AMUDARYoDA KASB-HUNAR MAKTABLARI TAShKIL QILINMOQDA

Yurtimizda taʼlim sifatini oshirish, jahon standartlariga javob beradigan malakali kadrlar tayyorlash taʼlim sifatini baholashning xalqaro standartlarini joriy etish, innovatsion ilm-fan yutuqlarini amaliyotga tatbiq etishning samarali mexanizmlarini yaratish orqali mamlakatda taʼlim tizimini isloh qilish boʻyicha izchil ishlar amalga oshirilmoqda.

Davlatimiz rahbari shu maqsadlarga yoʻnaltirilgan “Professional taʼlim tizimini yanada takomillashtirishga doir qoʻshimcha chora-tadbirlar toʻgʻrisida”gi Farmonni imzoladi.

Mazkur Farmon bilan 2020-2021 oʻquv yilidan boshlab Oʻzbekiston Respublikasida taʼlimning xalqaro standart tasniflagichi darajalari bilan uygʻunlashgan yangi boshlangʻich, oʻrta va oʻrta maxsus professional taʼlim tizimi hamda tabaqalashtirilgan taʼlim dasturlari joriy etiladigan taʼlim muassasalari tarmogʻi tashkil etilishi belgilandi.

Shuningdek, xalqaro tasniflagichning 3-darajasiga mos keluvchi taʼlim dasturlari asosida 9-sinf bitiruvchilarini ijtimoiy qoʻllab-quvvatlashga qaratilgan boshlangʻich professional taʼlim bosqichida kadrlar tayyorlaydigan taʼlim muassasalari roʻyxati shakllantirildi. Tuman va shaharlar negizida shakllantirilgan roʻyxat asosida tumandagi Qipchoq agrobiznes kolleji 1-sonli kasb-hunar maktabiga, Amudaryo xizmat koʻrsatish va servis kasb-hunar kolleji 2-sonli kasb-hunar maktabiga oʻzgartirilishi belgilab berildi.

Qipchoq shaharchasi hududida joylashgan 1-sonli kasb-hunar maktabiga 2020-2021 oʻquv yilida 180 nafar oʻquvchi qabul qilish rejalashtirilgan. Ushbu kasb-hunar maktabida joriy  oʻquv yili uchun 6 ta mutaxassislik - avtomobillarni taʼmirlash chilangari, payvandlovchi (elekrtgaz payvandlash ishlari), tikuvchi,  issiqxona va parnik xoʻjaligi laboranti, asalarichi, qishloq xoʻjaligi mashinalarini taʼmirlash chilangari yoʻnalishlari boʻyicha kadrlar tayyorlanadi.

Yangi tashkil etilayotgan 2-sonli kasb-hunar maktabiga esa 2020-2021 oʻquv yili uchun 20-iyundan boshlab, 7 ta mutaxassislik boʻyicha, har bir mutaxassislik uchun 30 nafardan 9-sinf bitiruvchilari oʻqishga qabul qilinadi. Ushbu kasb-hunar maktabida avtomobillarni taʼmirlash chilangari, yakka tartibdagi kiyim tikuvchisi, payvandlovchi (elektrgaz-payvandlash ishlari), tikuvchi, gaz va suv isteʼmoli nazoratchi operatori, oshpaz, qandolatchi yoʻnalishlarida malakali mutaxassislarni tayyorlash maqsad qilingan. Barcha yoʻnalishlar boʻyicha har biriga 30 nafardan 9-sinf bitiruvchilari qabul qilinishi rejalashtirilgan 2-sonli kasb-hunar maktabida ham ayni paytda qabul jarayoniga tayyorgarlik koʻrilmoqda.

Shu oʻrinda maʼlumot tariqasida aytish joizki, tashkil qilinayotgan kasb-hunar maktablaridagi oʻqish – kadrlar tayyorlash umumtaʼlim muassasalarining 9-sinf bitiruvchilari hisobidan shakllantirilgan guruhlarda 2 yillik umumtaʼlim va mutaxassislik fanlarining integratsiyalashgan dasturlari asosida kunduzgi taʼlim shaklida amalga oshiriladi.

Shuningdek, taʼlim olayotgan oʻquvchilar Oʻzbekiston Respublikasi Davlat byudjeti hisobidan bazaviy hisoblash miqdorining bir baravari miqdorida oylik stipendiya hamda uch mahal ovqat bilan taʼminlanadi. Bunda kasb-hunar maktablari oʻquvchilarni uch mahal ovqat bilan taʼminlash yoki mazkur ovqat pullarini ularga toʻlab berish huquqiga ega.

Charos Arslonova, tuman hokimligining Axborot xizmati.