KITOBXON YoShLAR TAQDIRLANDI

Glaballashuv jarayonida yoshlarni yetuk, maʼnaviyatli insonlar qilib tarbiyalash,  ularning ongida badiiy asarlar mazmun-mohiyatini tahlil qilish, asarda bayon qilingan boqea hodisalarni talqin etish, asar voqealarini  taʼsirchan uslubda yetkaza olish mahoratini shakllantirish, oʻzlari  oʻqigan asarlardan ijobiy va hayotiy xulosalar chiqarish koʻnikmasini hosil qilish maqsadida “Nuroniy” jamgʻarmasi tuman boʻlimi va “Taraqqiyot koʻzgusi” gazetasi tahririyati, hamkorligida “Jaholatga qarshi maʼrifat bilan kurashamiz” grant loyihasi doirasida taʼlim muassasalarining oʻquvchi-yoshlari oʻrtasida “Men oʻqigan asar” mavzusida insholar tanlovi oʻtkazilgan edi.

Yaqinda tanlov tashkilotchilari hakamlar hayʼati aʼzolari tomonidan tanlovga kelgan insholar koʻrib chiqilib, gʻoliblar aniqlandi. Hakamlar hayʼati aʼzolarining xulosalariga koʻra, 1-oʻrin 11-sonli maktabning 11-sinf oʻquvchisi Sevara Oʻrozboyevaga nasib etdi. 30-son maktab oʻquvchisi Iroda Bekimbetova 2-oʻrin gʻolibi boʻldi. 22-maktab oʻquvchisi Umida Yerdosheva yozgan insho esa 3-oʻringa munosib koʻrildi.

“Men oʻqigan asar” insholar tanlovi gʻoliblari tashkilotchilar tomonidan munosib taqdirlandilar.

Oʻquvchi-yoshlarda kitobga boʻlgan eʼtibor va qiziqishni kuchaytirish, kitob oʻqish madaniyatini shakllantirish, oilaviy kitob oʻqish anʼanasini ommalashtirish, oilalarda, taʼlim muassasalarida kutubxonalar tashkil etishni targʻib qilish, oilaviy kitobxonlikni keng ommalashtirish orqali kitobxon yoshlar safini yanada kengaytirish maqsadida “Nuroniy” jamgʻarmasi tuman boʻlimi bilan “Taraqqiyot  koʻzgusi” gazetasi tahririyati hamkorlikda “Jaholatga qarshi maʼrifat bilan kurashamiz” grant loyihasi rejasiga muvofiq “Kitob – maʼnaviyat sarchashmasi” mavzusida maqolalar tanlovini eʼlon qilgan edi.

Tanlov davomida tahririyatimizga taʼlim muassasalari oʻquvchilari, shuningdek qiziquvchi yoshlar tomonidan yuqoridagi mavzuda oʻnlab maqolalar keldi. Tahrir hayʼati aʼzolari tanlov talablariga munosib deb tan olingan maqolalar mualliflari orasidan gʻoliblarni aniqladi. Unga koʻra, “Kitob – maʼnaviyat sarchashmasi” maqolalar tanlovida 20-30 yoshlilar oʻrtasida QMU talabasi Shahzod Qurbonboyev, Iroda Yerdosheva hamda 14 yoshgacha boʻlgan oʻsmirlar oʻrtasida 30-maktab oʻquvchisi Iroda Bekimbetovalar 1-oʻrin gʻoliblari boʻlishdi. Yosh toifalariga koʻra, Umida Yerdosheva ikkinchi, Dilafroʻz Sherimbetova hamda Tursunoy Jiyanboyevalar uchinchi oʻrin sohiblari boʻlishdi.

Shuningdek, yuqoridagi grant-loyiha rejasiga muvofiq taʼlim muassasalari oʻquvchi-yoshlari oʻrtasida eʼlon qilingan “Men sevgan badiiy qahramon” insholar tanlovi gʻoliblari ham aniqlandi.

Mazkur tanlovda oʻzining badiiy fikrlash qobiliyati madaniyatli kitobxon ekanligini namoyon etgan 38-maktab oʻquvchisi Iroda Yerdosheva 1-oʻrinni egalladi. Shu maktabning 11-sinf oʻquvchisi Xosiyat Zaripova 2-oʻrin, xizmat koʻrsatish va servis kasb-hunar kolleji oʻquvchisi Dilafroʻz Sherimbetova 3-oʻrin sohiblari boʻlishdi.

Tanlov gʻoliblari tashkilotchilar tomonidan faxriy yorliqlar va esdalik sovgʻalar bilan taqdirlandilar.

Robiya YOʻLDOShEVA.