ARXIV FAOLIYaTINI YaXShILAB, XIZMAT KOʻLAMINI OShIRAMIZ

Qoraqalpogʻiston Respublikasi Amudaryo tumani davlat arxivi 2006-yilda tashkil qilingan boʻlib, oʻtgan davr mobaynida muassasada arxiv ishi va ish yuritish sohasida zarur infratuzilma yaratildi, arxiv hujjatlarini jamlash, hisobga olish, saqlash va ulardan foydalanishda ijobiy natijalarga erishildi. Tumanimiz xalqining moddiy va maʼnaviy hayotini aks ettirgan, tarixiy, ilmiy va madaniy ahamiyatga ega boʻlgan milliy arxiv fondi yangi hujjatlar bilan boyitib borilmoqda.

Tuman davlat arxivida 2006-yildan bugungi kunga qadar jami 187 ta fond va ularda milliy arxiv fondi tarkibiga kiruvchi doimiy saqlanadigan 19 ming 259 ta hujjatlar, shaxsiy tarkibga oid 12 ming 627 ta hujjatlar saqlanmokda.

Arxiv ishi, davlat saqlovidagi arxiv hujjatlarining saqlanish holatini tartibga keltirish, arxiv muassasasida zamonaviy axborot-kommunikatsiya texnologiyalarini joriy qilish, moddiy texnika bazasini yaxshilash maqsadida 2019-yilning oʻtgan davrida 2 ta kompyuter, 3 ta printer, 1 dona qogʻoz shaklidagi hujjatlarni elektron hujjatga aylantiruvchi uskuna xarid qilindi va 2019-yilning shu davriga qadar milliy arxiv fondi hujjatlarining 1 ming 575 ta kadr elektron nusxasi yaratildi.

Tuman davlat arxivi binosi 2018-yilda rekonstruktsiya qilingan, barcha sharoitlarga ega yangi binoga koʻchib oʻtdi. Binoda hujjatlar zarur namlik va haroratga, tegishli sharoitlarga ega xonalarda saqlab kelinmoqda. Hujjatlarning oʻgʻirlanish va yoʻqolishi holatlarining oldini olish maqsadida xonalar signal beruvchi qurilmalar va kuzatuv kameralari, oʻt oʻchirish anjomlari bilan taʼminlangan.

Hujjatxonada haftaning juma kuni sanitariya-gigiyena kuni deb belgilangan. Shu kuni barcha hodimlar hujjatlarni tozalash, yirtilgan hujjatlarni butlash ishlarini olib borishadi.

Hozirgi paytda arxivimizga kelib tushayotgan hujjatlar temir javonlarga va karton qutilarga joylashtirilmoqda. 2019-yilning ikkinchi yarmida arxivni zamonaviy tipdagi stellajlar bilan taʼminlash rejalashtirilmokda.

Amudaryo tumani davlat arxivida 10,25 shtat birligi mavjud boʻlib, ayni kunda bu yerda 11 nafar xodim, 1 nafar rahbar, 1 nafar yetakchi arxivchi, 2 nafar fond saqlovchi, 3 nafar arxivchi va 3 nafar texnik xodimlar, byudjetdan tashqari xoʻjalik boʻlimida esa 3 nafar xodim, 2 nafar arxivchi va bosh hisobchi faoliyat yuritmokda.

Xodimlarning malakasini oshirish masalasiga ham alohida eʼtibor berilayapti. Shu kungacha 2 nafar xodimimiz huquqshunoslar malakasini oshirish institutida malakasini oshirdi, 3 nafar xodimimiz kasbiy kompetentlik boʻyicha attestatsiyadan oʻtib, guvohnomaga ega boʻlishdi. 1 nafar xodimimiz kompyuter savodxonligi boʻyicha oʻz malakasini oshirib keldi.

Biz bundan keyin ham arxivimiz faoliyatini yanada jonlantirib, fuqarolarga koʻrsatilayotgan xizmat koʻlamini kengaytirishga va sifatini yanada yaxshilashga harakat qilamiz.

B.JumaniYozov, tuman davlat arxivi direktori.