YOʻL TRANSPORT HODISASI MUHOKAMASIGA BAGʻIShLANGAN YIGʻILISh OʻTKAZILDI
Har kim ertalab ezgu niyatlar bilan ostona hatlab koʻchaga chiqadi, ishga borish, hayotiy zarurati tufayli transport vositasiga minadi.
Keyingi yillarda fuqarolarning hayoti farovonligi ortib borayotgani deyarli barcha xonadonlar shaxsiy transport vositalariga ega ekanligida ham koʻrinadi. Bu albatta, quvonarli hol. Biroq koʻchalarda avtotrasport boshqarish qoida va meʼyorlariga amal qilmaslik, haydovchi va piyodalarning bilim-koʻnikmalari, qonunga itoatkorligi,boshqa yoʻl harakati ishtirokchilariga oʻzaro hurmatining pastligi oqibatida yoʻl-transport hodisalari, koʻplab yoʻqotishlar sodir boʻlayapti. Barchaning koʻz oʻngida yuz bergan avtohalokatlar oqibatida ne-ne alamlar, yurakni larzaga soluvchi yoʻqotishlardan ayrimlar oʻziga xulosa chiqarib olmayapti. Natijada bunday koʻngilsiz hodisalar davom etayotir.
Hozir soʻz yuritmoqchi boʻlganimiz - bir yosh yigitning umriga zomin boʻlgan ayanchli yoʻl transport hodisasini sodir etgan yigit ham «qushday uchadigan» mashinasida, yoʻlda hech kimni pisand qilmay, faqat oʻzimman, deb tezlikni meʼyordan oshirgan. Aslida u oʻsha kuni Toshyop ovulida uylanayotgan tanishining toʻy xizmatiga yaʼni «gulyanka»siga chiqqan, mashinasiga bir necha kuyov joʻralarni mindirib ketayotganida, Mangʻit aylanma yoʻlidan 3 kilometrida boshqaruvni yoʻqotishi natijasida yoʻlning qarama qarshi tomoniga chiqib ketib, yoʻl chetiga agʻdarilib, yoʻl transport hodisasini sodir qilgan. Oqibatda mashinada boʻlgan bir yigit olamdan oʻtgan, ayrimlari turli darajada tan jarohati olishgan.
Jarohatga-ku shifo topilar, biroq bevaqt soʻlgan navqiron yigitni hayotga qaytarib boʻlmaydi-da. Ha, bu - eng achinarlisi.
Shu yilning 20-yanvarida tuman hokimligi majlislar xonasida ushbu hodisa muhokamasiga bagʻishlangan yigʻilish boʻlib oʻtdi. Yigʻilishga tuman Mahalla va oilani qoʻllab-quvvatlash boʻlimi, Ichki ishlar, prokuratura masʼullari, tumanimizdagi oʻzini oʻzi boshqarish organlari rahbarlari va oʻrinbosarlari, jamoat tashkilotlari vakillari FHDYo, Yusuf Eshon bobo jomʼe masjidi vakillari ishtirok etdilar.
Yigʻilishni tuman Mahalla va oilani qoʻllab-quvvatlash boʻlimi boshligʻi Alisher Yoʻldoshev ochdi va olib bordi. U yuqoridagi qayd etilgan hodisani tilga olib, huquq-targʻibot organlari, fuqarolar yigʻinlari masʼul xodimlari kelgusida buningdek hodisalar qayta sodir boʻlmasligi uchun toʻy-marosimlar belgilangan tartibda oʻtkazilishi, «gulyanka»larda mashinalarning soni va harakatini tartibga solish, yosh-yosh yigit-qizlarning beʼmani odatlar qurboniga aylanib qolishiga chek qoʻyish lozimligi xususida gapirdi. Axir inson hayotga bir marta keladi. Insoniylikka toʻgʻri kelmaydigan «orzu-havas» uchun kim oʻzarga toʻy berishlarga chek qoʻyib, yoshlarning baxtli-saodatli boʻlishi uchun intilmogʻimiz lozim. Axir ular kelajagimiz, deya taʼkidladi u oʻz soʻzida.
Mavzu yuzasidan tuman prokurori Javlonbek Muftullayev, tuman Ichki ishlar boʻlimi boshligʻi Ulugʻbek Xudoyberganov, imom xatiblar va yoʻl transport hodisasi ishtirokchilari istiqomat qiladigan ovul fuqarolar yigʻini masʼullari, faollari oʻz fikr-mulohazalarini bildirdilar. Toʻy-tantana va boshqada marosimlarni belgilangan tartibda oʻtkazishni taʼminlash yuzasidan yoʻl harakati xavfsizligi xodimlariga, profilaktika inspektorlariga va oʻzini oʻzi boshqarish organlari masʼullariga qatʼiy topshiriqlar berildi. Ijrosini esa tuman prokuraturasi va Ichki ishlar boʻlimi oʻz nazoratiga oladigan boʻldi.
Yoʻl transport hodisasi muhokamasiga bagʻishlangan yigʻilishda muhokama etilgan masala yuzasidan qarorlar qabul qilindi.
Oygul Rajabova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
