AZIZ AYoLLAP ShAPAFLANDI, KEKSALAP HOLIDAN XABAP OLINDI

Mamlakatimizda, xususan tumanimizda ham ayol-qizlar bayrami aziz va muhtarama onajonlarga, opa-singillarga ehtirom tarzida keng nishonlandi. Oilalarimiz bagʻrida boshlangan bayramona xush kayfiyat nafaqat korxona-tashkilotlar, balki taʼlim muassasalarini ham chetlab oʻtmadi.

Tumandagi 40-sonli maktabda ham ushbu sana katta xursandchilik bilan nishonlandi. Oʻquvchilar ayol-qiz muallimlar – ustozlarini qoʻllarida gul, yuzlarida tabassum bilan ertalabdan bayramona kayfiyatda kutib olishdi. Oʻqituvchilar oʻzlariga koʻrsatilgan ehtirom va eʼtibordan juda mamnun boʻldilar va barcha oʻquvchilarga bayramona ruh bagʻishlaganlari uchun minnatdorchiliklarini bildirdilar.

Maktabdagi bayramona kutib olish marosimidan soʻng, oʻqituvchi va oʻquvchilar mahallaning keksa onaxonlarini ham bayram bilan tabriklab, xursand qilish maqsadida ularning xonadonlariga borishdi.

Darhaqiqat, qiynalsak, togʻday suyanchigʻimiz, quvonganda doʻst-u qadrdonimiz,  och qolsak oshpazimiz, bemor boʻlsak shifokorimiz, adashsak toʻgʻri yoʻlni koʻrsatuvchi yoʻlchi-yulduzimiz, safarda boʻlsak duogoʻylarimiz, albatta, onalardir. Nafaqat oʻz oilasi va yaqinlari, farzandlari, balki Vatani uchun ham jonini berishga tayyor ayollarimiz borligi uchun biz bu yorugʻ olamda bormiz, baxtiyormiz. Agar taʼbir joiz boʻlsa, Orzigul momo Madaminova ana shunday ayollardan biridir. Orzigul momoning butun hayoti mehnat bilan, el-yurtga halol xizmat qilishdek xayrli ishlar bilan oʻtgan. Ayniqsa, Ikkinchi jahon urushidan keyingi iqtisodiy taqchillik yillarida sabr-toqat bilan yashab mehnat qilgan, bugungi farovon kunlarimiz uchun yoshlik kuch-gʻayratini baxsh etgan onaxon ayni damda keksalik gashtini surmoqda. Oʻsib kelayotgan yosh avlodni, ertangi kuni porloq xalqimizni duo qilishdan aslo charchamaydilar.
Qarilik gashtini surayotgan Orzigul momoni 40-sonli maktabning oʻqituvchi va oʻquvchilari 8-mart – Xalqaro xotin-qizlar kuni munosabati bilan tabriklab, holidan xabar oldilar. Oʻz navbatida momo ham oʻziga koʻrsatilgan hurmat va eʼzoz uchun minnatdorchilik bildirib, yoshlarni uzundan-uzoq duo qildi va el-yurtga omonlik tiladi.

Shundan keyin maktabda bayram munosabati bilan yuqori sinf oʻquvchi-qizlari oʻrtasida tashkil etilgan “Balli, qizlar” bellashuvi boʻlib oʻtdi. Bellashuvda qizlar 5 ta shart boʻyicha oʻz bilimlarini, turli yoʻnalishlar yuzasidan mahoratlarini namoyish etdilar. Xususan, pazandalik, chevarlik, bilimdonlik boʻyicha bahslarda oʻquvchi-yoshlar biri-biridan qolishmadilar. Ayniqsa, erkin mavzu boʻyicha belgilangan shartga koʻra har bir qiz oʻz iqtidorini namoyish etib, mahorat bilan uddaladi. Biri Ayollarni sharaflovchi sheʼr aytsa, biri goʻzallik va nafosatni madh etuvchi dilrabo raqs ijro etdi. Yana biri esa onalik mehr-muhabbati, insoniylikning goʻzal sifatlarini oʻzida mujassam etgan sahna koʻrinishlari orqali aziz va muhtarama Ayollarga cheksiz hurmat hamda ehtiromini ifoda etdi.

Tadbir yakunida qizlar turli yoʻnalishlar boʻyicha taqdirlandilar. Bellashuvda ishtirok etgan barcha qizlarga maktab maʼmuriyati, boshlangʻich xotin-qizlar hamda Yoshlar ittifoqi boshlangʻich tashkiloti tomonidan esdalik sovgʻalari, faxriy yorliqlar taqdim etildi.

P.YOʻLDOShEVA.