Amudaryo tumani hokimi S.Yoʻldashev oʻzi rahbarlik qilayotgan 1-sektor hududidagi madaniyat markaziga 500 dona kitob sovgʻa qildi

Mavzuga oid video

Prezidentimizning yoshlarni kitobxonlikka jalb qilish boʻyicha tashabbuslarini qoʻllab-quvvatlagan holda 13-aprel kuni Amudaryo tumani hokimi Sultonboy Yoʻldashev oʻzi rahbarlik qilayotgan 1-sektor hududidagi Uyshin madaniyat markazida boʻlib, bu yerda yoshlarni sanʼatga jalb qilish boʻyicha mavjud sharoitlar bilan yaqindan tanishdi.

Hokim tashabbusi bilan mazkur madaniyat markazida kutubxona tashkil qilinib, u zarur jihozlar bilan taʼminlandi. Shu kuni tuman hokimi oʻz nomidan va homiylar tashabbusi bilan yigʻilgan 500 dona badiiy kitoblarni kutubxonaga sovgʻa qildi.

Shu paytgacha Uyshin Madaniyat markaziga kelgan yoshlar musiqa va sanʼat sirlarini oʻrganib, aholi madaniy hordiq chiqargan boʻlsa, endilikda ular oʻzbek va jahon adabiyotining sara badiiy asarlarini mutolaa qilib, bilim va tafakkurini, dunyoqarashini yanada yuksaltirish imkoniyatiga ega boʻldi.

Tantanali marosimlarda soʻz olganlar sektor rahbari – tuman hokimi Sultonboy Yoʻldashevga mazkur ziyo maskanining tashkil qilingani, qolaversa, hududda amalga oshirilayotgan keng koʻlamli obodlik ishlari uchun alohida minnatdorchilik bildirdilar.

Aytish kerakki, mamlakatimizda hududlarni kompleks ijtimoiy-iqtisodiy rivojlantirish, aholining yashash sharoitlarini tubdan yaxshilash maqsadida hududlarni sektorlarga boʻlib ishni tashkil etish tizimining joriy etilganligi xalq bilan manzilli muloqotning yoʻlga qoʻyilishiga imkon yaratdi.

Tuman hokimi rahbarligidagi 1-sektor hududida davlatimiz rahbarining 2019-yil 8-yanvarda qabul qilingan “Hududlarni kompleks ijtimoiy-iqtisodiy rivojlantirish boʻyicha sektorlar faoliyatini yanada takomillashtirishga doir qoʻshimcha chora-tadbirlar toʻgʻrisida”gi qarori asosida ham amaliy ishlar olib borilmoqda.

Aholining eng muhim hayotiy muammolarini yechish bilan birgalikda sektor hududida maʼnaviy-maʼrifiy ishlar samaradorligini oshirishga ham alohida eʼtibor qaratilmoqda. Yoshlar maʼnaviyatini yuksaltirish, aholi oʻrtasida kitobxonlikni targʻib qilish, oilalardagi ijtimoiy muhit barqarorligini taʼminlash borasida amalga oshirilayotgan ishlar fikrimizning isbotidir. Zero, farovon turmushga faqatgina iqtisodiy toʻkinlik yoki maishiy sharoitlarni yaratish orqaligina erishib boʻlmaydi. Baxtli hayot kechirish uchun inson maʼnaviy va ruhiy jihatdan ham komillikka intilmogʻi lozim.

Tuman hokimi rahbarligidagi 1-sektor hududida ish boshlagan yangi kutubxona ham aholi, ayniqsa yoshlar maʼnaviyatini yuksaltirish, demakki, mahalla aholisi uchun farovon turmush tarzini barpo qilish yoʻlidagi yana bir qadamdir.

Gʻ.Yeshniyozov.