TUMANDAGI MAKTABLARGA 70 XIL NOMDAGI JAHON VA OʻZBEK ADABIYoTIGA DOIR KITOBLAR TARQATILDI

Kitob – qalblarni yorituvchi nur, tafakkurni boyituvchi xazina, kamolot choʻqqisi va maʼnaviy komillikka yetaklovchi hamrohdir. Kitob – insonning erkin fikrlashi, dunyoqarashining kengayishi, aqlan yetuk boʻlishi, maʼnaviyatining shakllanishida asosiy oʻrinni egallaydi. Kitob oʻqigan insonning aqli charxlanib, maʼnaviyati boyib, yetuklik sari ildamlayveradi. Shu sababli ham mamlakatimizda aholi, ayniqsa, yoshlarimizni kitob mutolaa qilishga, badiiy asarlar oʻqishga jalb qilish eng ustuvor vazifalardan biriga aylandi.

Joriy yilning 27-oktyabr sanasida tuman Xalq taʼlimi boʻlimiga qarashli 38-sonli umumtaʼlim maktabida tashkil qilingan marosim ham shu maqsadlarga yoʻnaltirildi. Shu kuni Xalq taʼlimi vazirligi bilan Oʻzbekiston Yozuvchilar Uyushmasi hamkorligida Amudaryo tumanidagi barcha umumtaʼlim maktablari uchun joʻnatilgan 70 xil nomdagi jahon va oʻzbek adabiyotining durdona asarlaridan iborat jami 2 ming 407 dona badiiy adabiyotlar karvoni tumanimizga yetib keldi.

Tumandagi 38-sonli umumtaʼlim maktabida mazkur kitoblarni maktablarga tarqatish marosimi tashkil qilindi. Ushbu tadbirda tumanimizdagi maktablardan koʻplab oʻqituvchi hamda oʻquvchilar ishtirok etdilar. Tuman Xalq taʼlimi boʻlimi masʼullari kitoblarni belgilangan miqdorda taqsimlab, maktablarga tarqatdilar. Bu kabi tadbirlar oʻquvchi-yoshlarimizda kitobga boʻlgan mehr hamda kitob oʻqishga qiziqishlarining yanada oshishiga xizmat qilishi, shubhasiz. 

Buyuk shoir va mutafakkir bobomiz Alisher Navoiy taʼbiri bilan aytganda: “Kitob - beminnat ustoz. Har daqiqa u bizni donishmandlarning bilim xazinasi bilan oshno eta oladi”. Darhaqiqat, kitobdan olinadigan bilim va maʼnaviy quvvatni hech bir manba bera olmaydi. Hatto bugungiday shiddat bilan rivojlanayotgan zamonda ham bu bebaho neʼmat oʻquvchining doimiy hamrohi boʻlib kelmoqda. Kitob oʻqigan oʻgʻil-qiz borki, fikri teran, oʻqishi namunali, saboqlarni oʻzlashtirishi taxsinga loyiq boʻladi. Qolaversa, badiiy adabiyot orqali oʻzini tutish, odob va axloq meʼyorlaridan hayotiy misollar orqali boxabar boʻlish, oʻrganish, ibrat olish mumkin. Shu tufayli ham hozirgi kunda yurtimizda kitob bilan bogʻliq masalalarga ham alohida eʼtibor qaratilgan. Yoshlarni barkamol avlod ruhida tarbiyalash uchun kitob oʻqish masalasi yoshlar orasida keng targʻib qilinmoqda.

Jamiyat hayotida ezgu qadriyat va anʼanalarni chuqur qaror toptirishga, xususan, xalqimiz, ayniqsa, yosh avlodning maʼnaviy-intellektual salohiyati, ongu tafakkuri va dunyoqarashini yuksaltirishda, ona Vatani, xalqiga muhabbat va sadoqat tuygʻusi bilan yashaydigan barkamol shaxsni tarbiyalashda beqiyos ahamiyatga ega boʻlgan kitobxonlik madaniyatini oshirishga ham alohida eʼtibor qaratilmoqda. Xususan, “Kitob mahsulotlarini nashr etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targʻib qilish boʻyicha kompleks chora-tadbirlar dasturi toʻgʻrisida” Oʻzbekiston Respublikasi Prezidenti Qarori bu boradagi ishlarni amalga oshirishda muhim dasturilamal boʻlmoqda.

Tuman Xalq taʼlimi boʻlimi tomonidan tarqatilgan kitoblar taʼlim muassasalarida tahsil olayotgan oʻquvchi-yoshlarimizning dunyoqarashini yanada kengaytirib, maʼnaviy dunyosini boyitishga xizmat qilishi, shubhasiz. Taʼlim maskanlariga ushbu kitoblar yetkazilganidan soʻng, oʻquvchilar oʻrtasida kitobxonlikni yanada targʻib qilish, ularda milliy va jahon adabiyoti durdonalarini mutolaa qilishga qiziqish uygʻotish maqsadida maktablarda “Kitob taqdimoti”, “Kitob haftaligi”, “Men sevgan adib” kabi tadbirlar tashkil etilishi rejalashtirilmoqda.

Charos Arslonova, tuman hokimligining Axborot xizmati rahbari.