TADBIRKORLAR HUQUQI QONUN HIMOYaSIDA

Joriy yil mamlakatimizda “Faol tadbirkorlik, innovatsion gʻoyalar va texnologiyalarni qoʻllab-quvvatlash yili” deb nomlanishi munosabati bilan nazorat qiluvchi organlar rahbarlari ishtirokida har oyda namunali, faol tadbirkorlar ishtirokida uchrashuvlar tashkil etilib, ularni qiynayotgan muammolarni eshitish, kamchiliklarni aniqlash va bartaraf etish choralari koʻrib borilmoqda.

Tuman prokuraturasi tomonidan ham hududdagi tadbirkorlik subʼektlari bilan har oyda tuman mutasaddi idoralar rahbarlari ishtirokida uchrashuv va tadbirlar oʻtkazilib kelinmoqda.

Tadbirlarda muammolarni hal etish bilan birga tadbirkorlik bilan shugʻullanish istagida boʻlgan fuqarolarga faoliyatni tashkil qilish hamda rasmiylashtirish yuzasidan tushuntirish va takliflar berilib borilmoqda. Shuningdek, faoliyati toʻxtatilgan va harakatsiz turgan korxonalar rahbarlari bilan yakka tartibda suhbatlar oʻtkazilib kelinmoqda.

Tumanda faoliyat yuritayotgan “Xoʻjakoʻl” hamda “Amudaryo sohili” fermer xoʻjaliklari tomonidan chorvachilikni rivojlantirish maqsadida 2 mlrd. 800 mln. soʻmlik kredit mablagʻlari hisobiga 132 ta nasldor qoramollar Polsha Respublikasidan olib kelindi va bugungi kunda ularning tarmoqlari kengaytirildi. Shuningdek, ayni paytda “Oʻrta qalʼa chorvadori” agrofirmasi tomonidan asalarichilikni rivojlantirish maqsadida 1 mlrd. 200 mln. soʻmlik, shundan 1mlrd. soʻmi bank krediti mablagʻlari hisobiga asalari oilalarini olib kelish va har bir hudud hamda fermer xoʻjaliklarida asalarichilikni rivojlantirish rejalashtirilgan. Bundan tashqari, baliqchilik, zamonaviy muzlatkichli omborxonalarni tashkil qilish, meva-sabzavot mahsulotlarini yetishtirish va qayta ishlashni tashkil qilish kabi yoʻnalishlardagi loyihalar ham Davlat dasturiga kiritilgan.

Tuman hududida boʻsh turgan, kam quvvatda ishlayotgan korxonalar faoliyatini qayta tiklash va kengaytirish yoki ular negizida yangi ishlab chiqarishlarni tashkil etish boʻyicha “Mangʻit” MChJ tomonidan umumiy ovqatlanish va savdo doʻkoni tashkil qilinib, joriy yilda ishga tushirilishi rejalashtirilgan.

Tumanda faoliyat yuritayotgan tadbirkorlar bilan uchrashuvlar davom etmoqda va ishbilarmonlarga huquqiy yordam koʻrsatib kelinmoqda.

Ilyas RAZAKOV,

tuman prokurorining katta yordamchisi.