Yoshlar maʼnaviyatini yuksaltirishga xizmat qiluvchi tadbirlar oʻtkazildi

Kitoblar donolikni yoyish qurolidir, deya yozgan edi buyuk faylasuf Komenskiy.

Chindan-da kitob mutolaa qilgan odam undan maʼnaviy ozuqa oladi, fikri teranlashadi, barkamol inson boʻlib voyaga yetadi, oʻz hayotini oʻzi toʻgʻri belgilay oladi.

Tumanimiz aholisini, ayniqsa yoshlarni kitob oʻqishga keng jalb qilish maqsadida “Jayxun ilhomlari” nodavlat notijorat tashkiloti qoshida kutubxona tashkil etilgan edi.

Ayni kunda mazkur kutubxonada 4000 dan ziyod kitob fondi mavjud boʻlib, ularning aksariyati oʻquvchi yoshlarga moʻljallangan asarlardir.

17-may kuni “Amudaryo telekanali” tahririyatida amalga oshirilayotgan “Odobli bola – el koʻrki” nomli grant loyihasi doirasida 64-sonli maktab yuqori sinf oʻquvchilarining mazkur kutubxonaga sayohati uyushtirildi.

Sayohatga oʻquvchilarni maktab kutubxonachisi Gulchehra Ollamova, ona tili va adabiyoti fani oʻqituvchisi Darmon Yoʻldoshevalar boshlab keldilar.

“Taraqqiyot koʻzgusi” gazetasi maxsus muxbiri Oygul Rajabova oʻquvchilarni kutubxonadagi mavjud kitoblar bilan tanishtirdi, kutubxonaga aʼzo boʻlish, kitoblarni oʻqish uchun olish, qaytarish tartib-qoidalarini oʻrgatdi.

Shuningdek, istak bildirgan oʻquvchilar kutubxonaga aʼzo boʻlib, oʻzlariga yoqqan kitoblarni oʻqish uchun oldilar.

– Baʼzan biz darslikka qoʻshimcha oʻqish uchun tavsiya qilingan adabiyotlarni topishda qiynalar edik. Bu kutubxona bizning oʻquvchilarimiz uchun yaxshi imkoniyat ekan. Endi albatta oʻquvchilarimiz bilan tez-tez kelib turamiz, -dedi Darmon Yoʻldosheva.

Kutubxonaga qilingan sayohat oʻquvchilarda ulkan taassurotlar qoldirdi.

18-may kuni mazkur grant loyihasi doirasida Oq oltin ovulidagi 7-sonli maktabda namunali oilalarning, nuroniy otaxon va onaxonlarning hayot tajribalari asosida yosh oilalarni, ularda voyaga yetayotgan yosh avlodni milliy urf-odat, qadriyatlar, anʼanalarga sadoqat ruhida tarbiyalash maqsadida “Kiyinish madaniyati-yoshlar maʼnaviyati koʻzgusi” mavzusida davra suhbati oʻtkazildi.

Davra suhbatini maktab direktori Bozorboy Ibragimov ochdi va olib bordi.

Tadbirda “Taraqqiyot koʻzgusi ” gazetasi maxsus muxbiri Oygul Rajabova ajdodlarimizdan meros boʻlib kelayotgan milliy urf-odatlarimiz, anʼanalarimizning bugungi kundagi yoshlar tarbiyasidagi ahamiyati, xususan, milliy liboslarimiz, yoshlarning kiyinish madaniyatiga qay tariqa amal qilayotganligi haqida batafsil gapirdi.

Ochigʻini aytish kerak, ayrim qizlar-yigitlar xorij filmlari taʼsirida ochiq-sochiq, kalta va tor kiyishga harakat qiladilar. Yigitlarning ham kalta shortik, yengsiz koftalarda jamoat joylarda yurganini uchratamiz. Oʻzingiz bir oʻylab koʻring: oʻz milliy liboslarimiz bunday kiyimlardan kammi, koʻrimsizmi? Chor-atrofidagilardan ajralib, oʻzgacharoq boʻlib yurish, boshqalarning diqqatini oʻziga jalb qilishga urinib, ortiqcha hashamdor yoxud yelkalari ochiq, tor kiyimlar kiyishni qanday baholaysiz?

Oʻrtaga tashlangan bunday savollarga yoshlarning fikrlari bizni juda quvontirdi: ular milliyligimizdan chekinmagan holda kiyinish tarafdori! Maktab oʻquvchilari Oydoʻs Boltabekov, Sanjar Hayitboyev, Sarvar Otaboyev, Nilufar Safarboyevalarning fikrini tinglagan kishi shunday xulosaga kelishi tayin.

Ochiq va samimiy muloqot tarzida oʻtgan davra suhbati ishtirokchilarda chuqur taassurotlar qoldirdi.

Sevara Ismoilova,

gazetaning jamoatchi muxbiri.

Oʻzbekiston Yoshlar ittifoqi

Amudaryo tuman yetakchilar Kengashi aʼzosi.