TUMAN MADANIYaT MARKAZIDA QILIChBOY MADANIYaT MARKAZI DRAMA TOʻGARAGI AʼZOLARI SPEKTAKL NAMOYISh ETIShDI

Prezidentimiz yoshlar kelajagini koʻzlab ilgari surgan 5 ta tashabbusning butun  mazmun-mohiyati oʻsib kelayotgan yosh avlod ongida buyuk oʻzgarishlarga nisbatan ragʻbat uygʻotish, ularning boʻsh vaqtlarini mazmunli oʻtkazish, qobiliyat va iqtidorlarini yuzaga chiqarish, hayotda ilgʻor fikrli, bilimdon, yuksak maʼnaviyatli insonlar sifatida kamol topishlari, ona Vatanga fidoyi va sadoqatli shaxs boʻlib voyaga yetishlariga koʻmaklashishdan iborat. Shu bois, mamlakatimizda 5 ta muhim tashabbus doirasida amalga oshirilayotgan tadbirlarning barchasida yoshlarning oʻzlari tashabbuskorlik va faollik koʻrsatishmoqda. Mazkur tashabbuslardan biri yoshlarga eʼtiborni kuchaytirish, ularni sanʼat va madaniyat maskanlariga keng jalb etish, bu borada qobiliyatli yoshlarni qoʻllab-quvvatlashga qaratilgani bilan ahamiyatlidir.

Qilichboy Madaniyat markazida tashkil etilgan yoshlar drama toʻgaragi faoliyati ham yoshlarni sanʼat va madaniyat maskanlariga jalb etish va boʻsh vaqtlarini mazmunli oʻtkazishga qaratilgan boʻlib, toʻgarak faoliyatida asosan yoshlar ishtirok etishmoqda. Oʻz faoliyatini 2019  yilda boshlagan toʻgarakda Qilichboy ovulining sanʼatga qiziquvchi yoshlari darsdan boʻsh vaqtlarida ishtirok etishadi.

Shunisi eʼtiborga loyiqki, toʻgarak aʼzolari tomonidan bolalarbop qator spektakllar sahnalashtirilib, hududdagi maktabgacha taʼlim tashkilotlarida namoyish etildi. “Yaxshiliklar olami” deb nomlangan oʻzbek xalq ertaklari asosidagi spektakllar tuman hududidagi maktabgacha taʼlim tashkilotlari tarbiyalanuvchilari tomonidan katta qiziqish bilan kutib olindi. Ushbu sahna asari uchun toʻgarak jamoasi 2019-yilning 27-mart sanasida – Xalqaro teatr kuni munosabati bilan oʻtkazilgan koʻrik-tanlovning Respublika bosqichida “Eng yaxshi rejissyorlik ishi” yoʻnalishi boʻyicha gʻoliblikni qoʻlga kiritishdi.

Yoshlarni milliy gʻoya, oila qadriyatlari, oʻzaro mehr-oqibat ruhida tarbiyalash mavzusi toʻgarak jamoasi faoliyatining muhim yoʻnalishlaridan biri hisoblanadi.
Yaqinda toʻgarak aʼzolari tomonidan tuman Madaniyat markazida Mirsaid Qodirov stsenariysi asosida “Kechikkan oʻgʻil” spektakli sahnalashtirilib, tomoshabinlar hukmiga havola etildi.

Oʻzi yemay yedirib, kiymay kiydirib, hayotining navqiron faslini yolgʻiz oʻgʻil tarbiyasiga bagʻishlagan ota-onaning orzu-umidlari, sogʻinchlari oʻz  ifodasini topgan mazkur spektaklda Qadamboy Matsafoyev, Mahliyo Bozorboyeva, endigina 7 yoshga toʻlgan Damirjon Shuhratov, Najot Ochilboyev, Umidjon Shomurodov hamda Dilshod Anvarovlardan iborat havaskor aktyorlar jamoasi oʻz rollarini mahorat bilan ijro etib, tomoshabinlar olqishiga sazovor boʻldilar. Har bir obraz, ayniqsa, ota-ona va bemehr oʻgʻil obrazining toʻlaqonli ochib berilishi uchun toʻgarak aʼzolarining barchasi ota-ona chekkan sogʻinch va iztirob onlarini qalban his etib, goʻyo sahnada emas, balki hayotda, qay bir  mahallada sodir boʻlgan voqealar ichida yashab, farzandi mehrsizligi inson yuragini yemirishini oʻzlariga topshirilgan rollar orqali namoyon etdilar.

Toʻgarak aʼzolari doimiy ijodiy izlanishda. Ular yaqin kunlar ichida milliy urf-odat va anʼanalarimizni oʻzida aks ettirgan sahna asarlari yaratib, tumanimizning barcha Madaniyat markazlarida spektakllar namoyish etish niyatida ijodiy izlanishlar olib borishmoqda. Umid qilamizki, tumanimizning chekka qishlogʻi – Qilichboyda yashab, ijod etayotgan mazkur drama toʻgaragi aʼzolari orasidan mustaqil Vatanimizning yetuk teatr dargʻalari yetishib chiqib, Oʻzbekistonning, qolaversa, tumanimizning nomini jahonga tanitishsa, bir vaqtlar dunyo xalqlarini oʻz sanʼatlari bilan maftun etgan “Qilichboy masxarabozlik maktabi” namoyandalari erishgan muvaffaqiyatlar yana yangilansa. Chunki, bu zamin farzandlari ezgulik yoʻlidagi har qanday ishga alohida mehr-muhabbat, shu barobarida matonat bilan kirishadilar va, albatta, uddasidan chiqadilar. Shuning uchun ham: “har bir sohada qanday ish yuritishni qilichboyliklardan oʻrganing!” iborasi xalqimiz tilidan aslo tushmaydi.

Robiya YOʻLDOShEVA.