OʻQUVChINI ANIQ MAQSADLAR SARI YeTAKLASh – BIZNING VAZIFAMIZ
Baʼzan oʻqituvchilar ham, oʻquvchilarning ota-onalari ham oʻquvchilarning biror kasb-hunar yoki mutaxassislikka qiziqmayotgani haqida aytib, qoʻlidan telefon tushmasligidan nolib qolishadi.
Shu vaqtgacha men maktab amaliyotchi ruhshunos oʻqituvchisi sifatida ularga qanday javob bersam ekan, bolani kelajagiga bunday loqaydlik, telefonga bogʻliqlikdan qanday qutqarsa boʻladi, deb koʻp oʻylar edim.
Shu yil 6-fevral kuni maktabimizning yuqori sinflari oʻquvchilarining tuman hokimi S.Yoʻldashev bilan uchrashuvi va birgalikda “Amudaryo sohili” fermer xoʻjaligiga qarashli chorvachilik kompleksiga borib, xoʻjalik aʼzolarining chetdan nasldor qoramollar olib kelib, chorvachilik mahsulotlari yetishtirishni koʻpaytirish borasida olib borayotgan ishlari bilan tanishuvi natijasida oʻquvchilarimizning aynan ushbu sohaga qiziqishlari ortganini sezib, aslida ularni biron kasbga yoki mutaxassislikka qiziqishlarini uygʻota olmagan oʻzimiz aybdor ekanligimizni angladim. Oʻsha uchrashuvdan soʻng ham bir necha kungacha oʻquvchilar taassurotlarini qayta-qayta eslab yurishdi.
Tumanimiz rahbarining chorvachilik yoʻnalishida tadbirkorlik faoliyatini boshlash istagida boʻlgan bitiruvchilarga hukumatimiz tomonidan koʻpgina imkoniyatlar yaratilayotgani haqidagi soʻzlari ularning koʻnglida sohaga umid, ishtiyoq uygʻotdi. Shuningdek, “Shu elning ravnaqiga hissa qoʻshaman, ishlayman” degan yoshlarni doimo qoʻllab-quvvatlashga tayyorman” degan soʻzlari ularni toʻlqinlantirib yubordi.
Mening nazarimda, tumanimizda turli sohalarda tadbirkorlik faoliyati tufayli yo oliy oʻquv yurtlarida oʻqib, ilm-fan rivojiga qoʻshgan hissasi, sogʻliqni saqlash, taʼlim sohalarida halol mehnati tufayli ulkan yutuqlarga erishgan, obroʻ-eʼtibor qozongan kishilar bilan uchrashuvlar, suhbatlar tashkil etish, ishlab chiqarish jarayonlari bilan tanishtirish oʻquvchilarning kasb-hunarga, bilim olishga qiziqishlari oshishiga zamin yaratadi. Shunday tarzda ularning kelajagi haqida oʻz oldiga aniq maqsadlar qoʻyishiga erishishimiz mumkin. Maqsadlar esa oʻquvchini intilishga, kurashishga undaydi va loqayd oʻquvchilar muammosi oʻz-oʻzidan barham topadi.
Munira OʻROZBOYeVA,
33-maktab amaliyotchi psixologi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
