Amudaryoda “Yosh oilalar va qizlar” forumi oʻtkazildi

Bugungi kunda yoshlar, ayniqsa qiz bolalarni tarbiyalash, ularning zamonaviy bilim va kasb-hunarlarni egallashiga yordam berish, mustaqil hayotga tayyorlash, ijtimoiy-siyosiy faolligini oshirish, erta nikohlarning oldini olish, urf-odat va marosimlarni tartibga solish borasida keng koʻlamli ishlar amalga oshirilmoqda. 

Xotin-qizlar maʼnaviyatini yuksaltirish, kelajak poydevori boʻlmish qizlarni milliy qadriyatlarimiz, urf-odatlarimiz asosida kamol toptirish bugungi kunning dolzarb vazifalaridan biridir.

Bugungi kunda yoshlarimiz orasida, yosh qizlarimiz orasida uchrab turadigan ayrim salbiy koʻrsatkichlar, xususan, erta tugʻruq, oilaviy ajrimlar, jinoyatchilik va oʻz joniga qasd qilish kabi holatlarning mavjudligi, faol boʻlmagan, maʼlum bir mehnat turi bilan band boʻlmagan qizlarimiz qatlami bilan yangicha yoʻnalishida, yangicha tizim asosida ishlash zarurligini taqozo etadi. Bu vazifalarni ijro etish maqsadida Oʻzbekiston Xotin-qizlar qoʻmitasi joriy yilning 14-16-avgust kunlarida Oʻzbekiston Respublikasi Davlat mustaqilligining 27 yilligi hamda “Xalqaro yoshlar” kuni munosabati bilan Oʻzbekiston yoshlar ittifoqi va bir qator jamoat tashkilotlari hamkorligida “Aziz va yagonamsan, jonajon Oʻzbekistonim” shiori ostida “Yosh oilalar va qizlar” Respublika konferentsiyasini oʻtkazishni belgiladi.  

Shu munosabat bilan tumanimizda ham 14-avgust kuni “Yosh oilalar va qizlar” forumi oʻtkazildi. 

Bayramona bezatilgan Amudaryo akademik litseyi kirish foyesida dastlab tumanimizdagi umumtaʼlim maktablari, MTMlar, Bolalar musiqa va sanʼat maktablari iqtidorli oʻquvchilarining amaliy va badiiy sanʼati namunalari namoyish etildi. Forumni tuman hokimi oʻrinbosari M.Ahmedova ochdi va boshqarib bordi.

Forum doirasidagi xotin-qizlarning qiziqishlaridan kelib chiqqan holda oʻtkazilgan mahorat darslari “Kim nimaga qodir” deb nomlandi. Bunda 7 xil hunar ustalari ishtirokchilarga hunarni egallash va uning ahamiyati haqida gapirib berdilar.

Shuningdek “Ilm-fan kelajak poydevori” shiori ostida “Oilam kitob oʻqiydi” aktsiyasi ham barchaning qiziqishlariga sababchi boʻldi. Tadbirda yoshlar orasida maʼnaviy-axloqiy tarbiyani shakllantirishga xizmat iluvchi “Jayxun ilhomlari” NNT qoshidagi kutubxonaga yangi keltirilgan kitoblar taqdimoti ham oʻtkazildi.

“Men ham yetakchi boʻlaman” mavzusida ijtimoiy-siyosiy faol ayollar bilan uchrashuv yoshlarning eʼtiborini tortdi. Uchrashuvda tuman hokimi oʻrinbosari, Xotin-qizlar qoʻmitasi raisi M.Ahmedova, OʻzMTDP tuman Kengashi raisi Sh.Yangiboyeva, OʻzLiDep tuman Kengashi raisi oʻrinbosari M.Beknazarova, OʻzXDP tuman Kengashi raisi M.Saʼdullayev, 40-sonli maktab direktori S.Xoʻjamurodovalar yoshlarga ijtimoiy faol boʻlib, hayotda oʻz oʻrinlarini topish, buning uchun tinmay oʻqib-oʻrganib, intilmogʻi lozimligini taʼkidladilar.

Forum soʻngida faol ishtirok etgan bir guruh ayol-qizlarga tuman Xotin-qizlar qoʻmitasining tashakkurnomalari topshirildi.

Tumanimizning barcha hududlaridan iqtidorli, intiluvchan ayol-qizlarni jamlagan forum doirasida oʻtkazilgan har bir tadbir barcha ishtirokchilarda ulkan taassurotlar qoldirdi.

O.RAJABOVA.