IJTIMOIY-IQTISODIY JIHATDAN OGʻIR DEB TOPILGAN OVUL VA MAHALLALAR MASʼULLAR TOMONIDAN OʻRGANILMOQDA

Prezidentimizning 2020-yil 11-noyabrdagi «2020-2023-yillarda Qoraqalpogʻiston Respublikasini kompleks  ijtimoiy-iqtisodiy rivojlantirish chora-tadbirlari toʻgʻrisida»gi Qarori ijrosini taʼminlash maqsadida Oʻzbekiston Respublikasi Oliy Majlisi Senati aʼzolari va boshqa masʼullar tumanimizga tashrif buyurib, aholining turmush sharoitlarini yaxshilash borasida olib borilayotgan ishlarni tizimli oʻrganishmoqda. Qaror ijrosi yuzasidan parlament nazoratini amalga oshirib, yuzaga kelayotgan muammolarni joyida hal etishda yaqindan koʻmak berishmoqda.

Joriy yil 18-yanvarda Oʻzbekiston Respublikasi Oliy Majlisi Senati Orolboʻyi mintaqasini rivojlantirish masalalari qoʻmitasi raisi Boriy Alixanov ham Amudaryo tumanida boʻlib, amalga oshirilishi rejalashtirilayotgan loyihalar, tumanning sharoiti ogʻir ovul va mahallalarda yashayotgan aholi hayoti bilan tanishdi. Senator Amudaryo tumanida ijtimoiy-iqtisodiy jihatdan ogʻir deb topilgan 3 ta ovul va mahallalar masʼullari bilan uchrashdi.

Amudaryo tumanida 3 ta, yaʼni Qipchoq ovuli, Namuna, Chordara mahallalari ijtimoiy-iqtisodiy jihatdan ogʻir deb topilgan. Ushbu mahallalardagi ijtimoiy soha obʼektlari va infratuzilma obʼektlarining holatini yaxshilash boʻyicha qator chora-tadbirlar amalga oshirilishi rejalashtirilmoqda.

Bu boʻyicha bosh rejalar ishlab chiqilgan boʻlib, mazkur fuqarolar yigʻinlaridagi maʼmuriy binolarda rekonstruktsiya va joriy taʼmirlash ishlari bajarilishi belgilangan. Undan tashqari, ushbu hududlarda joylashgan koʻp qavatli uylarning tom qismini mukammal taʼmirlash, bolalar maydonchasi va xojatxonalarni yangidan qurish ishlarini bajarish kabilar rejaga kiritilmoqda. Shuningdek, aholiga qulaylik yaratish maqsadida ovul va mahallalardagi ichki koʻcha yoʻllarini taʼmirlash, piyodalar yoʻlakchasini qurish koʻzda tutilmoqda.  Ayniqsa, elektr taʼminotini yaxshilash, mavjud gaz tarqatish punktlarini mukammal taʼmirlash, hududlardagi aholi xonadonlariga yuqori tezlikdagi internet va aloqa tarmoqlarini tortish kabilarga alohida eʼtibor qaratilib, bu boʻyicha loyiha-smeta hujjatlarini ishlab chiqish ishlari amalga oshirilmoqda.

Senator tumandagi masʼullar bilan birgalikda har bir hududdagi holatni, mavjud shart-sharoitni koʻzdan kechirib, oʻrganib chiqdi. Ijtimoiy-iqtisodiy jihatdan ogʻir deb topilgan mazkur hududlardagi fuqarolar yigʻinlari masʼullari bilan boʻlgan uchrashuvda aholini qiynayotgan muammolar, ularga yechim topish boʻyicha koʻrilayotgan chora-tadbirlar bilan qiziqdi. Oʻrganish davomida aniqlangan kamchiliklarni esa bartaraf etish boʻyicha masʼullarga tegishli topshiriqlar berdi.

19-yanvar kuni tumanimizga tashrif buyurgan Qoraqalpogʻiston Respublikasi Joʻqorgʻi Kengesi qoʻmita raisi Zuhra Reymova ham bu borada amalga oshirilayotgan ishlar bilan tanishish maqsadida ijtimoiy-iqtisodiy jihatdan ogʻir deb topilgan Qipchoq ovuli, Namuna, Chordara mahallalari masʼullari bilan uchrashdi.  Hududlarda yashayotgan aholi turmush darajasini oʻrganib, ularning yashash sharoitini yaxshilash boʻyicha koʻrilayotgan, “Ayollar daftari”, “Yoshlar daftari” asosida amalga oshirilayotgan chora-tadbirlar bilan qiziqdi. Uchrashuv davomida Prezidentimizning «2020-2023-yillarda Qoraqalpogʻiston Respublikasini kompleks  ijtimoiy-iqtisodiy rivojlantirish chora-tadbirlari toʻgʻrisida»gi Qarori ijrosini taʼminlash borasidagi amaliy ishlar, tadbirkorlarga yaratilayotgan qulaylik va imkoniyatlar bilan tanishdi.

Davlatimiz rahbarining ushbu Qarori ijrosini taʼminlash borasida tumanda bir qator ishlar amalga oshirildi. Jumladan, 2020-2022-yillarda jami 77 ta loyihalar amalga oshirilishi rejalashtirilgan. Ularga 457 mlrd. 460 mln. soʻm mablagʻ sarflanishi koʻzda tutilgan. Shundan 141 mlrd 171 mln. soʻm tadbirkorlarning oʻz mablagʻi, 13 mlrd 810 mln. soʻm bank kreditlari, 17 mln 810 ming dollar xorijiy kredit liniyalari mablagʻlari, 11,5 mln. dollar esa xorijiy investitsiya mablagʻlaridir. Ushbu loyihalarning ishga tushirilishi natijasida 2 616 ta yangi ish oʻrinlari yaratilishi belgilangan.

Zuhra Reymova tumandagi masʼullar bilan birgalikda qator investitsiya loyihalarini koʻzdan kechirdi. Tadbirkorlar bilan muloqot qilib, loyihalarni amalga oshirishda yuzaga kelayotgan muammolarni muhokama qildi.  Kamchiliklarni bartaraf etish, muammolarga ijobiy yechim topish borasida oʻz fikr-mulohazalarini bildirib, takliflar berdi.

O. Xudoyberganova.