Amudaryo tumanida Qoraqalpogʻiston Pespublikasi Davlat soliq boshqarmasi boshligʻi sayyor qabul oʻtkazdi

Mamlakatimizda “Davlat idoralari xalqimizga xizmat qilishi kerak” degan ezgu tamoyil asosida davlat organlari rahbarlarining xalq bilan ochiq muloqtlari, sayyor qabullar oʻtkazilmoqda.

Yaqinda Amudaryo tumanining Boy ovul mahallasida Qoraqalpogʻiston Pespublikasi Davlat soliq boshqarmasi boshligʻi Qallibek Xalmuratovning sayyor qabuli oʻtkazildi.

Sayyor qabulda tuman sektor rahbarlari, Xalq qabulxonasi mudiri, masalaga aloqador xodimlar, tarkibiy boʻlimlar, korxona, tashkilotlar, tijorat banklari xodimlari, ovul va mahalla fuqarolar yigʻinlari raislari ishtirok qildilar.

Yigʻilishni tuman hokimi Sultonboy Yoʻldashev kirish soʻz bilan ochdi va olib bordi. Qoraqalpogʻiston Pespublikasi Davlat soliq boshqarmasi boshligʻi Qallibek Xalmuratov Oʻzbekiston Pespublikasi Prezidentining 2018-yil 29-iyundagi “Oʻzbekiston Pespublikasining soliq siyosatini takomillashtirish kontseptsiyasi toʻgʻrisida”gi farmoni boʻyicha soliq sohasiga kiritilgan oʻzgarishlar haqida maʼlumotlar berdi hamda fuqarolarning tomorqa yer maydonlaridan samarali foydalanish, oʻz vaqtida ekin ekish, uy-joylar atroflarini obodonlashtirishga koʻproq eʼtibor berish lozimligini qayd etdi. Tomorqa yerlari ekilmay qarovsiz qolgan taqdirda ularning egalarining yer uchastkalariga boʻlgan huquqlari qonun hujjatlarida belgilangan tartibda bekor qilinishi haqida maʼlumot berildi.

Sayyor qabul paytida tuman fuqarolar va yuridik shaxslarning vakillari soʻzga chiqishib, oʻzlarini qiynayotgan muammolar bilan Qoraqalpogʻiston Pespublikasi Davlat soliq boqarmasi boshligʻiga murojaat qildilar.

Murojaatlar tinglanib, ularni qisqa muddatlarda hal qilish boʻyicha tegishli mutasaddilarga topshiriq va koʻrsatmalar berildi.

Shuningdek, tumanda aholi bandligini taʼminlash, yangi ish oʻrinlarini tashkil qilish, tadbirkorlik va kichik biznesni rivojlantirish, imtiyozli bank kreditlarini ajratgan holda aholini tadbirkorlik faoliyatiga jalb qilish, tumanning eksport salohiyatini oshirish va ishlab chiqarish, savdo va xizmat koʻrsatish sifatini hamda daarajasini oshirish boʻyicha ustuvor vazifalar belgilab olindi.