Yangi Oʻzbekiston – ham Daryo, Dengiz! (Prezidentning Parlamentga Murojaatnomasini tinglab)

Prezident soʻz aytdi – eng fidoyi soʻz:
Taraqqiyot bergay Vatanga pardoz.
Hayotni qilmoq-chun farovon, toʻkis,
Ilm-u maʼrifatga tikmoq kerak koʻz
Shundadir saodat va va buyuk rizq-roʻz!

Dedilar: raqamli iqtisod kerak,
Kerakdir bu yoʻlda mardona yurak.
Shu yoʻl istiqbolga quvvatdir, koʻmak,
Korruptsiya uchun ham toʻsiq, demak,
Shu illat boʻlmasa, balanddir parvoz!

Axir koʻp kuzatdik – oshna-ogʻayni,
Oʻz-oʻzini qoʻlladi, soyada gʻani.
Mansab-u martaba bir meros kabi,
Zanjirli halqada aylanganini,
Oqibat ne dono boʻldilar toʻz-toʻz!

Qalbim huzurlandi bugun. Haqiqat
Lafzi yuragimga boʻlganda payvand.
Nechun huzurlanmay, uygʻotib hayrat,
Har bitta oʻgʻil-qiz topsa maʼrifat.
Ahli jahon aro aylagum koʻz-koʻz!

Quvonib ketaman, dunyoviy ilm
Sahfalarin ochgan oʻzbegim manim.
Margʻinoniy tuzgan huquqiy bilim –
“Hidoya” koʻrsatib hidoyat yoʻlin,
Qomusin yaratdi xalqlar sarafroz!

Noldan oʻnga qadar matematik son,
Xorazmiydan meros eng buyuk irfon.
Yer sharini chizib Amriqo tomon,
Ilk ilmiy yoʻl ochgan olim-u zamon –
Beruniy haqida aytgim kelar soʻz!

Soʻz aytsam, Ibn Sino, Navoiylardan,
Buyuk Mirzo Bobur, Buxoriylardan.
Jaloliddin, Temur oʻsgan uylardan,
Bir sado keladi ul moziylardan:
- Oʻzbek el aslida tengsizdir, tengsiz!

Shunday salaflarni ulgʻaytgan Vatan,
Buyuk kelajakka qoʻymoqda qadam.
Oʻshal qadamlarga surʼat baxsh etgan
Ezgu oʻzgarishdan hayratda Odam –
Yangi Oʻzbekiston – ham Daryo, Dengiz!

Suvlar karvoniday shovullab hamon,
Oqib borayotir dunyoga irfon.
Evrilib navqiron avlodlar tomon,
Qoʻngʻirogʻi aslo tinmagan karvon –
Fozillik taxtida maʼrifat soʻzsiz!

Jaranglab turibdi qarang, qoʻngʻiroq,
Moziydan to bugun oʻchmagan chiroq.
Ulugʻ yoʻlga tushgan Vatanga mayoq –
Ezgu maqsadlarga chorlar qoʻngʻiroq
Xalqim istiqbolga egizdir, egiz!

Robiya YOʻLDOShEVA.