KUNDALIK OZIQ-OVQAT MAHSULOTLARINING NARXI ASOSSIZ RAVIShDA KOʻTARILIShIGA YOʻL QOʻYILMAYDI

Oʻzbekiston Respublikasi Prezidenti boshchiligida shu yilning 16-oktyabr kuni oʻtkazilgan “Oziq-ovqat xavfsizligini taʼminlash va ichki bozorda narx-navo barqarorligini saqlash chora-tadbirlari” toʻgʻrisidagi videoselektor yigʻilishida belgilab berilgan topshiriqlardan kelib chiqib, mamlakatimizda aholiga kundalik isteʼmoli uchun zarur boʻlgan asosiy turdagi oziq-ovqat mahsulotlarini jon boshiga belgilangan meʼyorlarda, arzon, sifatli hamda uzluksiz yetkazilishini taʼminlash, narx-navo barqarorligini saqlash kabilarga alohida eʼtibor qaratilmoqda. Shu maqsadda tegishli vazirliklar, tumanlar hokimliklari hamkorligida aholi sonidan kelib chiqib, kundalik ehtiyoj uchun zarur oziq-ovqat hamda qishloq xoʻjalik mahsulotlarining bozorlarda sotilishi nazoratga olinib, narxlarning barqarorligini saqlash choralari koʻrilmoqda. Bu borada tumanimiz bozorlarida ham maʼlum tartib-qoidalarga amal qilish choralari koʻrilmoqda. Yaʼni, fermer xoʻjaliklari, dehqon xoʻjaliklari va tomorqa yer egalari tomonidan yetishtirilgan qishloq xoʻjalik mahsulotlarini birinchi navbatda tumanimiz aholisiga yetkazib berish va sotish  uchun dehqon bozorlariga olib chiqilishi taʼminlanmoqda.
Oʻzbekiston Respublikasi Vazirlar Mahkamasi va Bosh Prokuratura huzuridagi Iqtisodiy jinoyatlarga qarshi kurashish Departamenti Qoraqalpogʻiston Respublikasi Boshqarmasining tegishli xatlariga koʻra “Qoraqalpogʻiston Respublikasi aholisining ijtimoiy ahamiyatga ega oziq-ovqat va qishloq xoʻjaligi mahsulotlariga boʻlgan ehtiyojini hamda narx-navo barqarorligini taʼminlash toʻgʻrisida”gi Qoraqalpogʻiston Respublikasi Vazirlar Kengashi qarori ijrosini taʼminlash maqsadida Mangʻit Dehqon bozorida asosiy turdagi oziq-ovqat mahsulotlari bilan savdo qiluvchi tadbirkorlik subʼektlari, dehqon xoʻjaliklari hamda tomorqa yer egalariga zarur tushunchalar berilib borilmoqda.
Qarorga muvofiq ayni kunlarda Mangʻit Dehqon bozorida oziq-ovqat va qishloq xoʻjaligi mahsulotlari fermer, dehqon hamda shaxsiy tomorqa yer egalari tomonidan yetishtirilgan oziq-ovqat mahsulotlari qoʻlma-qoʻl oʻtib, bahosi oʻsishiga yoʻl qoʻyilmasdan toʻgʻridan-toʻgʻri sotilishi  ustidan nazorat oʻrnatildi. Bozorda sanitariya, veterinariya qoidalariga rioya etilishi, tozalik, mahsulotlarning sifati, isteʼmolga yaroqliligini oʻrganish ishlari doimiy yoʻlga qoʻyilgan. Bu borada boʻlimimiz xodimlari tuman sanitariya-epidemologik osoyishtalik markazi va tuman Veterinariya boʻlimi bilan hamkorlikda ish olib borishmoqda.
Aholini arzon narxdagi oziq-ovqat va qishloq xoʻjaligi mahsulotlari bilan taʼminlash maqsadida tumandagi fermer va dehqon xoʻjaliklari bilan shartnomalar tuzilib, ushbu mahsulotlarning arzon narxlarda sotilishini taʼminlash maqsadida 20 ta savdo oʻrniga ega boʻlgan yarmarka tashkil etildi. Mazkur yarmarkada kundalik ehtiyoj uchun zarur boʻlgan yogʻ, shakar, makaron, tovuq goʻshti va meva-chevalar arzon narxlarda sotilmoqda. Shuningdek, tuman xokimligi tomonidan tasdiqlangan roʻyxat asosida tumandagi chorvachilik fermer xoʻjaliklari hamda goʻsht mahsulotlari sotish bilan shugʻullanuvchi yakka tartibdagi tadbirkorlar tomonidan aholining goʻshtga boʻlgan ehtiyojini maʼlum miqdorda taʼminlash borasida yirik shoxli qoramollar soʻyilib, maxsus rastalarda har bir kilogrammi 45000 soʻmdan, kartoshka 2500-3000 soʻmdan, tuxum 900 soʻmdan sotilmoqda.
 Tuman davlat Soliq inspektsiyasi bilan birgalikda bozor hududida davlat roʻyxatidan oʻtmasdan, noqonuniy olib sotarlik bilan shugʻullanayotgan shaxslar aniqlanib, belgilangan tartibda soliqqa tortilmoqda hamda narxlarning oʻsishiga olib keladigan omillar birma-bir oʻrganilib, bartaraf etish choralari koʻrilayotir. Jumladan, Oʻzbekiston tovar xom-ashyo birjasi savdolaridagi oziq-ovqat mahsulotlari, yaʼni oʻsimlik yogʻi, shakar, un mahsulotlari narxlari toʻgʻrisida maʼlumotlar olinib, oʻrganilmoqda. Bundan maqsad, tadbirkorlik subʼektlari tomonidan birja savdolarida sotib olingan oziq-ovqat mahsulotlari noqonuniy olib sotarlik bilan shugʻullanayotgan shaxslar qoʻllariga oʻtib, narx koʻtarilib ketmasligi choralarini koʻrishdir.
Savdo yarmarkasi hududida sotuvchilar va xaridorlar uchun qulay sharoit yaratish maqsadida bostirma qilinib, peshtaxta oʻrnatildi. Ushbu savdo oʻrinlarida va bozorda narxlarning barqarorligini taʼminlash maqsadida doimiy nazorat olib borilmoqda. Yurtdoshlarimizning kundalik hayotidagi zarur boʻlgan oziq-ovqat va qishloq xoʻjaligi mahsulotlariga boʻlgan ehtiyojlari qoplanishiga oʻz hissamizni qoʻshishni doimiy burchimiz deb bilamiz.

Zafar SABUROV, Bosh Prokuratura huzuridagi Iqtisodiy jinoyatlarga

qarshi kurashish  Departamentining tuman boʻlimi boshligʻi.