Qipchoq ovuliga yangi transformator oʻrnatilib, aholi muammosi hal qilindi

Butun mamlakatimizda boʻlgani kabi tumanimizda ham aholi murojaatlarini oʻrganish hamda ijobiy hal etishga alohida eʼtibor qaratilmoqda. Tegishli masʼullar qatorida Xalq deputatlari tuman Kengashi deputatlari ham chekka hududlarga tashrif buyurib, aholi bilan uchrashuvlar oʻtkazishmoqda va ularning yashash sharoitini, qiynayotgan muammolarni oʻrganishmoqda. Joyida bartaraf etib, toʻgʻri yechim topishga, xalqning ogʻirini yengil qilishga harakat qilishmoqda.

Joriy yilning 25-fevral kuni tumanimizdagi Qipchoq ovuli hududida xalq deputatlari tuman Kengashi deputati B.Baltabayev ishtirokida aholi bilan uchrashuv oʻtkazilgan edi. Deputat va saylovchilar uchrashuvida hudud aholisini qiynab kelayotgan qator muammolar toʻgʻrisida murojaatlar tinglandi. Jumladan, uchrashuvda fuqarolar tomonidan Qipchoq ovuli hududidagi Qayrovul va Koʻkchi aholi punktlarida elektr energiyasi uskunalarining nosozligi hamda yangi elektr uskunalariga ehtiyoj borligi  yuzasidan murojaat kelib tushgan edi. Deputat soʻroviga asosan mazkur muammoni mutasaddilar oʻrganishdi hamda tuman elektr korxonasi bilan hamkorlikda hal qilishdi.

Shu oʻrinda aytish joizki, davlatimiz rahbarining «Insonlarning dardu tashvishlarini oʻylab yashash – odamiylikning eng oliy mezonidir», «Xalq davlat idoralariga emas, davlat idoralari xalqimizga xizmat qilishi kerak», «Xalqimiz oʻz hayotida ijobiy oʻzgarishlarni ertaga emas, uzoq kelajakda emas, aynan bugun koʻrishi kerak» kabi el-yurtimiz qalbi va ongidan chuqur joy olgan soʻzlari bugun mamlakatimizda barcha soha, tarmoqlarda amalga oshirilayotgan tub oʻzgarish va islohotlarni harakatlantiruvchi qudratli kuchga, ularning gʻoyaviy oʻzagiga aylandi. Xalqimizning hayotiy talab va ehtiyojlarini taʼminlash, odamlarimizni rozi qilish yoʻlidagi ishlar aynan ana shunday ezgu gʻoyalar asosida olib borilib, tobora yangi maʼno va mazmun bilan boyib bormoqda.

Insonlarni rozi qilish, ularning mushkulini oson qilish hamda Oʻzbekiston Pespublikasi Prezidentining 2016-yil 23-noyabrdagi “Past kuchlanishli elektr uskunalarini yaxshilash va modernizatsiya qilish toʻgʻrisida”gi Qarori ijrosini taʼminlash, isteʼmolchilarni sifatli va uzluksiz elektr energiyasi bilan taʼminlash maqsadida deputatlar tuman elektr taʼminoti korxonasi bilan hamkorlikda Qipchoq ovuli hududidagi xayrli ishni amalga oshirdilar. Hududdagi Koʻkchi va Qayrovul aholi punktlarida aholining elektr energiyasi bilan bogʻliq muammolarini bartaraf qilish maqsadida yangi elektr yetkazib beruvchi uskunalar oʻrnatildi.

Shu maqsadda Qipchoq ovuli Koʻkchi va Qayrovul aholi punktlari hududiga 20 ta beton ustun qoʻyildi. Koʻkchi aholi punktida 75 mln. soʻm mablagʻ ajratilib, evaziga kuchlanishi 10 kvt.ga ega, uzunligi 420 metr boʻlgan havo liniyasi tortilib, quvvati 160 kvt.ga ega boʻlgan yangi zamonaviy transformator oʻrnatildi. Qayrovul aholi punktida esa 70 mln. soʻm mablagʻ evaziga kuchlanishi 10 kvt.ga ega, uzunligi 283 metr boʻlgan havo liniyasi tortildi va quvvati 160 kvt.ga ega boʻlgan yangi, zamonaviy transformator oʻrnatildi.

Har ikkala ovul fuqarolari yashash sharoitlarini yanada yaxshilash maqsadida amalga oshirilgan bu kabi taʼmirlash, obodonlashtirish ishlaridan nihoyatda mamnun boʻldilar. Koʻpdan beri aholini qiynab, tashvishga solib kelayotgan mazkur muammoni bartaraf etishda koʻmaklashgan deputatlarga, masʼullarga va tuman Elektr taʼminoti korxonasiga oʻz minnatdorchiliklarini bildirdilar.

Aholi muammolarini joyida hal qilish insonlarning tinch va farovon hayot kechirishini taʼminlash bilan birgalikda xalqning davlatga boʻlgan ishonchini yanada mustahkamlashga xizmat qilishi shubhasiz.

Charos Arslonova, tuman hokimligining Axborot xizmati rahbari.