64 NAFAR AMUDARYoLIK “MEHR-SAXOVAT” KOʻKRAK NIShONI BILAN TAQDIRLANDI
Jahon miqyosida keng tarqalib, global muammoga aylangan koronavirus pandemiyasi davrida el-yurtimiz boshiga tushgan sinovli kunlarda mavjud xavf-xatarlarga qarshi kurashda ayrim yurtdoshlarimiz faol ishtirok etib kelishmoqda. Shuningdek, ushbu ofatning oqibatlarini bartaraf etishda mardlik va jasorat namunalarini koʻrsatib, milliy qadriyat va anʼanamizni munosib davom ettirib, mehr-oqibat, saxovat, himmat va olijanoblik fazilatlarini ulugʻlab, aholining ijtimoiy himoyaga muhtoj qatlamlarini har tomonlama qoʻllab-quvvatlash va ularga beminnat koʻmak berish borasidagi ishlarni umumxalq harakati darajasiga koʻtarishga hissa qoʻshishmoqda.
Mamlakatimiz Prezidenti, Muhtaram Sh.Mirziyoyev joriy yilning 26-may kuni jamiyatimizda tinchlik-osoyishtalik, birlik va hamjihatlik muhitini mustahkamlashda, begʻaraz homiylik yordami hamda ezgu ishlari bilan koʻpchilikka alohida oʻrnak boʻlayotgan ana shunday fidoyilarni taqdirlash maqsadida “Mehr-saxovat” koʻkrak nishonini taʼsis etish haqida Farmon qabul qilgan edilar. Xalqimiz salomatligini asrashda oʻz joni, huzur-halovatini oʻylamay, fidoyilik koʻrsatib mehnat qilayotgan tibbiyot xodimlari dastlab ushbu koʻkrak nishoniga munosib koʻrilib, taqdirlangandilar.
Shu yilning 14-noyabrida tuman Mahalla va oilani qoʻllab-quvvatlash boʻlimi xodimlaridan, ovul va mahalla fuqarolar yigʻinlari raislari, ularning oʻrinbosarlaridan bir guruhi, jami 64 nafar yurtdoshlarimizga ham “Mehr-saxovat” koʻkrak nishoni topshirildi. Tadbirga Qoraqalpogʻiston Respublikasi Mahalla va oilani qoʻllab-quvvatlash vaziri Sagʻindiq Turmanov, tuman hokimi S.Yoʻldoshevlar ishtirok etib, mukofotlanganlarga koʻkrak nishonini topshirdilar va ularni shu munosabat bilan qizgʻin muborakbod etdilar, el-yurtimiz tinch-osoyishta, farovon boʻlishidagi ulkan xizmatlari uchun minnatdorchilik bildirdilar. Taqdirlanganlardan 49 nafari fuqarolar yigʻinlari raislari, 7 nafari ularning oʻrinbosarlari, qolganlari esa tuman Mahalla va oilani qoʻllab-quvvatlash boʻlimi rahbar va xodimlari mukofot egalari boʻldilar.
Aytish joizki, jamiyatda “Obod va xavfsiz mahalla” tamoyilining toʻlaqonli va samarali tashkil etilishida har tomonlama koʻmaklashish, oilalar va mahallalarda ijtimoiy-maʼnaviy muhitni sogʻlomlashtirish boʻyicha belgilangan vazifalarning ijrosini taʼminlashda xalqimizga eng yaqin tashkilot hisoblangan oʻzini-oʻzi boshqarish organlari, yaʼni fuqarolar yigʻinlari muhim oʻrin tutadi. Fuqarolarning faol ishtirokini taʼminlash, nuroniylarning hayotiy tajribalari va bilimlaridan keng foydalanish, “Sogʻlom oila – sogʻlom jamiyat” tamoyilini hayotga tatbiq etishda faollik koʻrsatish, xotin-qizlarning hayotidagi turli muammolarni oʻz vaqtida aniqlab, ularga manzilli yordam koʻrsatish, aholining iqtisodiy nochor qatlamini qoʻllab-quvvatlab, moddiy yordam berish kabilar ushbu tashkilot tomonidan amalga oshiriladi. Undan tashqari, jamiyatda milliy qadriyatlarni, avloddan avlodga meros boʻlib kelayotgan urf-odat, anʼanalarni keng targʻib qilish orqali yosh avlodni odob-axloqli, intellektual salohiyatli, maʼnaviyatli qilib tarbiyalashda ham ularning koʻmagidan foydalaniladi.
Ayniqsa, joriy yilda aholini tashvishga solgan koronavirus pandemiyasi davrida odamlarni kasallikdan himoya qilishda, kasallikka chalinganlarni moddiy-quvvatlab, sogʻlom hayotga qaytarishda, pandemiya tufayli daromadidan ayrilgan fuqarolarni moddiy qoʻllab-quvvatlashda ovul va mahalla fuqarolar yigʻinlari masʼul xodimlari vaqt bilan hisoblashmay, fidoyilik bilan mehnat qildilar.
Shu bois hukumatimiz eʼtirofiga, “Mehr-saxovat” koʻkrak nishoniga loyiq koʻrilgan fuqarolar yigʻinlari raislari, Mahalla va oilani qoʻllab-quvvatlash boʻlimi xodimlariga ushbu koʻkrak nishonini topshirish marosimi ulkan tantanaga aylanib ketdi.
Oygul Rajabova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
