Doʻrman ovulida kitobxon yoshlar koʻp

Ovuldagi 20-sonli umumtaʼlim maktabi hovlisi shu kunlarda bahor tarovatidan yanada koʻrkam qiyofa kasb etdi. Baland va sersoya gujumlar, xushboʻy gullar, ninabargli dov-daraxtlar qulf urib turgan bu moʻʼtabar maskanda boʻlib oʻtgan “Taraqqiyot koʻzgusi” gazetasi tahririyati va “Jayxun ilhomlari” NNT hamkorligida eʼlon qilingan  Ommaviy kitobxonlik oyligining “Sayyor kitoblar karvoni” loyihasida nafaqat maktab oʻquvchi-yoshlari, balki ularning ota-onalari ham faol ishtirok etdilar.

Tadbirda “Jayxun ilhomlari” NNT raisi Ahmad Nafasov, “Sayyor kitob karvoni” loyihasi hamkori Oʻzbekiston jurnalistlar Ijodiy uyushmasi aʼzosi Allambergan Jumaniyozov, “Taraqqiyot koʻzgusi” gazetasi maxsus muxbiri Pobiya Yoʻldosheva, Doʻrman ovulida istiqomat qiluvchi shoir Shomurod Xoʻjanov, 20-sonli maktab oʻqituvchisi Erkin Qurbonboyevlar kitobxonlikning ahamiyati, mamlakatimizda ijod ahliga koʻrsatilayotgan eʼtibor va ragʻbat, shuningdek mamlakatimizdagi nufuzli nashriyotlarda chop etilayotgan yangi asarlar va ularning mualliflari, eng yaxshi, bilimdon kitobxonlarni ragʻbatlantirish borasida olib borilayotgan ishlar, maʼnaviy-maʼrifiy sohadagi oʻzgarishlar haqida oʻquvchi-yoshlarga gapirib berdilar. Ishtirokchilarni “Sayyor kitob karvoni” loyihasi doirasidagi “Eng yaxshi sovgʻa – kitob”, “Kutubxonaga kitob sovgʻa qilaman” aktsiyasida faol ishtirok etishga daʼvat etdilar.

Tadbirda “Kitoblar olami” firma doʻkonining koʻchma savdo rastasi tashkil etilib, ishtirokchilarga namunali savdo xizmati koʻrsatildi. “Jayxun ilhomlari” NNT ning “Koʻchma kutubxonasi” hamkori Dildora Pajabovaning xizmatidan koʻpchilik mamnun boʻldi. Shu kuni “Jayxun ilhomlari” NNTkutubxonasiga 20 nafar oʻquvchi-yoshlar aʼzo boʻldilar va oʻzlari uchun manzur boʻlgan kitoblarni oʻqish uchun tanlab oldilar.

Pobiya Yoʻldosheva.