Takroriy ovoz berish oʻtkazildi

Barchamizga maʼlumki, joriy yilning 22-dekabr kuni mamlakatimizda Oliy Majlis Qonunchilik palatasi, Qoraqalpogʻiston Pespublikasi Joʻqorgʻi Kengesi, Xalq deputatlari viloyat, tuman, shahar kengashlariga saylovlar boʻlib oʻtdi. 23-dekabr kuni saylovning dastlabki natijalari eʼlon qilindi. Qonunga muvofiq, nomzodlardan birortasi ham yetarli ovoz toʻplay olmagan saylov okruglarida 2020-yil 5-yanvar kuni takroriy ovoz berish oʻtkazildi.

Maʼlumot oʻrnida aytish kerakki, Saylov kodeksiga binoan, Oliy Majlis Qonunchilik palatasi va mahalliy Kengashlar deputatlari saylovida saylov okrugi boʻyicha ikki nafardan ortiq nomzod qoʻyilgan boʻlsa, ammo ulardan hech biri saylanmasa, okrug saylov komissiyasi eng koʻp ovoz olgan ikki nafar nomzod boʻyicha okrugda takroriy ovoz berishni oʻtkazish haqida qaror qabul qiladi va bu haqda tegishli saylov komissiyasini hamda okrug saylovchilarini xabardor etadi. Takroriy ovoz berishda ishtirok etgan saylovchilarning ovozini boshqa nomzodga nisbatan koʻproq olgan nomzod saylangan deb hisoblanadi. Takroriy ovoz berish asosiy saylovdan keyin ikki hafta muddat ichida oʻtkaziladi. Takroriy ovoz berishda saylovchilarning ishtirok etishi foizi hisobga olinmaydi.

Ushbu kodeksga koʻra, takroriy ovoz berish asosiy saylovni oʻtkazish uchun tuzilgan oʻsha saylov uchastkalarida va saylovchilarning oʻsha roʻyxatlari boʻyicha oʻtkazildi.

Oʻzbekiston Pespublikasi Oliy Majlisi Qonunchilik palatasiga saylov oʻtkazuvchi 25 ta saylov okruglaridagi 1730 ta saylov uchastkasida takroriy ovoz berish jarayoni boʻlib oʻtdi.

Markaziy saylov komissiyasi bergan maʼlumotlarga koʻra, ushbu okruglardagi saylovchilar soni jami 3 million 148 ming 921 nafarni tashkil etadi.

Shuningdek, Qoraqalpogʻiston Pespublikasi Joʻqorgʻi Kengesi, Xalq deputatlari viloyat kengashlariga saylov oʻtkazuvchi 95 ta saylov okrugidagi 1104 ta saylov uchastkasida hamda Xalq deputatlari tuman va shahar kengashlariga saylov oʻtkazuvchi 587 ta saylov okrugidagi 1117 ta saylov uchastkasida takroriy ovoz berish jarayoni boʻlib oʻtdi.

Xalq deputatlari Amudaryo tuman Kengashining 2 ta saylov okrugidagi 3 ta saylov uchastkasida boʻlib oʻtgan takroriy ovoz berish jarayonlarida roʻyxatga olingan saylovchilar soni 6827 nafar boʻlib, shundan 4607 nafar saylovchi saylovda ishtirok etdi. Jumladan, 24-Oq oltin saylov okrugida roʻyxatga olingan 4377 nafar saylovchilardan 2922 nafari takroriy ovoz berishda ishtirok etdi. Takroriy ovoz berish natijalariga koʻra, ushbu saylov okrugidan Tadbirkorlar va ishbilarmonlar harakati – Oʻzbekiston Liberal demokratik partiyasidan koʻrsatilgan nomzod Mahmud Shermetov 2207 ta ovoz oldi, bu jami ovozlarning 75,5 foizini tashkil qilib, u Xalq deputatlari tuman Kengashi deputatligiga saylandi.

Shuningdek, 2-Chordara saylov okrugida roʻyxatga olingan saylovchilar soni 2450 nafar boʻlib, shundan 1685 nafar saylovchi takroriy ovoz berishda ishtirok etdi. Ushbu saylov okrugidan Tadbirkorlar va ishbilarmonlar harakati – Oʻzbekiston Liberal demokratik partiyasidan koʻrsatilgan nomzod Muyassar Pahmatullayeva 1068 ta ovoz olib, Xalq deputatlari tuman Kengashi deputatligiga saylandi. Bu esa jami ovozlarning 63,4 foizini tashkil qiladi.

Taʼkidlash kerakki, saylovlarning yakuniy natijalariga koʻra, Xalq deputatlari tuman Kengashi deputatligiga Tadbirkorlar va ishbilarmonlar harakati Oʻzbekiston Liberal-demokratik partiyasidan 9 nafar, “Milliy tiklanish” demokratik partiyasidan 6 nafar, Xalq demokratik partiyasidan 6 nafar, “Adolat” sotsial-demoratik partiyasidan 5 nafar, Ekologik partiyasidan 4 nafar nomzod saylandi. Deputatlarning 9 nafarini ayollar tashkil etadi.

Charos Arslonova, tuman hokimligi Axborot xizmati rahbari