AMUDARYoLIK HAYITBOY ORTIQOV YaPONIYaDA TAHSIL OLMOQDA

Odatda keksalarimiz oila qurayotgan yoshlarni duo qilganlarida: “uvali-juvali boʻlinglar, es-hushli, solih farzandlarning ota-onasi boʻlinglar”, deyishlariga unchalik eʼtibor qilmaymiz. Aslida inson oila deya atalguvchi muqaddas qoʻrgʻonni bunyod etib, tinch-osoyishta turmush kechirsa, dunyoga keltirgan farzandlarini odobli, ilmli, hayoli va mehrli qilib voyaga yetkazsa, bu – ulkan baxt emasmi? Axir har birimizning ham orzu-umidlarimiz farzandlarimiz kamoli bilan bogʻliq-da.

Shu maʼnoda qaraydigan boʻlsak, Boʻzyop ovulida yashaydigan 49-umumtaʼlim maktabi oʻqituvchisi Rahmatulla Ortiqov va uning rafiqasi Gulnora Xudoyberganovalarni oʻz hayotidan mamnun ota-onalar deyishga haqlimiz.

Ular besh nafar farzandni el-yurtga munosib oʻgʻil-qizlar qilib voyaga yetkazishdi. Ayniqsa, Hayitboy erishayotgan yutuqlardan ularning koʻngillari faxr-u iftixorga toʻladi.

Hayitboy 49-sonli umumtaʼlim maktabini aʼlo baholarga tugatgach, 2004-yili Oʻzbekiston Milliy universitetining biologiya fakulteti, tuproqshunoslik-kimyogarlik boʻlimiga oʻqishga kirdi. Bakalavr bosqichini imtiyozli diplom bilan tugatib, davlat granti asosida magistratura bosqichiga oʻqishga kirdi.

U magistraturada oʻz sohasi boʻyicha chuqur bilim olish bilan bir qatorda nemis, ingliz tillarini oʻrganishga kirishdi. Maqsadi – oʻz sohasi boʻyicha dunyo tajribalarini va bilimlarini chuqur oʻrganish tufayli salohiyatini oshirish, tuproqshunoslik-agrokimyogarlik sohasida ilmiy izlanishlar olib borib, oʻz natijalari bilan ilm-fanimiz rivojiga hissa qoʻshish edi. Shu niyatda magistraturani ham muvaffaqiyatli tamomlab, oʻzi oʻqigan fakultetda ilmiy faoliyatini boshladi. Oradan 2-yil vaqt oʻtib, 2012-yilda Chexiya davlati tomonidan ajratilgan grant asosida oʻqish uchun imtihon topshirdi. Uning bu urinishi muvaffaqiyatli boʻldi – Praga Agrar universitetida bir yil ikki oy muddatda oʻz sohasi boʻyicha bilimlarini yanada boyitib qaytdi. Bu uning ilmiy izlanishlarini yana ham yuqori darajada olib borishiga imkon yaratdi.

Oʻqish-oʻrganishdan, ilmiy tadqiqot ishlaridan charchamaydigan, balki oʻziga xos zavq oladigan katta ilmiy xodim Hayitboy joriy yilda Yaponiya hukumatining JDS (Japan Development Scholarship) loyihasi doirasida har yili begʻaraz yordam sifatida ajratiladigan grantini yutib oldi. Endi u Tokio qishloq xoʻjaligi va texnologiyasi universitetida ikki yil taʼlim olish baxtiga muyassar boʻldi.

– Bu biz uchun kutilmagan voqea boʻldi, deya olmayman. Chunki oʻgʻlim oʻz ilmiy izlanishlari tufayli erishayotgan natijalarini dunyo ilm-fani yutuqlari bilan boyitishni, ilgʻor tajribalarni oʻrganishi lozimligini aytgandi. Bunday imkoniyatni grant tufayli qoʻlga kiritganiga juda quvondim, – deydi otasi Rahmatulla Ortiqov.

Ha, izlagan imkon topadi, deyishlari bejiz emas.

Hayitboy Ortiqov oʻz ilmiy salohiyati tufayli qoʻlga kiritgan Yaponiyada ikki yillik tahsil olish imkoniyatidan ham yurtimiz ilm-fani rivoji uchun unumli foydalanadi, deb umid qilamiz.

Aslida Hayitboyning niyati shunday. U oʻz maqsadi yoʻlida shu yilning 29-avgustida Tokioga joʻnab ketdi va hozir tahsil olishni boshlab yubordi.

Biz yurtimizning sergʻayrat va ilm olishdan charchamaydigan, izlanuvchan, yuksak orzular bilan Yaponiyaga yoʻl olgan umidli oʻgʻloniga ulkan muvaffaqiyatlar yor boʻlishini tilab qolamiz.

Oygul RAJABOVA.

Suratda: H.Ortiqov.