“IJTIMOIY HIMOYa YaGONA REYeSTRI” AXBOROT TIZIMI JORIY ETILIShI BORASIDAGI ChORA-TADBIRLAR MUHOKAMA QILINDI

12-yanvar kuni tuman hokimligida bu boradagi saʼi-harakatlar izchilligini nazorat qilish va samaradorligini yanada oshirish maqsadida yigʻilish oʻtkazildi. Yigʻilishda Qoraqalpogʻiston Respublikasi Mahalla va oilani qoʻllab-quvvatlash vazirining birinchi oʻrinbosari Maryam Ahmedova ham ishtirok etdi.  Shuningdek, yigʻilishda tuman hokimi oʻrinbosari Mahmud Shermetov, tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshev hamda tegishli korxona-tashkilotlar rahbar va masʼul xodimlari, fuqarolar yigʻinlari rais va oʻrinbosarlari qatnashishdi.

Yigʻilishda Qoraqalpogʻiston Respublikasi Mahalla va oilani qoʻllab-quvvatlash vazirining birinchi oʻrinbosari Maryam Ahmedova «Ijtimoiy himoya yagona reyestri» axborot tizimi boshqa viloyatlarda oʻtgan oylar davomida bochqichma-bosqich ishga tushirila boshlangani, dekabr oyidan Qoraqalpogʻiston Respublikasida ham joriy etilayotgani, tayyorgarlik ishlari tizimli ravishda olib borilgani haqida soʻz yuritdi. Shuningdek, mazkur tizim ehtiyojmand fuqarolar tomonidan murojaat qilish jarayonini osonlashtirishini, shu paytga qadar bu jarayon uchun qogʻoz shaklida 10 dan ortiq turli xil hujjatlar va guvohnomalarni talab qilinganligini aytib oʻtdi.  Bu borada masʼul idoralar tomonidan amalga oshirilishi lozim boʻlgan vazifalar, belgilangan chora-tadbirlar toʻgʻrisida gapirib, bu jarayondagi kamchiliklarni bartaraf qilish boʻyicha koʻrsatmalar berdi.

Taʼkidlanganidek, «Ijtimoiy himoya yagona reyestri» axborot tizimi byudjetdan tashqari Pensiya jamgʻarmasiga tegishli boʻlib, «Elektron hukumat» tizimining tarkibiy qismidir. Endilikda davlat organlari va tashkilotlari tomonidan ijtimoiy xizmatlar va yordam taqdim etishda fuqarolardan 10 dan ortiq hujjat va maʼlumotnoma talab etilishiga yoʻl qoʻyilmaydi. Shu bilan birga, ular ijtimoiy yordamning 7 turidan foydalanish imkoniyatiga ega boʻladilar.

Bundan tashqari, «Ijtimoiy himoya yagona reyestri» axborot tizimi orqali belgilangan tartibda kam taʼminlangan deb eʼtirof etilgan shaxslar yoki oilalar qoʻshimcha hujjatlar va maʼlumotnomalarni taqdim etmasdan Davlat maktabgacha taʼlim muassasalarida ota-onalar toʻlovidan ozod etish, maktabgacha taʼlim muassasalarida oʻrnatilgan miqdorlarda ota-onalar toʻlovini toʻlash, umumiy oʻrta taʼlim maktablarida darsliklar ijara toʻlovlaridan ozod etish, umumiy oʻrta taʼlim maktablari oʻquvchilari uchun qishki kiyim-bosh berish, ayrim fanlarni oʻqitishga ixtisoslashtirilgan umumiy oʻrta maktablar oʻquvchilarini ovqatlanish xarajatlaridan ozod etish kabi xizmatlar va imtiyozlarni ham olishga haqlidir.

Yigʻilishda yangi tizim orqali elektron maʼlumot almashuvi, davlat tomonidan aholiga ijtimoiy yordam va xizmatlar koʻrsatishning onlayn dastur asosidagi shaffof va odilona tizimi yaratilganligi taʼkidlandi. Shuningdek, Yagona reyestr – boshlangʻich bosqichda ijtimoiy nafaqalarni tayinlash uchun inson omilisiz, oilaning muhtojligini oʻzi aniqlaydigan, nafaqalarni tayinlab, toʻlovlarni amalga oshiradigan va nazorat qiladigan, xarajatlar hisobini yuritadigan avtomatlashgan axborot tizimi ekanligini keng tushuntirish maqsadida aholi oʻrtasida targʻibot tadbirlarini yanada koʻproq oʻtkazish boʻyicha vazifalar topshirildi. Tumandagi kam taʼminlangan, ehtiyojmand oilalarga ushbu yangi tizim orqali qulay shaklda yordam koʻrsatilishini taʼminlash uchun bor imkoniyatni ishga solish lozimligi toʻgʻrisida soʻz yuritildi va tegishli vazifalar, chora-tadbirlar belgilab olindi.

O. Xudoyberganova.