“Ommaviy kitobxonlik oyligi” davom etmoqda

Maʼnaviyat va mutolaa bayrami

Shu kunlarda tumanimizda “Taraqqiyot koʻzgusi” gazetasi tahririyati va tahririyat huzuridagi “Jayxun ilhomlari” nodavlat notijorat tashkiloti hamkorligida “Oilaviy kitobxonlik oyligi” oʻtkazilmoqda.

Joriy yilning 20-aprelidan 20-may sanasigacha oʻtkazilishi belgilangan “Ommaviy kitobxonlik oyligi” doirasidagi tadbir “Choykoʻl” ovuli hududidagi 22-sonli maktab oʻquvchi-yoshlari ishtirokida boʻlib oʻtdi. Unda “Sayyor kitob karvoni” loyihasi boʻyicha oʻquvchi-yoshlar “Jayxun ilhomlari” NNT tomonidan tashkil etilgan “Koʻchma kutubxona” bilan yaqindan tanishdilar va 23 nafar oʻquvchilar kutubxonaga aʼzo boʻldilar.

Shuningdek, tadbir ishtirokchilari koʻchma kitob doʻkoni xizmatlaridan ham bahramand boʻlishlari uchun sharoit yaratildi. Bu borada kitob savdosi bilan shugʻullanuvchi tadbirkor Ulugʻbek Masharipov raxbarligidagi “Amudaryo-nur-ziyo” firma doʻkoni namunali xizmat kshrsatdi hamda “Eng yaxshi sovgʻa – kitob” aktsiyasida ota-onalar va kitobxon oʻquvchilar faol ishtirok etishib, bir-birlariga kitoblar sovgʻa qildilar.

“Kutubxonaga kitob sovgʻa qilaman” deb nomlangan xayriya aktsiyasi ishtirokchisi, 22-sonli maktab direktorining maʼnaviy-maʼrifiy ishlar boʻyicha oʻrinbosari Maqsud Ollamurodov “Jayxun ilhomlari” NNT kutubxonasiga ikkita kitobni sovgʻa sifatida topshirdi.

“Ommaviy kitobxonlik oyligi” doirasida oʻtkazilgan tadbirda “Jayxun ilhomlari” NNT raisi Ahmad Nafasov, “Taraqqiyot koʻzgusi” gazetasi maxsus muxbiri Pobiya Yoʻldoshevalar oʻquvchi-yoshlarga kitobning inson hayotida tutgan oʻrni, inson kamolotidagi maʼnaviy-maʼrifiy ahamiyati haqida gapirib berdilar.

Boʻlib oʻtgan tadbir oʻquvchi-yoshlar va ularning ota-onalari uchun haqiqiy maʼnaviyat va mutolaa bayramiga aylanib ketdi.

Dildora PAJABOVA,

www amunews.uz veb saytining jamoatchi muxbiri.