Dil izhori

Xalqimizda qayering ogʻrisa, joning shu yerda boʻladi, degan gap bor.

Ha, chindan ham qayerimiz ogʻrisa, butun hayotimiz xuddi shu aʼzoga taalluqliday tuyulib ketadi. Biroq tanamizda shunday aʼzo borki, uning oʻz vazifasini ado etolmay qolishi umrimizga yakun yasashi mumkin. Bu – yurak.

Men ne umidlar bilan yoʻlga chiqib, Toshkentdagi nufuzli kardiomarkazlarda “jarrohlik amaliyotini endi koʻtara olmaysiz, biz 50 yoshdan oshganlarga bu amaliyotni qoʻllamaymiz”, degan javobni eshitganimda endi yuragimning qachon urishdan toʻxtashini kutar ekanmanda, deb oʻylagandim. Chunki men oʻsha vaqtda 54 yoshda edim. Uyga kelgach, ahvolim badtar ogʻirlashdi.

Aslida bolaligimdan tez-tez mazam qochib, davolanib turar edim. Revmatizm asorati yurakka taʼsir qilgan degan tashhis qoʻyishgandi. Keyin menda tugʻma yurak nuqsoni, yaʼni boʻlmachalararo devor defekti borligini aniqlashdi.

Shu tashhis bilan ham 4-yilcha yurib, Toshkentga borganimda hali aytganimday, “vaqtni oʻtkazib yuboribsiz”, degan javob oldim.

Bu xulosa bilan yashash oson emasdi. Noiloj Xorazm viloyati kardiologiya markaziga bordim.

Shuni aytishim kerakki, markaz poliklinikasiga kirishim bilan oq xalat kiygan hamshiralar qayerga, kimga uchrashishim lozimligini aytib, yoʻl boshlashdi, shirin muomalasi bilan dalda boʻlishdi.

Meni yurak tugʻma nuqsoni boʻlimiga qabul qilishdi va chuqur tekshiruvlardan soʻng jarrohlik amaliyotini oʻtkazamiz, deyishdi. Men rozi boʻldim. Shunday qilib, 2018-yilning 14-dekabr kuni meni operatsiya qilishdi. Operatsiyadan soʻng ilk bor koʻzimni ochgan vaqtlarimni hech qachon unutmasam kerak. Axir menga Toshkentda bu amaliyotga bardosh bera olmaysiz, deyishgan edi-da. Hayot qanchalik totli va aziz ekanligini shunda chuqur his qildim.

Ha, tiriklik – bebaho neʼmat. Bu neʼmatni Yaratgan menga yurak jarrohi, mohir shifokor Rashid Nurullayevni vositachi qilib qaytarib bergan boʻlsa, ajab emas. Buning uchun shifokorlar Sanʼat Soburov, Bekpoʻlat Hojiyev, Qahramon Yangiboyev, Mansur Madrimov, boʻlimdagi barcha hamshiralardan cheksiz minnatdorman. Ilohim, qoʻllari dard koʻrmasin, doim el sogʻligi yoʻlida hormay-tolmay ishlab yurishsin, deyman.

Abdumurod HAYTEKOV, Toʻlqin ovuli.