HUJJATLARNI OʻZ VAQTIDA QAYD ETISh – ORTIQChA OVORAGARChILIKNING OLDINI OLADI

Hayot soʻqmoqlari doimo ham tekis boʻlavermaydi. Inson baʼzan oʻziga bogʻliq boʻlmagan holda ham turli muammolarga duch kelishi yoki baʼzi holatlarga eʼtiborsizlik qilishi mumkin. Natijada yangi dunyoga kelgan chaqaloq, yo dunyodan oʻtgan insonning oʻlimi oʻz vaqtida qayd etilmasdan qolib ketish holatlari ham sodir boʻladi.

Oʻzbekiston Respublikasi Prezidentining 2018-yil 12-iyunda qabul qilgan 3785-sonli Qarori ijrosini taʼminlash uchun tuman hokimining 2018-yil 19-iyun kungi 418-sonli qaroriga muvofiq tumanimizda qayd etilmagan tugʻilganlik, oʻlim holatlarini aniqlash va toʻliq xatlovdan oʻtkazish, aniqlangan tugʻilganlik va oʻlim holatlarining qonun hujjatlariga muvofiq manzilli qayd etilishini taʼminlash maqsadida tuman komissiyasi tuzildi.

Komissiya aʼzolari tomonidan avvalo tumanimiz ovul va mahallalari kesimida aholi, xonadonlar va oilalar soni aniqlanib, manzilli roʻyxat shakllantirildi.

Shuningdek, vaqtida qayd etilmagan tugʻilganlik va oʻlim holatlarini qayd etish uchun hujjatlar yigʻma jildlarini toʻplashda fuqarolarga huquqiy maslahatlar, yoʻl-yoʻriqlar berilmoqda.

Yigʻma jildlar “Fuqarolik holati dalolatnomalarini qayd etish qoidalari” talablari asosida toʻplanib, rasmiylashtirib borilmoqda. Natijada 2018-yil davomida qayd etilmagan 11 ta nikoh, 84 ta tugʻilganlik va 6 ta oʻlim holatlari qayd etilib, guvohnomalar rasmiylashtirildi. 2019-yil mobaynida esa qayd etilmagan 122 ta nikoh, 29 ta oʻlim holatlari yuzasidan amaliy yordamlar, huquqiy maslahatlar berilib, zarur hujjatlar tayyorlandi va qonun hujjatlariga muvofiq rasmiylashtirilib, guvohnomalar berildi.

Bu borada ish olib borayotgan tuman komissiyasi tugʻilganlik haqidagi guvohnomasi mavjud boʻlmagan bolalarni aniiqlashga alohida eʼtibor qaratmoqda. Boisi, tugʻilganlikning qayd etilishi bola huquqlari roʻyobga chiqarilishining huquqiy asosidir.

Shu yoʻnalishda olib borilgan saʼy-harakatlar natijasida 2019-yilda oʻz vaqtida qayd etilmagan 307 nafar bolalarga tugʻilganlik toʻgʻrisidagi guvohnomalar rasmiylashtirildi. 2020-yilning  ilk toʻrt oyida esa muddatida qayd etilmagan 11 nafar bolaning tugʻilganlik, 3 fuqaroning oʻlim guvohnomalari rasmiylashtirildi.

Bu boradagi ishlar davom etmoqda. Shu bilan birga aholi orasida, korxona-tashkilotlar xodimlari orasida tugʻilganlik, nikoh va oʻlim holatlarini oʻz vaqtida qayd etish lozimligi, qayd etilmagan taqdirda kelgusida koʻpgina muammolar yuzaga kelishi haqida tushuntirish-targʻibot ishlari olib borilayapti.

Nabira UNGAROVA, tuman FHDYo boʻlimi inspektori.