FAN OYLIGI DOIRASIDAGI TADBIRLAR UMUMLAShTIRILDI

Tumanimizdagi barcha umumtaʼlim maktablarida matematika va informatika fan oyligi davomida biri-biridan qiziqarli bilimdonlik bellashuvlari, aqlni charxlovchi zakovat oʻyinlari, sinflararo hamda maktablararo matematika-informatika festivallari tashkillashtirilib, taassurotlarga boy oʻtdi.

Matematika va informatika fan oyligi doirasidagi tadbirlarga 40-sonli umumtaʼlim maktabida ham keng oʻrin berildi. Xususan, maktabning 5-sinf oʻquvchilari ishtirokida avval maktab miqyosida oʻtkazilgan “Bilimlar bahsi” matematik amallar boʻyicha musobaqalar keyinchalik doʻstona bellashuvlarga aylandi. Maktabning 5-sinf oʻquvchilari “Bilimdonlar bahsi”ga 31-sonli umumtaʼlim maktabi oʻquvchilarini ham chorladilar.

Tadbirda dastlab maʼruza qilgan oʻquvchilar buyuk bobokalonimiz Al-Xorazmiy asos solgan 1 dan 9 gacha boʻlgan sanoq tizimining jahon matematika olamida, iqtisodiyotida tutgan oʻrni, qurilish, meʼmorchilik, muhandislik, shuningdek, jamiyatimizning barcha sohalarini yuksak taraqqiyot sari eltishdagi tengsiz ahamiyati haqida soʻz yuritdilar. Shuningdek, eng mashhur asari “Aljabr va Almuqobala”da u kvadrat va bir chiziqli tenglamaning olti turini, hamda “algoritm” tushunchasini keng tavsiflab berganligini, bundan kelib chiqib oʻnlik sistemani topish keltirilganligi, natijada “algoritm” atamasi Al-Xorazmiy nomidan kelib chiqqanligini faxr bilan aytib oʻtdilar. Oʻquvchilar shundan soʻng, oddiy va murakkab amallarni bajarish borasida oʻz bilimlarini namoyon etishdi.

Bundan tashqari, 6-7-sinflar oʻrtasida boʻlib oʻtgan “Matematika – haqiqat demakdir”, 8-9-10-sinflar oʻrtasida boʻlib oʻtgan “Oʻyla, izla, top”, “Kim chaqqon-u kim epchil?” mavzularidagi bellashuvlar yanada qiziqarli boʻldi. Oʻquvchilar tomonidan tayyorlangan koʻrgazmali qurollar, mamlakatimizning barcha sohalaridagi matematika va informatika fanlarining tutgan oʻrnini aks eetiruvchi sahna koʻrinishlari, shuningdek oʻquvchilarning qobiliyatlarini namoyon etgan matematik oʻyinlar, zakovatga, chaqqonlik va epchilikka chorlovchi informatika faniga oid kompyuter ishlanmalari barchani fikrlashga, har bir misol va masala ustida faol ishlashga undagani bilan juda qiziqarli boʻldi.

Biri-biridan qiziqarli matematik amallarni, murakkab tenglamalarni bajarishda sinflararo va maktablararo oʻtkazilgan “Bilimdonlar bahsi” bellashuvlari fan oyligi doirasidagi eng qiziqarli tadbir boʻldi. Chunki 31-sonli maktabning matematika va informatika fanlari bilimdonlari bilan bahslashish maktab oʻquvchilari uchun oson boʻlmadi. Bunda ikkala maktab oʻquvchilari gʻoliblik uchun doʻstona kuch sinashdilar. Albatta, bu  bahslarda samimiyat va doʻstlik gʻalaba qildi. Ikkala maktabning  yosh matematika va informatika fani bilimdonlari bir-birlaridan oʻrganib, bilimlarini yanada mustahkamladilar.

Matematika va informatika fan oyligi doirasida boʻlib oʻtgan barcha tadbirlar umumlashtirildi va fan oyligining yakuniy qismi “Matematika va informatika festivali” deb nomlandi. Unda fan oyligi doirasidagi tadbirlarda faol ishtirok etgan oʻquvchilarning matematika va informatika fanini qay darajada oʻzlashtirganliklariga baho berildi. Sinflararo va maktablararo  bellashuvlarda oʻzlarining bilimdonliklarini, alohida qobiliyatga ega ekanliklarini namoyon etgan bir guruh oʻquvchilar esa maktab maʼmuriyati tomonidan munosib taqdirlandilar.

Robiya YOʻLDOShEVA.