Murojaatnomadan ruhlanib...

Oʻzbekiston Respublikasi Prezidentining Oliy Majlisga Murojaatnomasi – 2017-yildan buyon xalqimiz tomonidan mamlakatimizning siyosiy hayotidagi eng muhim voqea sifatida har yili intiqlik bilan kutiladi. Chunki unda dastlab tugallanayotgan yilda amalga oshirilgan ishlar, asosiy koʻrsatkichlar hamda boshlanayotgan yangi yilga moʻljallangan maqsad va vazifalar belgilab beriladi.

Davlatimiz rahbari oldimizdagi ustuvor vazifalar bilan birga, 2021-yilni – “Yoshlarni qoʻllab-quvvatlash va aholi salomatligini mustahkamlash yili” deb nomlashni taklif qilishi butun dunyo uchun murakkab vaziyatni yuzaga keltirgan pandemiyadan keyin, oʻylaymanki, barchani birdek ruhlantirdi, har bir inson qalbida ertangi kunga boʻlgan ishonchni yanada mustahkamladi, desak, mubolagʻa boʻlmaydi.

Ayniqsa, yurtimiz, xalqimiz kelajagi boʻlgan yoshlarning taʼlim-tarbiyasi, iqtidorli yoshlarimizning oʻzini namoyon qila olishi uchun keng imkoniyatlar yaratish, shu bilan birga, oʻqituvchilar mavqei, turmush darajasini oshirish, yangi imkoniyatlar yaratib berish orqali oʻqituvchilik kasbini eng nufuzli, obroʻli kasb darajasiga olib chiqish asosiy maqsad qilib belgilandi. Darhaqiqat, muallimlar ulugʻlangan yurtda taʼlim-tarbiya yuksaladi va bu orqali yoshlar kelajagi uchun mustahkam poydevor qoʻyiladi. Oʻqituvchining bolalarga sifatli taʼlim berishi va oʻz ustida ishlashi uchun davlat barcha sharoitlarni yaratib berishi zarurligi, shu boisdan, oʻqituvchi-murabbiy va taʼlim-tarbiya uslubchilari mehnatiga munosib haq toʻlash boʻyicha boshlangan ishlar bu yil ham davom ettirilishi taʼkidlandi. Buning uchun esa xalq taʼlimi xodimlarini ragʻbatlantirish hududiy jamgʻarmalariga 330 mlrd. soʻm, 240 mingdan ziyod oʻqituvchilarga sinf rahbarligi uchun ustama toʻlovlar 1,5 barobarga oshirilib, byudjetdan 400 mlrd. soʻm qoʻshimcha mablagʻ ajratilishi belgilandi. Bularning barchasi jamiyatda oʻqituvchi kasbi eng nufuzli va obroʻli kasb sifatida eʼzozlanishiga xizmat qiladi.

Shu bilan birga, taʼlim sohasida yagona “elektron taʼlim” tizimini joriy etish maqsadlari uchun kelgusi 2-yil davomida 250 mlrd. soʻm yoʻnaltirilishi belgilandi va bu xalq taʼlimi sohasini yuksaltirish borasidagi juda katta qadamdir.

Bundan tashqari, bugungi kunda bolalarning tahliliy va kreativ fikrlash qobiliyatini rivojlantirish uchun sermazmun hamda tushunarli darsliklarga ehtiyoj katta. Bu borada kelgusi oʻquv yilida boshlangʻich sinflarda davlat taʼlim standarti oʻrniga, ilgʻor xorijiy tajriba asosida, bolaga ortiqcha yuklama bermaydigan “Milliy oʻquv dasturi” joriy etilishi taʼlim sifatini oshirish yoʻlidagi yana bir jiddiy qadam boʻlishi tabiiy.

Rahmatulla Matqurbonov,

tuman XTB mudiri.