ENG NAMUNALI BOShLANGʻICh XOTIN-QIZLAR TAShKILOTLARI ANIQLANDI

Tumanimizdagi korxona, tashkilot, muassasalardagi xotin-qizlar boshlangʻich tashkilotlari va uning tarkibiy tuzilmalaridagi boshlangʻich tashkilotlarda faoliyat yuritayotgan xotin-qizlarga keng imkoniyatlar yaratish, ularning jamiyatda, siyosiy-ijtimoiy, iqtisodiy sohalardagi vazifalarni hal qilishdagi faolligini kuchaytirish, ijtimoiy-iqtisodiy ahvolini yaxshilash, huquq va manfaatlarini himoya qilish va xotin-qizlarning tadbirkorlik, kasbiy mahoratini oshirish, shuningdek yoshlarni maʼnaviy barkamol, gʻoyaviy yetuk, millat va davlatning taraqqiyoti yoʻlida oʻz kuchini ayamaydigan insonlar qilib tarbiyalashda fidoyilik bilan mehnat qilayotgan Xotin-qizlar qoʻmitalari boshlangʻich tashkilotlari raislarini aniqlash, ularning ilgʻor ish tajriba va uslublarini keng yoyish maqsadida tashkil etilgan “Eng namunali boshlangʻich tashkilot” koʻrik-tanlovining tuman bosqichi oʻtkazildi.

Amudaryo Iqtisodiyot kasb-hunar kolleji binosida boʻlib oʻtgan koʻrik-tanlovda tadbir ishtirokchilari tomonidan tashkil etilgan koʻrgazma namoyish etildi. Kollej foyesidagi koʻrgazmaga qoʻyilgan tumanimizdagi turli idora va tashkilotlarda faoliyat yuritayotgan boshlangʻich xotin-qizlar tashkilotlari rahbarlari, kollej va umumtaʼlim maktablari oʻquvchi-qizlari tomonidan yasalgan hunarmandchilik buyumlari tadbir qatnashchilarida katta taassurot qoldirdi.

Koʻrik-tanlovni tuman hokimi oʻrinbosari, Xotin-qizlar qoʻmitasi raisi Maryam Ahmedova ochdi va ishtirokchilarga muvaffaqiyat tiladi.

Shundan soʻng boshlangʻich xotin-qizlar tashkilotlari raislari koʻrik-tanlov shartlari boʻyicha oʻzaro kuch sinashdilar. Koʻrik-tanlov shartlariga koʻra, ishtirokchilarning bilimdonligi, topqirligi, epchilligi, uddaburonligi, muammolar yechimini topish boʻyicha mahoratlari hamda alohida qobiliyatlariga alohida ahamiyat berildi.

Qizgʻin bahslar va doʻstona vaziyatda oʻtgan bellashuvlarda “Eng namunali mahalla boshlangʻich tashkiloti” yoʻnalishi boʻyicha Daryo boʻyi MFY boshlangʻich tashkiloti raisi Erkinoy Yoqubova 1-oʻrin, Boʻzyop OFY boshlangʻich tashkilot raisi Oyzoda Eshimbetova 2-oʻrin, Bosuv MFY boshlangʻich tashkilot raisi Dilfuza Toʻrayeva 3-oʻrinni egallashdi.

“Eng namunali MTM boshlangʻich tashkilot” yoʻnalishida 2-sonli MTM boshlangʻich tashkiloti raisi Dilbarxon Matnazarova 1-oʻrin, 5-sonli MTM boshlangʻich tashkiloti raisi Gulasal Qutimova 2-oʻrin, 29-sonli MTM boshlangʻich tashkiloti raisi Maqsuda Qalandarova 3-oʻrin sohibalari boʻlishdi.

“Eng namunali maktab boshlangʻich tashkiloti” yoʻnalishida 1-oʻrin 76-sonli maktab boshlangʻich xotin-qizlar tashkiloti raisi Oʻrozgul Yakubovaga kasib etgan boʻlsa, 44-maktab boshlangʻich tashkiloti raisi Dilorom Yaxshiboyeva 2-oʻrin, 20-sonli maktab boshlangʻich tashkiloti raisi Gulbahor Allaberganova 3-oʻrin gʻolibi boʻldilar.

“Eng namunali korxona va tashkilot  boshlangʻich tashkiloti” yoʻnalishida 1-oʻrin tuman MTM boʻlimi boshlangʻich tashkiloti raisi Mohira Yusupovaga, 2-oʻrin tuman madaniyat markazi boshlangʻich tashkiloti raisi Nasiba Yeshchanovaga, 3-oʻrin esa tuman xalq taʼlimi boʻlimi boshlangʻich tashkiloti raisi Tatyana Pirnafasovalarga nasib etdi.

Koʻrik-tanlovda “Eng namunali tibbiyot muassasasi boshlangʻich tashkiloti yoʻnalishi boʻyicha ham gʻoliblar aniqlandi. Unga koʻra, tuman Tibbiyot birlashmasi boshlangʻich tashkiloti raisi Nilufar Qurbonboyeva 1-oʻrin gʻolibi boʻldi.

2-oʻrin 5-sonli Qishloq oilaviy poliklinikasi boshlangʻich tashkiloti raisi Ulboʻsin Doʻschanovaga, 3-oʻrin esa 2-sonli qishloq oilaviy poliklinikasi boshlangʻich tashkilot raisi Munavvara Doʻschanovaga nasib etdi.
Koʻrik-tanlov yakunida gʻolib va sovrindorlar tashkilotchilar tomonidan munosib taqdirlandilar.

R.Yoʻldosheva.