Xalq qabulxonasi karantinda aholi murojaatlarini masofadan qabul qilib, hal etilishiga koʻmaklashmoqda

Yurtimizda bugungi pandemiya davrida barcha ishxonalarda ish jarayonlari karantin qoidalariga qatʼiy amal qilgan holda tashkil qilinmoqda. Shu jumladan, karantin sharoitida viloyat, tuman, shahar Xalq qabulxonalarida fuqarolardan kelib tushayotgan murojaatlarni qabul qilish uchun “onlayn konferentsiyalar” va “ishonch telefonlari” tashkil qilinib, barcha hududdagi Qabulxonalar binosi oldida murojaatlar uchun maxsus qutilar oʻrnatildi.

Mamlakatimiz aholisiga bugungi vaziyat sababli uydan chiqmagan holda telefon orqali ham Xalq qabulxonalariga murojaat qilishiga sharoit yaratildi. Fuqarolarga yanada qulay boʻlishi uchun qabulxonaga kelgan murojaatchilar bilan videokonferentsaloqa tizimi vositasida muloqot yoʻlga qoʻyildi. Qabulxonaga kelgan har bir murojaatchi tibbiyot xodimlari tomonidan tekshiruvdan oʻtkazilib, zarur dezinfektsiya ishlari olib borilmoqda.

Shuningdek, tumandagi Xalq qabulxonasida ham karantin davrida fuqarolar murojaatlarini elektron pochta qutisi hamda telefon orqali bildirishlari uchun barcha sharoitlar yaratilib, bu boradagi ishlar tartib-qoidalarga amal qilingan holda tashkil qilinmoqda.

Karantin eʼlon qilinganidan shu kunga qadar tuman Xalq qabulxonasiga oziq-ovqat mahsulotlari, dori-darmon, moddiy yordamga muhtojlik va shu kabi karantin bilan bogʻliq boʻlgan jami 15 ta murojaatlar kelib tushgan boʻlib, ushbu murojaatlar tegishli idoralar bilan hamkorlikda ijobiy hal qilindi.

  Shuningdek, qabulxona tomonidan aholining ijtimoiy himoyaga muhtoj qatlamini qoʻllab-quvvatlash, ehtiyojmand oilalarga har tomonlama koʻmak berish borasida ham samarali ishlar qilinmoqda. Tumandagi nogironligi boʻlgan va ijtimoiy koʻmakka muhtoj fuqarolarning pandemiya davrida ijtimoiy-iqtisodiy ahvolini yaxshilash maqsadida 25 nafar fuqarolarning yashash xonadonlariga borib, turmush tarzi oʻrganib chiqildi hamda un, kartoshka, oʻsimlik yogʻi va boshqa turdagi oziq-ovqat mahsulotlari yetkazib berildi. Xalq qabulxonasida karantingacha boʻlgan davrda kelib tushgan murojaatlar asosida ijtimoiy himoyaga muhtoj 89 ta oilalarning holidan habar olinib, xonadonlarga oziq-ovqat mahsulotlari yetkazib berildi.

Qolaversa, tuman Mahalla va oilani qoʻllab quvvatlash boʻlimiga 1197 ishonch telefoni orqali jami 793 ta murojaatlar kelib tushgan boʻlsa, shundan 628 ta oilalarga, oziq-ovqat mahsulotlari berilib, qolgan 165 nafar fuqarolarning oilaviy sharoiti oʻrganib chiqilib, roʻyxat asosida oziq-ovqat mahsulotlari bilan taʼminlash ishlari davom etmoqda. Mahallalar fuqarolar yigʻinlari raislarining tavsiyalariga asosan 305 ta oilalarga oziq-ovqat mahsulotlari berilgan.

Taʼkidlash joizki, Oʻzbekiston Respublikasi Prezidentining tumandagi Xalq qabulxonasi bilan mahalla fuqarolar yigʻinlari oʻrtasida oʻrnatilgan doimiy onlayn muloqot hududlardagi mavjud real holatni muntazam monitoring qilib borish, murojaatlarni tezkor koʻrib chiqish va hal qilish uchun masʼullarni belgilash hamda ijrosini nazorat qilish imkonini bermoqda. Qabulxona tomonidan band boʻlmagan aholining bandligini taʼminlash, boʻsh ish oʻrinlariga ishsiz fuqarolarni joylashtirish borasida ham tuman Bandlikka koʻmaklashish va aholini ijtimoiy muhofaza qilish markazi bilan hamkorlikda samarali ishlar qilmoqda.

Charos Arslonova, tuman hokimligining Axborot xizmati.