36-sonli maktabda profilaktik tadbir oʻtkazildi

Yoshlar oʻrtasida jinoyatchilik va huquqbuzarliklarning oldini olish eng muhim masalalardan biriga aylangan.  Chunki, yoshlar Vatan kelajagi va ertangi kun egalaridir. Shu sababdan ham, Oʻzbekiston yoshlari oʻrtasida turli xil illatlarning oldini olish, ularning huquqlari va qonuniy manfaatlarini taʼminlash maqsadida hukumatimiz tomonidan salmoqli ishlar amalga oshirilmoqda.

Mamlakatimizda har payshanba - profilaktika kuni deb eʼlon qilinishi munosabati bilan taʼlim muassasalarida ham uchrashuvlar oʻtkazilib, ularda prokuratura va ichki ishlar organlari xodimlari, “Mahalla” xayriya jamoat fondi, Yoshlar Ittifoqi, Xotin-qizlar qoʻmitasi vakillari ishtirok etmoqda.

21-noyabr kuni “Payshanba – Huquqbuzarlik profilaktikasi” kuni munosabati bilan  tumanimizdagi 36-sonli umumtaʼlim maktabida voyaga yetmagan yoshlarning qonuniy huquq va manfaatlarini himoya qilish, ular oʻrtasida nazoratsizlik va huquqbuzarliklarning oldini olish, ularni gʻoyaviy va ommaviy madaniyat taʼsiriga tushib qolishidan saqlash maqsadida profilaktik tadbir oʻtkazildi.

Aytish kerakki, hozirgi kunda 36-sonli umumtaʼlim maktabida 838 nafar oʻquvchi-yoshlarga 76 nafar pedagog xodimlar taʼlim-tarbiya berib kelmoqda.

Maktab oʻquvchilari fanlar olimpiadasi, bilimlar bellashuvining tuman va respublika bosqichlarida faol qatnashib keliishadi.

Yoshlarning boʻsh vaqtlarini mazmunli tashkil etish maqsadida maktabda turli koʻrik-tanlovlar, sport musobaqalari va maʼnaviy-maʼrifiy tadbirlar oʻtkazilmoqda va “5 ta tashabbus” loyihasi doirasida  toʻgaraklar tashkil etilgan.

Tadbirda yoshlar bilan ishlash boʻyicha profilaktika inspektori Chingiz Seytnazarov, 36-sonli umumtaʼlim maktabining maʼnaviy-maʼrifiy ishlar boʻyicha direktor oʻrinbosari Bahrom Xoʻjamuratov, yoshlar ittifoqi yetakchisi Nigora Bozorboyeva, maktab psixologi Mahfuza Muratboyeva, “Chordara” mahalla fuqarolar yigʻini mutaxassisi Bogʻdagul Pizayeva  hamda 186  nafar oʻquvchi-yoshlar ishtirok etishdi.

Tadbirda soʻzga chiqqanlar jinoyatchilikka qarshi kurashish barcha davrlarda ham davlatning jiddiy va muhim masalasi hisoblanib kelinganligi, inson tinch va xotirjam yashashni hohlashi va tinchlik boʻlgan joyda baraka va rivojlanish boʻlishini alohida taʼkidlab oʻtishdi.

Aksariyat jinoyatchilarning shaxsi, dastlab tarbiyasizlik oqibatida shakllanishi, tarbiyasi ogʻir oʻsmir – axloqan tuzatish va qayta tarbiyalashga muhtoj boʻlishi, uni axloqan tuzatish va tarbiyalash jinoyatchiga aylanishining oldini olish, shuningdek, jamiyat bilan normal aloqalarini tiklash, unda faol hayotiy pozitsiyani shakllantirish zarurligi  alohida qayd etib oʻtildi.

Uchrashuvda oʻquvchilar  bilan savol-javob va bahs-munozara oʻtkazildi, yoshlar oʻzlarini qiziqtirgan savollarga batafsil javob olishdi.

Aytish joizki, yoshlar oʻrtasida huquqbuzarliklarning oldini olish tizimining samarali ishlashi ichki ishlar idoralari profilaktika xizmati xodimlari, ular bilan yonma-yon faoliyat koʻrsatayotgan jamoat tuzilmalarining vakillari hamda fuqarolar hamkorligining toʻgʻri tashkil etilishiga bogʻliqdir.

Bu kabi yigʻilishlar esa jamiyatda yoshlarning huquqiy madaniyati va huquqiy qarashlarini yuksaltirishga hamda qonunga itoatkorlik xulqini shakllantirishga qaratilgani bilan ahamiyatlidir.

Zero, yoshlar oʻrtasida huquqbuzarliklarning oldini olish – butun jamiyatning vazifasi.

Iroda Erdosheva, jamoatchi muxbir