TUMAN DAVLAT XIZMATLARI MARKAZI SAMARALI FAOLIYaT YuRITMOQDA

Bugungi kunda mamlakatimizda davlat xizmatlarini koʻrsatish tizimi jadallik bilan rivojlanib borilmoqda. Joylarda davlat xizmatlari markazlari yangi zamonaviy binolarga ega boʻlib, fuqarolar hamda ishchi-xodimlar uchun keng sharoitlar yaratilgani ham fikrimizning isbotidir.

Barcha qulayliklarga, sharoitlarga ega boʻlgan Amudaryo tumani Davlat xizmatlari markazi bugungi kunda fuqarolarga davlat xizmatlarini koʻrsatish yoʻlida samarali faoliyat olib bormoqda.

Maʼlumot tariqasida aytish joizki, mazkur markaz tomonidan 2020-yilning birinchi yarmida yangi roʻyxat va qayta roʻyxatda oʻtkazish boʻyicha jami koʻrsatilgan davlat xizmatlari soni 25 ming 608 tani, undan tashqari koʻrsatilgan jami xizmatlar soni 24 ming 991 tani tashkil qiladi. Shuningdek, shu davrga qadar jami 538 nafar jismoniy va yuridik shaxslar davlat roʻyxatidan oʻtkazilgan boʻlib, shundan bittasi xorijiy korxona, 129 tasi yuridik shaxslar, 408 nafari yakka tartibdagi tadbirkorlar hisoblanadi. Qolaversa, joriy yilning shu davri holatiga koʻra, tuman Davlat xizmatlari mazkazi tomonidan 79 ta jismoniy va yuridik shaxslar qayta roʻyxatdan oʻtkazilgan boʻlib, shundan 33 tasi yuridik shaxslar hamda 46 nafari yakka tartibdagi tadbirkorlardir.

Shu oʻrinda aytish joizki, mamlakatimizda davlat xizmatlarini koʻrsatishda jismoniy va yuridik shaxslarga har tomonlama qulay shart-sharoitlarni taʼminlashga katta eʼtibor brilmoqda. Shu maqsadda, qolaversa, aholining maʼlumotnoma soʻrab, qimmatli vaqti turli idoralarga sarson boʻlishlarining oldini olish, bunda “Fuqarolar emas, hujjatlar harakatlanadi” tamoyilini amalda roʻyobga chiqarish va eng muhimi, xalqimizning davlat organlari va ular tomonidan koʻrsatiladigan xizmatlarga boʻlgan ishonchini qozonish maqsadida Oʻzbekiston Respublikasi Prezidentining 2017-yil 12-dekabrda “Aholiga davlat xizmatlari koʻrsatishning milliy tizimini tubdan isloh qilish chora-tadbirlari toʻgʻrisida”gi Farmoni bilan Adliya vazirligi huzurida Davlat xizmatlari agentligi tashkil etildi.

Shuningdek, Yagona markazlarning tumanlar va shaharlar hokimliklari tuzilmasidan Oʻzbekiston Respublikasi Adliya vazirligi tasarrufiga oʻtkazilishi mazkur sohani rivojlantirish boʻyicha asosiy qadam boʻlib, vertikal boshqaruvni shakllantirish, ularning samarali faoliyatini tashkil etish imkonini berdi. 2018-yil 1-yanvardan ular Davlat xizmatlari markazlariga aylantirildi.

Albatta, ushbu markazlar aholiga bir qator qulayliklar yaratdi. Birinchi navbatda jismoniy va yuridik shaxslarning idoralararo sarson boʻlishi va ortiqcha vaqt sarflashlariga chek qoʻyildi. Endilikda fuqarolar emas, balki hujjatlar harakatlanishi asosiy mezon sifatida belgilandi. Koʻrsatilayotgan davlat xizmatlari soni bosqichma-bosqich amalga oshirib borilmoqda.

Amudaryo tuman Davlat xizmatlari markazi tomonidan shuningdek, jismoniy va yuridik shaxslarga sayyor tartibda ham xizmatlar koʻrsatilmoqda. Haftaning shanba va yakshanba kunlari tumanning olis hududlaridagi ovul, mahalla fuqarolar yigʻinlari, taʼlim maskanlarida sayyor uchrashuvlar, targʻibotlar hamda sayyor roʻyxatdan oʻtkazish ishlari muntazam amalga oshirib kelinmoqda. Xususan, joriy yilning shu davriga qadar sayyor tartibda koʻrsatilgan davlat xizmatlari soni 1 ming 127 ta boʻlib, shu tartibda davlat roʻyxatidan oʻtkazilgan tadbirkorlik subʼektlari soni 31 tani tashkil qildi.

Markazda jismoniy va yuridik shaxslarga davlat xizmati koʻrsatish namunali yoʻlga qoʻyilgan, murojaatchilar uchun qulay sharoitlar yaratilgan. Ijtimoiy masofani saqlagan holda tartibli navbat joriy etilgan. Murojaatchilar markazda oʻrnatilgan maxsus infokioskda elektron raqamli imzo kaliti orqali bemalol foydalanish, kerakli maʼlumotnomani esa shu infokioskning oʻzida chop qilib olish imkoniyatiga ega. Markazga kelgan fuqarolar bu yerda yaratilgan qulayliklar, sharoitlar va koʻrsatilayotgan xizmatlardan mamnun.

Tuman hokimligining Axborot xizmati.