“Yashil Oʻzbekiston – yashil mahallam!” shiori ostida tadbirlar oʻtkazildi

Barcha zamonlarda ham xalqimiz oʻzaro mehr-oqibat, hamjihatlik bilan yashab, oʻz hayotiga oid quvonch-u tashvishlarini birgalikda baham koʻrishgan. Xalqimizga xos boʻlgan bu bobomeros qadriyat, ayniqsa, bahorda Navroʻz arafasida yanada yaqqolroq namoyon boʻladi.

Qipchoq shaharchasi hududida joylashgan 11-sonli umumtaʼlim maktabi oʻqituvchilar va oʻquvchilar jamoasi uchun bayram arafasidagi kunlar haqiqiy maʼnodagi Navroʻzona qadriyatlar tantanasiga aylandi.

13-mart sanasida maktabning Beshtom mahallasi hududidagi filialida boʻlib oʻtgan bayram tadbirida mahalla faollari, oʻquvchilarning ota-onalari, filial pedagogika jamoasi ishtirok etishdi. Shu kuni maktab filiali binosi atrofi “Yashil Oʻzbekiston, yashil mahallam!” shiori ostida obodonlashtirilib, bayramona bezatildi. Hamjihatlikda ezgu niyatlar bilan bino atrofiga manzarali daraxt koʻchatlari ekildi. Ushbu xayrli ishda maktab oʻquvchilari ham faol qatnashdilar, koʻchatlar uchun chuqurchalar qazib, suv keltirdilar.

Tadbirda oʻqituvchilar va ota-onalar rahbarligida oʻquvchilar qadimiy taomimiz boʻlgan “Navroʻz goʻja” pishirish sanʼatini ham oʻrgandilar. Taomni tayyorlashda ishlatiladigan doshqozon, oʻtin, keli-kelisop va boshqa zarur narsalarni taxt qilishda barchasi birdamlikda koʻtarinki kayfiyat bilan qatnashdilar. Bahorning yetti xil neʼmati qoʻshib pishirilgan “Navroʻz goʻja” dasturxonlarga tortilishidan avval Beshtom mahalla fuqarolar yigʻini raisi Ozod Siytimov barchani elimizni yashil libosga burkab kirib keladigan Navroʻz ayyomi bilan tabrikladi.

Maktabning pedagoglar jamoasi ham barchani bayram bilan qutlab, shu kunlarda eng olis qishloq hamda ovullarda ham koʻchat ekish, obodonlashtirish va koʻkalamzorlashtirish ishlari avjiga chiqayotganligini, bemorlar, yolgʻizlar  holidan xabar olinayotganligini, mehr-u saxovat ulashilayotganini soʻzlashdi. Shuningdek, filial oʻquvchilariga sifatli taʼlim-tarbiya berish borasida yaratilayotgan imkoniyatlar, shart-sharoitlar, oʻqituvchilarga davlatimiz tomonidan koʻrsatilayotgan gʻamxoʻrliklar, erishilayotgan yutuqlar haqida ham gapirib oʻtdilar. Tadbirda ishtirok etayotgan ota-onalar, mahalla faollari ham Navroʻzi olam oʻlkamizga qadam qoʻyishi bilan hamma yon-atrofdagi mavjudotning uygʻonishi, kurtaklar va gul-chechaklar ochilishi, yer-u koʻk bagʻrida yuz berayotgan oʻzgarishlardan, bahor nafasidan bahramand boʻlishini, ona-tabiatimizning uzviy va ajralmas bir qismi ekanini chuqur his qilishini koʻtarinki ruh bilan ifoda etdilar.

Shundan soʻng, xushtaʼm bahor taomi – “Navroʻz goʻjasi” dasturxonlarga tortilib, bayram ishtirokchilarining barchasi bu xushxoʻr taomdan bahramand boʻldilar.

Bayram tomoshalari Navroʻzning mazmun-mohiyati, qadr-qimmatini taʼriflovchi, milliy urf-odatlarimizni ulugʻlovchi zavqli raqslar va kuy-qoʻshiqlar bilan davom etdi. Maktab oʻquvchilari ishtirokida tayyorlangan  badiiy-musiqiy dasturda  bahor va Navroʻz, mehnat hamda tinchlik, mustaqillikni madh etuvchi kuy-qoʻshiqlar yangradi.

Shu kuni beshtomlik bolalar milliy oʻyinlarni ham oʻynadilar: chillak, beshtosh, arqon tortishuv, qoʻl kuchini sinash, oq terakmi koʻk terak kabi oʻyinlar barchaga xush kayfiyat bagʻishladi.

R. Yoʻldosheva.