Qilichboy madaniyat markazida yoshlar bilan uchrashuv boʻlib oʻtdi

Yoshlar bilan uchrashib, ularning faoliyatlari bilan tanishishni, ertamiz egalari bilan yanada yaqin aloqa oʻrnatishni maqsad qilgan tuman hokimi boshchiligidagi ishchi guruhning navbatdagi manzili Qilichboy OFYning madaniyat markazi boʻldi. Madaniyat markazida tuman hokimi Sultonboy Yoʻldashev tumanimizdagi barcha sohalarda yuqori natijalarga erishayotgan yoshlar, yosh tadbirkorlar, yosh fermerlar hamda uyushmagan yoshlar bilan uchrashdi.

Madaniyat markazi faollar zalida yoshlar bilan suhbat boʻlib oʻtdi. Suhbat chogʻida tuman hokimi, yoshlarning takliflari, qiziqishlari, ayniqsa, ularni qiynayotgan muammolari bilan tanishdi.

Sultonboy Yoʻldashev oʻz nutqida mamlakatimizda yoshlarning yuksak marralarni egallashlari uchun yaratilayotgan shart-sharoitlar, cheksiz imkoniyatlar haqida toʻxtalib, yoshlarni oʻqib bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga daʼvat qildi. Tuman hokimi: “…Erishgan yutuqlarimiz oʻzimizniki, biz xato va kamchiliklarni oʻrganib, ularni bartaraf qilishga harakat qilmogʻimiz kerak!” - degan fikrni barchamiz hayotiy shior qilib olishimiz kerakligini taʼkidladi. Shuningdek, bilimga chanqoq, izlanuvchan tumanimiz yoshlari haqida oʻzining samimiy fikr-mulohazlarini bildirdi.

Taqʼkidlanganidek, tumanimizda yoshlarimiz uchun barcha sohalarda katta imkoniyatlar yaratilgan boʻlib, ushbu imkoniyatlardan samarali foydalanib, yuqori natijalarga erishayotgan yoshlarimiz talaygina. 2019-yilda yoshlarimizning tadbirkorlik sohasidagi 24 ta loyihasi uchun 8 mlrd 811 mln soʻm imtiyozli kredit mablagʻlari ajratilib, 155 yangi ish oʻrni yaratilgan.

2019-yil 5 nafar yoshlarimizga Yoshlar mehnat guzari, 16 nafariga ishlab chiqarish hamda maishiy xizmat koʻrsatish sohasida tadbirkorlik qilishlari uchun yer maydonlari ajratildi.

Shuningdek, 2019-yilda qurulgan koʻp qavatli uylardan 8 nafar yosh oilalarga Oʻzbekiston yoshlar ittifoqi tomonidan yoshlar uylarning boshlangʻich badali toʻlab berildi.

Ochiq muloqot tarzida oʻtgan uchrashuv chogʻida koʻpchilik yoshlarning muammolari tinglanib, shu yerning oʻzida hal qilish uchun tegishli mutasaddilarga topshiriqlar berildi. Xususan, yoshlarimizdan Sanjar Bekimbetov, Sevara Xoliyevalarning kredit olish masalalari, Qudrat Tursunboyev, Ilyos Ahmedov, Doniyor Pajabov va Sherzod Jumaboyevlarning bandlik bilan taʼminlanish masalalari, shuningdek, Lobar Matsafayevaning tikuvchilik faoliyati bilan shugʻullanishi uchun tikuv mashinasi bilan taʼminlanish masalasi, Hamida Pajabovaning imtiyozli uy-joy olish masalalari oʻrganilib, ayrimlari shu joining oʻzida hal qilindi. Qolganlarini ijobiy hal qilish uchun tegishli topshiriqlar berildi.

Suhbat yakunida tuman hokimi biz buyuk ajdodlar farzandi ekanligimizni, har birimiz ilm-fan choʻqqilarini egallab, ularga munosib avlod boʻlishimiz lozimligini alohida taʼkidladi. Shuningdek, muhtaram Prezidentimizning Oliy Majlisga qilgan murojaatnomasida ilm-maʼrifatning inson hayotidagi ahamiyati haqidagi fikrlariga toʻxtalib, bularning barchasi isbot talab qilmaydigan haqiqat ekanligini eʼtirof etdi.

Shuningdek, uchrashuv mobaynida tumanimizdagi tadbirkorlarning tadbirkorlik mahsulotlaridan iborat boʻlgan koʻrgazma tashkil qilindi. Koʻrgazmada yosh tadbirkorlarning mehnatlari namunalari yigʻilganlar diqqatiga havola qilindi. Koʻrgazma barchada katta taassurot uygʻotdi.

Charos Arslonova, tuman hokimligining axborot xizmati.