EZGULIK YOʻLIDA

Oʻrta maktabni tugatib, oliygohga oʻqishga kirish niyatida Toshkentga ilk qadam qoʻygan kunimdagi bir voqea hamon yodimda. Oʻshanda sinfdosh dugonalarim Sharifa, Ramiza, Shukurjonlar bilan Toshhovuz shahridagi vokzaldan otam rahmatlik poyezdga mindirib yuborgandilar. Toshkentga yetib borganimizdan soʻng poyezddan tushib, toʻrt dugona manzilga qanday, qaysi transportda borishimizni bilmay toʻxtab qoldik. Soʻray desak, aksiga olib, hech kim uchramaydi.

Shunda kelib toʻxtagan trolleybusdan yetaklashib, koʻrinishidan bizdan koʻra uch-toʻrt yoshcha kattaroq, doʻppi kiygan ikki oʻzbek yigit tushdi. Ular ham biz kabi avval talmovsirab turishdi-da, keyin bekatda trolleybus, tramvay, avtobuslar uchun yoʻl chipta sotib oʻtirgan rus ayoli yoniga borib, vokzalga oʻtish joyi qayerdaligini soʻradi. Ayol ularga yoʻl koʻrsatdi, yigitlarni piyodalar oʻtish joyidan oʻtkazib qoʻydi.

Ular sof rus tilida suhbatlashib yonimizdan oʻtib borayotganida koʻrdimki, ikkala yigitning ham koʻzlari yarim yumuq edi. Aftidan ular egizaklar edi, bir-biriga juda oʻxshardilar.

– Barakalla yigitlar,– dedi ayol oʻz tilida ularning yelkasidan qoqib.

Oʻshanda koʻzlari ojiz boʻlsa-da, ularning rus tilida ravon gapira olishiga, xuddi sogʻlom odamlarday mehnat qilishiga juda-juda havasim kelgan, nega men sogʻlom, koʻzlarim ravshan boʻlaturib, shu yigitlarchalik rus tilini oʻrgana olmadim, deya oʻkinganimni, rus ayolning “molodtsi, rebyata” deb qoʻyganida ularga havas bilan qaraganimni hamon unutolmayman. Hayotda yaxshi yashash, xayrli ishlar qilish, birovlardan olqish olish uchun koʻrkam yo sogʻlom boʻlish ham shart emasligini oʻshanda tushunganman...

Mustaqillik bayrami arafasida Oʻzbekiston Koʻzi ojizlar jamiyati Amudaryo tuman boʻlimi raisi Aminboy Oʻrozmetovning davlatimizning yuksak unvoniga sazovor boʻlganligi haqidagi xushxabarni eshitib, oʻsha voqeani yana esladim. Ha, koʻzi ojiz boʻlsa-da, sogʻlom odamdan kam boʻlmay, 12-yildan beri shu boʻlimga yetakchilik qilib, oʻzi kabi necha-necha odamlarni Yaratganning ravo koʻrganiga shukur qilib, imkon qadar yaxshi yashash uchun intilishga ragʻbatlantirib, ularga madad boʻlishga, koʻngliga yorugʻlik olib kirishga harakat qilib kelayotgan bu yigitga faqat men emas, koʻpchilik havas qilsa, arziydi.

Ayni kunda jamiyatning tuman boʻlimida 459 nafar aʼzo bor. Ularni qutlugʻ kunlar, muhim sanalarda bir dasturxon atrofiga toʻplab, bayramlarni koʻngilli nishonlashlariga, boʻsh vaqtlarini mazmunli oʻtkazishlariga erishishni Aminboy oʻz burchi deb biladi.

2014-yilda Aminboy Oʻrozmetovning saʼy-harakatlari va tumanimiz sobiq hokimi Rajabboy Yoʻldashev (Xudo rahmat qilsin!) tashabbusi bilan qurilib foydalanishga topshirilgan zamonaviy binoda faoliyat koʻrsatayotgan boʻlim kutubxonasi jamiyat aʼzolarininggina emas, shu hududda yashovchi aholining ham sevimli maskani. Kutubxonaning jami kitob fondi 5618 ta, shuning 1632 tasi Brayl alifbosidagi, 944 tasi audio, 21 tasi gapiruvchi, 3021 tasi bosma harfli kitoblardir. Kitobxonlar soni esa 600 nafardan ziyod. Kuniga tashrif buyuruvchilar 20-30 nafar atrofida. Kutubxona mudiri Bozorboy Oʻrozmetov, kutubxonachi Zuhra Yormonovalar kitobxonlarga namunali xizmat koʻrsatishadi.

Boʻlimda uning yelib-yugurishlari tufayli boʻz toʻqish tsexi faoliyati yoʻlga qoʻyildi. Bu yerda hozir oʻrnatilgan 10 ta dastgohning 8 tasida boʻz, brezent matolari toʻqilayapti.

– Aslida oilamizda mening maoshimga zarurat yoʻq. Biroq mening ham bekor oʻtirgim kelmaydi, bolalarimga koʻmakdosh boʻlib ishlagim keladi. Mana, biz uchun Aminboy ishlashga sharoit yaratib qoʻyibdi, – deydi Norjon Chovdirova.

Ha, Aminboy Oʻrozmetov ana shunday ezgu xizmatlari uchun Qoraqalpogʻiston Respublikasi Joʻqorgʻi Kengesi Raisining qaroriga muvofiq mamlakatimiz mustaqilligining 27 yilligi arafasida “Qoraqalpogʻiston Respublikasida xizmat koʻrsatgan madaniyat xodimi” Faxriy unvoni bilan taqdirlandi.

Bu xushxabar tarqalgan kun Oʻzbekiston Koʻzi ojizlar jamiyati tuman boʻlimi aʼzolari uchun bayramga aylanib ketdi. Aslida ham koʻzi ojiz, koʻngli yarim odamlar hayotiga mazmun, quvonch olib kirishdek ezgu maqsad bilan mehnat qilayotgan bu yigit har qancha olqishlar-u tahsinlarga loyiq.

Oygul RAJABOVA.

Suratda: Aminboy Oʻrozmetov.