Xalq deputatlari Amudaryo tuman Kengashining 76-sessiyasi toʻgʻrisida AXBOROT

2019-yil 17-dekabr kuni tuman hokimligi majlislar zalida Xalq deputatlari Amudaryo tuman Kengashining 76-sessiyasi boʻlib oʻtdi.

Sessiyani tuman hokimi Sultonboy Yoʻldashev ochdi va olib bordi. Sessiya ishida Xalq deputatlari tuman Kengashi deputatlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari qatnashdi.

Sessiya kotibligiga 8-Boʻston saylov okrugidan tuman Kengashi deputati Xalmurat Oʻrazakov saylandi.

Sessiya kun tartibiga tumanni ijtimoiy-iqtisodiy rivojlantirish, aholining turmush sharoitlarini yaxshilash va tuman Kengashining faoliyatiga doir jami 5 ta masala kiritildi.

Kun tartibidagi birinchi, yaʼni “Amudaryo tumani mahalliy byudjetining 2020-yilgi asosiy koʻrsatkichlari toʻgʻrisida”gi masala yuzasidan tuman moliya boʻlimi mudiri Ulugʻbek Bekniyazov axborot berdi.

Taʼkidlanganidek, 2020-yilda Amudaryo tumanining mahalliy byudjeti daromadlari  98 mlrd 544 mln soʻm, xarajatlari esa 129 mlrd 827 ming soʻmga prognoz qilingan. Yuqori byudjetdan ajratilishi koʻzda tutilgan mablagʻlar miqdori 31 mlrd 824 mln soʻmni tashkil qiladi. Soliqlar boʻyicha tushumlar 2020-yilda 44 mlrd 567 mln soʻmni tashkil qilishi prognoz qilingan.

Tuman mahalliy byudjetining asosiy qismi taʼlim va tibbiyot sohasiga, qolaversa, madaniyat va sport sohasi, ijtimoiy nafaqalar, obodonlashtirish ishlari, qishloq avtomobil yoʻllarini taʼmirlash, fuqarolarning oʻzini oʻzi boshqarish organlari, xokimiyat, davlat boshqaruvi organlarining tuman boʻlinmalarini saqlash uchun yoʻnaltiriladi.

Kun tartibidagi navbatdagi – “2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid tuman dasturining ijrosi toʻgʻrisida”gi masala yuzasidan tuman hokimining iqtisodiyot va tadbirkorlik masalalari boʻyicha birinchi oʻrinbosari Maʼmurjon Temirboyev hisobot berdi.

Hisobotda tuman dasturi doirasida iqtisodiyotni rivojlantirish, kichik biznes va xususiy tadbirkorlikni qoʻllab-quvvatlash, yangi ish oʻrinlarini tashkil qilish, hududlarni obodonlashtirish va boshqa sohalar boʻyicha amalga oshirilgan ishlar haqida toʻliq maʼlumotlar berildi.

Sessiyada jamoat xavfsizligini taʼminlash samaradorligini oshirish boʻyicha koʻrilayotgan chora-tadbirlarning ahvoli toʻgʻrisida tuman ichki ishlar boʻlimi boshligʻi oʻrinbosari Nurbek Kamolov hisobot berdi.

Hisobotda jriy yilning shu kunigacha barcha yunalishlar buyicha tuman hududida 70 ta jinoyat qayd qilingan boʻlib, oʻtgan yilning shu davriga nisbatan umumiy jinoyatlar soni 25 taga kamaygani aytib oʻtildi.

Hisobotda shuningdek, jinoyatchilikning oldini olish, ovul va mahallalarni jinoyatdan holi hududga aylantirish, aholi, ayniqsa yoshlar oʻrtasida profilaktik tushuntirish ishlarini olib borish boʻyicha koʻrilayotgan choralar haqida keng turda toʻxtalib oʻtildi.

Kun tartibidagi navbatdagi masala – tumanda ijtimoiy himoyaga muhtoj aholi qatlamini sifatli va arzon dori vositalari bilan taʼminlanishini yaxshilash boʻyicha amalga oshirilayotgan chora-tadbirlar toʻgʻrisida tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlari boʻyicha oʻrinbosari Alisher Yuldashev axborot berdi.

Axborotda qayd qilinganidek, Amudaryo tumanida 2019-yilning 11 oyi davomida 6 ming 107 nafar ijtimoiy himoyaga muhtoj aholi tuman koʻp tarmoqli markaziy poliklinikasi tomonidan bepul retsept, ijtimoiy yordam hisobidan 186 mln. 86 ming soʻm miqdorida dori-darmon vositalari bilan taʼminlangan. Tuman koʻp tarmoqli markaziy poliklinikasining kardiologiya xonasida dispanser nazoratiga olingan ijtimoiy himoyaga muhtoj boʻlgan bemorlarga jami 4 mln. 577 ming soʻm miqdoridagi 7 xil turdagi dori-darmonlar ajratib berilgan. Ushbu masala yuzasidan qilingan axborotda ijtimoiy himoyaga muhtoj aholi qatlamini sifatli va arzon dori vositalari bilan taʼminlash borasidagi boshqa muhim masalalarga ham toʻxtalib oʻtildi.

Yil soʻnggida boʻlib oʻtgan mazkur sessiyada tuman Kengashi deputatlarining faoliyatiga ham baho berildi. Yurtimiz mustaqilligini mustahkamlash, uning ijtimoiy-iqtisodiy, siyosiy, ilmiy, maʼnaviy salohiyatini oshirish va islohotlarni chuqurlashtirish, jamiyatimizda millatlararo doʻstlik va totuvlikni, tinchlik va barqarorlikni yanada mustahkamlash, yoshlarimizni vatanparvarlik va milliy istiqlol gʻoyalariga sodiqlik ruhida tarbiyalashda alohida yutuqlarga erishgan faol deputatlar ragʻbatlantirildi. Maxsus komissiya tomonidan xalq deputatlari tuman Kengashi deputatlari orasidan 17-Boʻzyop saylov okrugidan deputat Gulasal Matyakubova “Adolatli deputat” nomiga, 22-Jumurtov saylov okrugidan deputat Baxram Shermanov “Xalqparvar deputat” nomiga hamda 10-Toshyop saylov okrugidan deputat Muqaddas Beknazarova “Mehnatkash deputat” nomiga munosib deb topildi. Ularga tuman hokimi tomonidan maxsus sertifikatlar topshirildi. Shuningdek, sessiyada mazkur chaqiriq davomida faol ish olib borgan deputatlarga ham tashakkurnomalar topshirildi.

Kun tartibidagi barcha masalalar boʻyicha xalq deputatlari tuman Kengashining tegishli qarorlari qabul qilindi va shuning bilan sessiya oʻz ishini yakunladi.

Charos ARSLONOVA, tuman hokimligining axborot xizmati rahbari.