etish yuzasidan tuman hokimi soha mutasaddilariga topshiriq va koʻrsatmalar berdi.

Uchrashuv yakunida yoshlar tomonidan bildirilgan savol va takliflarga atroflicha, batafsil javoblar berilib, amaliy va ijobiy natijalar koʻrilishi boʻyicha rejalar tuzildi.

Ozoda Xudoyberganova.