2018-YILDA AMALGA OShIRILGAN IShLAR SARHISOBI: Kommunal soha va kommunikatsiyalar

“Obod qishloq” dasturiga kiritilgan “Nazarxon” ovulida 498 ta xonadonning tabiiy gaz, 231 ta xonadonning suyultirilgan gaz bilan taʼminlanish darajasi yaxshilandi. Dastur doirasida Qipchoq shaharchasidagi xonadonlarga 492 dona suyultirilgan gaz ballonlari tarqatildi.

Tuman hududidagi aholiga suyultirilgan gaz tarqatish boʻyicha 5 ta servis markazlari orqali 25 ming 613 ta xonadon suyultirilgan gaz bilan taʼminlanmoqda.

Suyultirilgan gaz tarqatish borasida uzilishlarning oldini olish maqsadida yil davomida jami 2 ming 704 ta yangi maishiy gaz ballonlari olib kelinib, shundan 2 ming 516 tasi aholiga tarqatildi.

2017-2021-yillarda elektr energiyasi tarmoqlarini rekonstruktsiya-modernizatsiya qilish hamda mukammal taʼmirlash ishlarini amalga oshirish boʻyicha rejalar ishlab chiqildi.

Unga koʻra 2018-yilda 6,2 km. uzunlikdagi elektr tarmoqlari rekonstruktsiya qilinib, Farovon mahallasi, Amir Temur nomli, Oʻrta qalʼa, Qilichboy ovullari hududlariga yangidan transformator punktlari oʻrnatildi.

“Obod qishloq” dasturi doirasida Nazarxon ovulida 8,1 km. zamonaviy SIP kabel liniyalari, 1 dona yangi transformator punkti oʻrnatilib, 3 dona transformator punkti mukammal taʼmirlandi. Qipchoq shaharchasida esa 10,9 km. SIP kabel tortilib, 2 dona yangi transformator punkti oʻrnatildi va 4 dona transformator punktlari mukammal taʼmirlandi.

Tuman hududidagi ichki yoʻllarni joriy taʼmirlash uchun davlat dasturiga asosan 2018-yilga 483 mln. 630 ming soʻm ajratilgan boʻlib, oʻtgan 11 oy davomida 270 mln. soʻmlik ishlar amalga oshirildi.

2018-yilda “Obod qishloq” dasturiga kiritilgan Qipchoq shaharchasidagi elektr avtomat telefon stantsiyasi kapital taʼmirdan chiqarilib, 1000 metr havo aloqa tarmogʻi rekonstruktsiya qilindi. Shuningdek, tuman boʻyicha jami 1330 metr uzunlikda optik tolali aloqa kabeli tortildi.

Oʻtgan yilda “Qipchoq shaharchasi – Mangʻit shahri – Turkmaniston Respublikasi chegarasi” davlat ahamiyatidagi avtomobil yoʻlining 15 km. qismi 15 mlrd. soʻmlik mablagʻ evaziga 15 kun ichida mukammal taʼmirlandi. Yoʻl boʻylariga bekatlar va piyodalar yoʻlakchalari qurilib, tungi yoritgichlar oʻrnatildi.

2018-yil davomida tumanda Respublika ahamiyatidagi yoʻllarni joriy taʼmirlash boʻyicha 5 mlrd. 979 mln. soʻmlik ish bajarildi. Jumladan, 4R181 avtomobil yoʻlining 11,6 km. qismiga qora qoplama yotqizildi, 16,2 km. yoʻl yoqasi chaqiq tosh bilan mustahkamlandi.

2018-yilda Qipchoq ponton koʻprigi joriy taʼmirlandi. Shuningdek, yoʻl yoqasiga bekat qurildi va bir qancha joylarga yoʻl belgilari oʻrnatildi.

2018-yil uchun mahalliy ahamiyatdagi avtomobil yoʻllarini joriy taʼmirlash uchun 507 mln. 659 ming soʻm ajratilgan boʻlib, bu borada rejada belgilangan ishlar toʻliq bajarildi.

2018-yilda aholining ichimlik suvi taʼminotini yaxshilash maqsadida manzilli davlat dasturi doirasida 1 mlrd. 225 mln. soʻm mablagʻ evaziga Gulzor mahallasida 6 km. uzunlikdagi suv quvurlari qurildi. Dastur doirasida Durunki mahallasiga 1 mlrd. 150 mln. soʻm evaziga 5,7 km. uzunlikdagi suv quvurlari tortildi. Doʻstlik mahallasi hududiga 2,5 km. uzunlikdagi magistral suv tarmoqlarini oʻtkazish uchun esa 1 mlrd. 303 mln. soʻm sarflandi. Bundan tashqari, “Gurlan” va “Qipchoq” koʻchalari boʻylab oʻtkazilgan 3 km. uzunlikdagi suv tarmoqlari 1 mlrd. 537 mln. soʻm evaziga rekonstruktsiya qilindi.

“Obod qishloq” dasturi doirasida “Nazarxon” ovulida 656,7 mln. soʻm evaziga 6,9 km. suv tarmoqlari qurildi va aholining ichimlik suvi taʼminoti yaxshilandi. Dasturga muvofiq Qipchoq shaharchasida 660,2 mln. soʻm mablagʻ evaziga yangidan 2 ta zamonaviy koʻrinishdagi yer osti qudugʻi qurilib, foydalanishga topshirildi.