Qonun loyihasi boʻyicha jamoatchilik muhokamasi oʻtkazildi (+video)

Shu yilning iyul oyida “Tarqqiyot koʻzgusi” gazetasi tahririyati Oʻzbekiston Pespublikasi Oliy Majlisi huzuridagi jamoat fondi tomonidan eʼlon qilingan grant tanlovida “Qonun loyihasi – jamoatchilik eʼtiborida” nomli loyihasi bilan ishtirok etib, gʻolib boʻlgan edi.

25-sentyabr kuni ushbu loyiha doirasida ilk tadbir – “Fuqarolarning jamoat tartibini saqlashdagi ishtiroki toʻgʻrisida”gi Oʻzbekiston Pespublikasi Qonuni loyihasi muhokamasiga bagʻishlangan yigʻilish oʻtkazilib, unda davlat va nodavlat, notijorat tashkilotlari, jamoat tashkilotlari va siyosiy partiyalar vakillari, ommaviy axborot vositalari xodimlari hamda jamoatchilik vakillari ishtirok etdilar.

Yigʻilishni “Taraqqiyot koʻzgusi” gazetasi Bosh muharriri Gʻulomjon Yeshniyozov kirish soʻz bilan ochdi va boshqarib bordi.

Yigʻilishda “Taraqqiyot koʻzgusi” gazetasi masʼul kotibi Allambergan Jumaniyozov soʻzga chiqib, Qonun loyihasi boʻyicha tushunchalar berdi.

Aytish kerakki, Fuqarolarning jamoat tartibini saqlashdagi ishtiroki – fuqarolarning huquq va erkinliklarini va qonuniy manfaatlarini himoya qilishda, jamoat tartibini saqlashda, jamoat xavfsizligini taʼminlashda, sodir etilgan jinoyatlarni va maʼmuriy huquqbuzarlikni aniqlashda, jinoyatchilarni izlab topishda, bedarak yoʻqolgan shaxslar turgan joylarni aniqlashda va huquqbuzarliklarning oldini olishda muhim ahamiyat kasb etadi.

Shundan keyin soʻzga chiqqanlar muhokama etilayotgan Qonun loyihasi boʻyicha oʻz takliflarini bildirdilar. Jumladan, tadbirkorlar va ishbilarmonlar harakati – Oʻzbekiston liberal-demokratik partiyasi tuman Kengashi apparat rahbari Muqaddas Beknazarova Qonunga jamoat tartibini saqlashda ishtirok etuvchi fuqarolarning hamda shu maqsadda tashkil qilingan jamoat birlashmalari aʼzolarining xizmat kiyimi shakli yoki uni tasdiqlash tartibi haqida tushunchalar kiritish, Oʻzbekiston Milliy tiklanish demokratik partiyasi tuman kengashi rahbari Shirin Yangiboyeva qonunga homiladorligi, nogironligi va voyaga yetmaganligi yaqqol koʻrinib turgan shaxslarga, mazkur shaxslar tomonidan qurolli yoki guruh boʻlib hujum qilish hollaridan tashqari, jismoniy kuch ishlatish taqiqlanishi haqidagi normani kiritish boʻyicha takliflar bildirdi.

Shuningdek, Fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman kengashi raisi oʻrinbosari Ashiraboy Qoʻshayev jamoat tartibini saqlashda ishtirok etuvchi fuqarolarning hayoti maʼlum darajada xavf ostida boʻlishi, ularning salomatligiga tahdidlar boʻlishini hisobga olib, ularni huquqiy himoya qilish qonun bilan kafolatlanishi, ularga xizmat vazifasini bajarish chogʻida jamoat transportidan bepul foydalanish, asosiy ish joyidan qoʻshimcha taʼtil kunlarini berish kabi imtiyozlar va kompensatsiyalar berilishi haqidagi qoʻshimchalarni kiritishni taklif etdi.

Yigʻilish yakunida muhokama etilgan Qonun loyihasi boʻyicha bildirilgan takliflarni Oʻzbekiston Pespublikasi Oliy Majlisining Qonunchilik palatasiga yuborish boʻyicha tegishli qaror qabul qilindi.