Tuman hokimligi xodimlari boshlangʻich kasaba uyushmasi tashkilotining hisobot-saylov yigʻilishi boʻlib oʻtdi

Joriy yil 12-mart sanasida tuman hokimligining majlislar zalida hokimlik xodimlari boshlangʻich kasaba uyushmasi tashkilotining hisobot-saylov yigʻilishi boʻlib oʻtdi. Yigʻilishda korxona boshlangʻich kasaba uyushmasi tashkilotidagi aʼzolari Oʻzbekiston kasaba uyushmalari Federatsiyasining Qoraqalpogʻiston kasaba uyushma tashkilotlari birlashmasi Kengashi va Oʻzbekiston davlat muassasalari va jamoat xizmati xodimlari kasaba uyushmasi tuman Kengashi aʼzolari ishtirok etishdi.

Mazkur yigʻilish kotibligiga kasaba uyushma aʼzosi Maʼmurjon Tajiboyevning nomzodi maʼqullandi. Soʻngra yigʻilish kun tartibidagi masalalar muhokama qilindi.

Hisobot-saylov yigʻilishi kun tartibidagi birinchi masala – Amudaryo tuman hokimlik xodimlari kasaba uyushmasi qoʻmitasining 2015-yil fevralidan 2020-yil fevraligacha boʻlgan davrdagi faoliyati toʻgʻrisidagi masala yuzasidan qoʻmita raisi Maqsud Saʼdullayevning hisoboti tinglandi.

Mazkur hisobot yuzasidan tuman hokimining birinchi oʻrinbosari Maʼmurjon Temirboyev fikr bildirdi. U oʻz soʻzida oʻtgan 5-yil davomida ishchi-xodimlarni har tomonlama qoʻllab-quvvatlash, mehnatni muhofaza qilish, xodimlarga barcha sharoitlarni yaratish borasida samarali ishlar qilinganligini aytib oʻtdi. Undan tashqari, shu davr oraligʻida davriy matbuot organlari nashrlariga obuna boʻlinganligi, xodimlarning huquqiy savodini oshirish yuzasidan maʼmuriyat bilan birgalikda tegishli ishlarning amalga oshirilgani, hokimlikdagi har bir xodimning kompyuter bilan taʼminlanganligini taʼkidladi.

Shuningdek, tuman hududidagi fuqarolar yigʻinlarining barchasida kompyuter va zaruriy adabiyotlar yetarli ekanligi, umumxalq bayramlari va boshqa tadbirlarda kasaba uyushma qoʻmitasi tomonidan amalga oshiriladigan tashkiliy ishlar toʻgʻri yoʻlga qoʻyilganligi toʻgʻrisida maʼlumot berdi. Fuqarolar yigʻinlarida faoliyat koʻrsatayotgan masʼullarga har tomonlama gʻamxoʻrliklar qilinganini, mehnat taʼtillarining vaqtida berilgani, taʼtilga chiqish oldidan oylik maoshi va taʼtil hamda mukofot pullari, bir yoʻla toʻlanadigan moddiy yordam pullarining vaqtida berib borilganligini alohida eʼtirof etdi.

Hisobot yuzasidan majlis ishtirokchilarining takliflari tinglandi hamda tegishli qaror qabul qilindi.

Shundan soʻng, tuman hokimligi xodimlari kasaba uyushmasi qoʻmitasi aʼzolari hamda raisligiga taklif etilgan nomzodlarni saylash uchun ovoz berish taklif etildi. Kasaba uyushmasi raisi lavozimiga Maqsud Saʼdullayevning nomzodi bir ovozdan maʼqullandi hamda u tuman hokimligi xodimlari kasaba uyushma qoʻmitasining raisi etib saylandi.

Yigʻilish kun tartibidagi navbatdagi Oʻzbekiston davlat muassasalari va jamoat xizmati xodimlari kasaba uyushmasi Amudaryo tuman Kengashi VI konferentsiyasiga delegatlar saylash masalasi koʻrib chiqildi. Ushbu masala yuzasidan belgilangan meʼyorga muvofiq konferentsiyaga 17 nafar delegatning nomzodi ovoz berish orqali tasdiqlandi hamda nomzodi koʻrsatilgan 17 nafar kasaba uyushma aʼzolari delegat etib saylandi.

Yigʻilishda soʻzga chiqqanlar yangidan saylangan kasaba uyushma qoʻmitasiga mehnat qonunlariga rioya qilish, maʼmuriyat bilan birgalikda ishchi-xodimlarni sogʻlomlashtirish, ularning ijtimoiy muhofazasini taʼminlashga alohida eʼtibor qaratish kerakligini taʼkidlashdi. Shu qatorda kasaba uyushma aʼzolarining madaniy tadbirlarda qatnashishini yaxshilash, madaniy-ommaviy, sport musobaqalari oʻtkazish, ularni sayohatga olib chiqish, xodimlarning dam olishlarini tashkil etish borasidagi ishlarni yanada kuchaytirish lozimligi qayd etib oʻtildi.

Charos Arslonova, tuman hokimligining Axborot xizmati rahbari.