“Tabiat va biz” deb nomlangan tadbir oʻquvchilarning tabiiy fanlarga boʻlgan qiziqishlarini yanada oshirdi

Mamlakatimizda umumiy oʻrta taʼlim maktablarida mart oyi boshida tabiiy, yaʼni ximiya, biologiya, fizika fanlar oyligi deya belgilanganligi munosabati bilan turli tadbirlar oʻtkazildi. Tadbirlarda oʻquvchilarning bilimlari, fanlarga boʻlgan qiziqishlari oshirilib, dunyoqarashlari kengaytirildi.

Tumanimizdagi 3-sonli maktabda ham mazkur fanlarni oʻqitish zamonaviy talablar darajasida boʻlishini taʼminlash, fanlar oʻqituvchilarining pedagogik mahoratini  oshirish, ularning ijodiy izlanishlari va mehnatini roʻyobga chiqarishga alohida eʼtibor qaratilmoqda. Shu bois, fan oyliklari doirasida oʻquvchilar bilimining davlat taʼlim standarti va oʻquv dasturlariga moslik darajasini aniqlash maqsadida  bilimlar bellashuvlari, viktorinalar va turli maʼnaviy-maʼrifiy tadbirlar oʻtkaziladi.

Shu yil 12-mart kuni boʻlib oʻtgan oylik doirasidagi yana bir tadbir “Tabiat va biz” deb nomlandi. Unda maktabning yuqori sinflari oʻquvchilari ishtirok etishdi.

Atrof-muhit, insonni qamrab olgan tabiiy omillar – havo, suv, atmosfera, yer, oʻsimliklar, hayvonot dunyosi tabiatdir. Ona zaminimiz, musaffo havo, suv, quyosh nuri barcha-barchasi tabiatning  betakror moʻʼjizalaridir. Inson dunyoga keliboq ushbu neʼmatlardan bahramand boʻladi. Biroq butun hayoti davomida ularni qadrlay oladimi? Afsuski yoʻq! Shuning natijasida atmosferamiz ifloslanishi tobora kuchayib, tabiiy muvozanatga salbiy taʼsirini oʻtkazmoqda. Natijada turli ekologik muammolar tugʻilayapti.

Maktabda oʻtkazilgan “Tabiat va biz” deb nomlangan tadbirda dastlab shu haqda maʼruza qilindi. Biologiya fani oʻqituvchilari Komila Xolmurodova, Sapura Toʻraniyozova, Dinora Yesekeyeva, ximiya fani oʻqituvchilari Elza Shomurodova, Dilfuza Aynazarova, fizika fani oʻqituvchisi Sarvinoz Saʼdullayevalar hamkorligida tayyorlangan ushbu tadbirda oʻquvchilar chor-atrofga bahoriy koʻrkamlik va xush kayfiyat ulashuvchi gullarga taʼrif berdilar. Gullar inson ruhiyatini stresslardan va charchoqdan qutqarishda muhim ahamiyat kasb etishi haqida ibratli soʻzlar, sheʼrlar ijro etdilar.

Sahnaga oʻquvchi yigit-qizlar koʻtarilib, hududimizda tabiiy ravishda oʻsadigan oʻsimliklar va atrof-muhit muvozanatini saqlab turishdagi ularning ahamiyati haqida koʻpgina maʼlumotlar aytdilar.

Buyuk ximik olim Mendeleyevning hayoti va faoliyati, u yaratgan davriy jadvalning ahamiyati haqidagi maʼruza ham tadbir tomoshabinlariga koʻpgina bilimlar berdi. Maktabning 10-sinf oʻquvchilari ishtirokida ijro etilgan “Orolning qaytishi” deb nomlangan sahna koʻrinishini yigʻilganlar koʻzlarida yosh bilan tomosha qilishdi.

Shuningdek, “Yosh fiziklar” toʻgaragi aʼzolarining fanga oid qiziqarli tajribalari, fizik fokuslari, fantamimolari barchaga ulkan taassurotlar hadya etdi.

“Tabiat va biz” deb nomlangan tadbir oʻquvchilarning tabiiy fanlarga boʻlgan qiziqishlari oshishiga xizmat qildi, bu borada oʻquvchilarning olgan bilimlarini sinovdan oʻtkazdi. Shu bilan birga ona tabiatimizga ongli munosabatda boʻlishga undadi.

O.RAJABOVA.